திருக்கச்சியேகம்பம்

நன்றாக வெந்ததும்‌, வெண்மையானதுமான திருநீற்றுப்‌ பொடியைப்‌ பூசியிருப்பவர்‌; திருமார்பில்‌ விரிந்த பூணூல்‌ ஒரு பாகத்தில்‌ விளங்குமாறு தோற்றம்‌ அளிப்பவர்‌; மணம்‌ கமழும்‌ கூந்தலை உடைய உமையம்மையோடு இருப்பவர்‌. விளங்கும்‌ பொழில்களால்‌ சூழப்பட்ட திருக்கச்சி என்னும்‌ தலத்தில்‌ எல்லையற்ற நற்குணங்களை உடைய அடியவர்கள்‌ போற்றி வணங்குமாறு நடனம்‌ செய்யும்‌ இவர்‌, எம்‌ தந்தையாகிய சிவபெருமான்‌ ஆவார்‌. இப்பெருமான்‌ விருப்பத்துடன்‌ எழுந்தருளி உள்ள ஏகம்பம்‌ என்னும்‌ திருக்கோயிலைத்‌ தொழுது போற்றினால்‌ நமது துன்பங்கள்‌ இல்லாமல்யோய்விடும்‌.

வரம்‌ பெற்ற அசுரர்களின்‌ பெரிய நகரங்களான முப்புரங்களும்‌ ஒன்றாய்ச்‌ சேர்ந்து அழிந்து போகுமாறு சரம்‌ தொடுத்து எரித்த நீண்ட சடைகளை உடைய சங்கரன்‌ சிவபெருமான்‌ ஆவார்‌. இப்பெருமான்‌ விரும்பி எழுந்தருளிய இடம்‌ திருக்கச்சி ஏகம்பம்‌ ஆகும். குருந்த மரம்‌, மல்லிகை மலர்‌, கோங்கு மரம்‌, குருக்கத்தி மரம்‌, நல்ல குரா மரம்‌, கடம்ப மரம் ஆகியவற்றால்‌ அழகுடன்‌ விளங்கும்‌ பசுமையான பொழில்கள்‌ சூழ்ந்துள்ள கச்சி மாநகரில்‌ உள்ள திருஏகம்பத்தை அடைந்து தொழ, நமது துன்பங்கள்‌ இல்லாமல்‌ போய்விடும்‌.

வெண்மை நிறம்‌ உடைய திருநீற்றை மார்பில்‌ பூசியிருப்பவன்‌. உடலில்‌ வரிகளை உடைய பாம்பை அணிந்திருப்பவன்‌. உமையம்மையை ஒரு பாகத்தில்‌ விரும்பி ஏற்றியிருப்பவன்‌. சுடுகாட்டில்‌ எரிஆடல்‌ புரியும்‌ தலைக்கோலம்‌ உடையவன்‌. இத்தகைய பெருமைகளை உடைய சிவபெருமான்‌ விரும்பிய இடம்‌ திருக்கச்சியேகம்பம்‌ ஆகும்‌. அது விண்ணைத்‌ தொடும்‌ மாடவீடுகள்‌ ஓங்கி விளங்குவதும்‌, என்றும்‌ நிலைபெற்ற பொழில்களால்‌ சூழப்பட்டதும்‌ ஆகும்‌. இத்திருக்கச்சி ஏகம்பத்தை அடைந்து விட்டால்‌ நமது துன்பங்கள்‌ இல்லாமல்‌ போய்விடும்‌.

