1
மாதர் மடப்பிடி யும்மட வன்னமு மன்னதோர் நடை யுடைம் மலை மகள் துணையென மகிழ்வர்பூதவி னப்படை நின்றிசை பாடவு மாடுவர் அவர் படர் சடை நெடு முடியதொர் புனலர்வேதமொ டேழிசை பாடுவ ராழ்கடல் வெண்டிரை இரைந் நுரை கரை பொரு துவிம்மி நின்றயலேதாதவிழ் புன்னை தயங்கு மலர்ச்சிறை வண்டறை எழில் பொழில் குயில் பயில் தருமபு ரம்பதியே.
சொற்பிரிப்பு
மாதர் மடப்பிடியும் மட அன்னமும் அன்னது ஓர் நடை உடை மலைமகள் துணை என மகிழ்வர்,பூத இனப்படை நின்று இசை பாடவும் ஆடுவர், அவர் படர் சடை நெடுமுடியது ஒர் புனலர்,வேதமொடு ஏழிசை பாடுவர் ஆழ்கடல் வெண்திரை இரை நுரை கரை பொருது, விம்மி நின்று, அயலேதாது அவிழ் புன்னை தயங்கு மலர்ச் சிறைவண்டு அறை எழில் பொழில் குயில் பயில் தருமபுரம்பதியே.
உரை
திருத்தருமபுரத்தைத் தமது பதியாகக் கொண்டு வீற்றிருக்கும் சிவபெருமான், இளம் பெண் யானையையும் இள அன்னத்தையும் போன்ற பெருமித, மென்மையான நடையினை உடைய மலைமகளான உமையம்மையைத் தமது துணைவியாகக் கொண்டு மகிழ்ந்திருப்பவர். இவர் பூதப் படைகள் நின்று இசைபாட திருநடனம் ஆடுபவர். விரிந்த சடைகளை உடைய நீண்ட முடிமீது கங்கையை அணிந்திருப்பவர். வேதகீதங்களையும் ஏழிசைகளையும் பாடுபவர். இந்தப் பதியில் ஆழ்கடலில் வெண்மையான அலைகள் ஆரவாரத்துடன் நுரைகளோடு கரையில் மோதுகின்றன. அந்தக் கடற்கரையில் வளர்ந்து நிற்கும் புன்னை மரங்களில் பூத்த மகரந்தம் பொருந்திய மலர்களில் வண்டுகள் பாடுகின்றன. அழகிய பொழில்களில் குயில்கள் கூவுகின்றன.