திருப்பராய்த்துறை

சிவபெருமான்‌ கங்கையை சடையில்‌ அணிந்தவராகவும்‌, திருநீற்றை அணிந்த திருமேனியராகவும்‌, உமையம்மையை ஒரு பாகமாகக்‌ கொண்டவராகவும்‌, திருப்பராய்த்‌ துறையில்‌ விளங்குகின்றார்‌. இப்பெருமான்‌ தமது கையில்‌ பருந்துகள்‌ தொடரத்தக்கதாய்ப்‌ புலால்‌ நாற்றம்‌ கொண்ட பிரமனது தலையோட்டை வைத்திருக்கின்றார்‌.

பசுமையான குளிர்ந்த குருக்கத்திக்‌ கொடிகள்‌ சூழ்ந்த திருப்பராய்த்துறையில்‌ விளங்கும்‌ அழிவற்றவராகிய இறைவர்‌, மணங்கமழும்‌ சிறந்த மலர்களும்‌, கொன்றையும்‌ மணக்கும்‌ சடைமுடியின்மேல்‌ பெருக்கெடுத்து வந்த கங்கை நதியை வைத்துள்ளவர்‌.

திருப்பராய்த்துறையில்‌ எல்லா உலகங்களுக்கும்‌ ஆதியாக விளங்குபவராய்‌ எழுந்தருளியுள்ள இறைவர்‌, வேதங்களை அருளிச்‌ செய்தவர்‌. எல்லா வேதங்களையும்‌ முறையாக விரித்துப்‌ பொருள்‌ விளக்கம்‌ அருளிய ஒப்பற்றவர்‌. தம்‌ திருமேனியில்‌ பாதிப்‌ பெண்ணுருவாக விளங்குபவர்‌.

திருப்பராய்த்துறையில்‌ ஆலநீழலில்‌ எழுந்தருளிப்‌ பால்‌, நெய்‌ முதலியவற்றை விரும்பி ஆடும்‌ இறைவர்‌, புவித்தோலைத்‌ தம்‌ இடையிலே ஆடையாக உடுத்தவர்‌. ஒளி பொருந்திய பூணூல்‌ அணிந்த மார்பினை உடையவர்‌.

திருப்பராய்த்துறையில்‌ பாம்பை இடையில்‌ கட்டியவராய்‌ விளங்கும்‌ பரமர்‌. திருநீற்றைத்‌ தம்‌ மேனிமேல்‌ விரவப்‌ பூசியவர்‌. நள்ளிரவில்‌ சுடுகாட்டுள்‌ நின்று எரி ஆடுபவர்‌. வேதங்களால்‌ பரவப்‌ பெற்றவர்‌.

பறை, சங்கு முதலியன முழங்கும்‌ திருவிழாக்கள்‌ நிகழும்‌ திருப்பராய்த்துறையில்‌ எல்லோரும்‌ புகழ்ந்து போற்ற எழுந்தருளிய இறைவர்‌, வேதங்களை ஓதுபவர்‌, மான்‌ கன்றைக்‌ கையின்கண்‌ உடையவர்‌, விடக்கறை கொண்ட கண்டத்தை உடையவர்‌.

திருப்பராய்த்துறையில்‌ பொருந்தி விளங்கும்‌ இறைவர்‌, விடையேற்றினை ஊர்ந்து வருபவர்‌. வெண்மையான இருநீற்றைப்‌ பூசுபவர்‌. சடையின்மேல்‌ கங்கையைத்‌ தரித்தவர்‌. வெண்மையான மழுவைப்‌ படைக்கருவியாகக்‌ கொண்டவர்‌.

திருப்பராய்த்துறையில்‌ எழுந்தருளிய இறைவர்‌, வலிமைமிக்க பத்துத்‌ தலைகளை உடைய இராவணனைத்‌ தம்‌ கால்‌ விரல்‌ ஒன்றினால்‌ நெரித்தவர்‌. தக்கன்‌ வேள்வியில்‌ கதிரவனின்‌ பற்களைத்‌ தகர்த்தவர்‌.

திருப்பராய்த்துறையில்‌ ஆற்றல்‌ மிக்கவராய்‌ விளங்கும்‌ அடிகள்‌, மணம்‌ பொருந்திய தாமரை மலரில்‌ விளங்கும்‌ பிரமன்‌, திருமால்‌ ஆகியோரால்‌ அடிமுடி அறியப்‌ பெறாத தோற்றத்தினை உடையவர்‌. தம்மை வழிபடுபவர்களின்‌ வினைகளைப்‌ போக்குபவர்‌.

புண்ணியமில்லாத திலராகிய புத்தர்களும்‌, சமணர்களாகிய கீழ்மக்களும்‌, கூறும்‌ பொருளற்ற அறவுரைகளைக்‌ கேளாதீர்‌. பெரிய மேருமலையாகிய வில்லால்‌ முப்புரங்களை எய்தழித்து உலகைக்‌ காத்துத்‌ திருப்பராய்த்துறையில்‌ எழுந்தருளி இருக்கும்‌ இறைவனை வாழ்த்துவீர்களாக.

செல்வங்கள்‌ நிறைந்து விளங்கும்‌ திருப்பராய்த்‌ துறையில்‌ சிவஞானச்‌ செல்வர்கள்‌ நிறைந்து வாழ்கின்றனர்‌. இத்தலத்தில்‌ வீடுபேறாகிய செல்வத்தை நல்கும்‌ சிவபெருமான்‌ எழுந்தருளி உள்ளார்‌. இந்தச்‌ செல்வப்‌ பெருமானைப்‌ போற்றி அருட்செல்வரான ஞானசம்பந்தன்‌ பாடி அருளிய அழிவற்ற இந்தச்‌ செந்தமிழ்ப்‌ பாடல்களைப்‌ பொருள்‌ உணர்ந்து பாட வல்லவர்க்கு எல்லாச்‌ செல்வங்களும்‌ தாமாகவே வந்தடையும்‌.