மான்தோலும்‌, பூணூலும்‌ பொருந்திய மலை போன்ற திருமார்பில்‌ சுடலையில்‌ எடுத்த வெண்மையான திருநீற்றை அணிந்திருப்பவன்‌ சிவபெருமான்‌. காலனான எமனை மார்க்கண்டேயருக்காக தமது திருக்காலால்‌ உதைத்த கடவுளான சிவபெருமான்‌ விரும்பி இருக்கும்‌ இடம்‌ திருக்கச்சி ஏகம்பம்‌ ஆகும்‌. மாலைக்‌ காலத்தில்‌ தோன்றும்‌ வெண்மையான மதியை மறைக்கும்படி உயர்ந்த பெரிய மதில்களை உடைய கச்சி மாநகரில்‌, மணம்‌ வீசும்‌ சோலைகளால்‌ சூழப்பட்ட ஏகம்பம்‌ என்னும்‌ திருக்கோயிலைப்‌ போற்றி வழிபட்டால்‌ நமது துன்பங்கள்‌ இல்லாமல்‌ போய்விடும்‌.

அழகிய இதழ்களோடு கூடிய கொன்றை மலர்‌ மாலை சூடிய சடையின்மேல்‌ தூய மதியை அணிந்திருப்பவன்‌. நான்மறைகளைப்‌ பாடல்களாகக்‌ கொண்டிருப்பவன்‌. பேய்க்‌ கணங்கள்‌ பலசூழ வீற்றிருப்பவன்‌. புலால்‌ வற்றிய வெண்மையான தலையோட்டையும்‌ அனலையும்‌ கையில்‌ ஏந்தியிருப்பவன்‌. மகிழ்வுடன்‌ உமையம்மையுடன்‌ ஆடல்‌ புரிபவன்‌. இத்தகைய பெருமைகளைக்‌ கொண்டு உலகம்‌ அழிய தான்மட்டும்‌ எஞ்சி நிற்கும்‌ பெரியோனாகிய சிவபெருமான்‌ எழுந்தருளி இருக்கும்‌, ஆரவாரம்‌ மிகுந்த கச்சியில்‌ விளங்கும்‌ திருஏகம்பத்தைத்‌ தியானித்தால்‌ நமது துன்பங்கள்‌ இல்லாமல்‌ போய்விடும்‌.

மேருமலையை வில்லாகக்‌ கொண்டு, அசுரர்களின்‌ மூன்று மதில்களும்‌ அழிந்து போகுமாறு கனை தொடுத்தவர்‌. தமது திருமேனியில்‌ உமையம்மையை ஒருபாகமாகக்‌ கொண்டிருப்பவர்‌. தமது திருமார்பில்‌ பாம்பையும்‌ முப்புரிநூலையும்‌ அணிந்திருப்பவர்‌. இத்தகைய பெருமைகளைக்‌ கொண்ட சிவபெருமான்‌, விண்ணை முட்டும்‌ மணிமாடங்களையும்‌, உயர்ந்த மதில்களையும்‌ உடைய கச்சி மாநகரில்‌ உள்ள திருஏகம்பத்தில்‌ உறைகின்றார்‌. இப்பெருமானின்‌ திருவடிகளைப்‌ போற்றித்‌ தொழுதால்‌ நமது துன்பங்கள்‌ விலகிவிடும்‌.

பிறையை அணிந்த செஞ்சடையில்‌ அரவத்தை அணிந்திருப்பவர்‌ சிவபெருமான்‌: இடப்பாகத்தில்‌ நாணோடு கூடியவளும்‌ இல்வாழ்க்கைக்கு உரியவளுமான உமையம்மையை விரும்பி ஏற்றிருப்பவர்‌. சிரிப்பது போன்று தோற்றமளிக்கும்‌ தலையோட்டில்‌ பிச்சை ஏற்பவர்‌. மன உறுதி இல்லாத அரக்கனான இராவணனின்‌ நீண்ட கிரீடம்‌ தரித்த பத்துத்‌ தலைகளையும்‌ நெரித்தவர்‌. இத்தகைய பெருமைகளை உடைய சிவபெருமானின்‌ ஊர்‌ திருக்கச்சி ஏகம்பம்‌ ஆகும்‌. வானளாவி ஓங்கி உயர்ந்த பொழில்களை உடைய கச்சி மாநகரில்‌ உள்ள திருஏகம்பத்தை அடைந்துவிட்டால்‌ நமது துன்பங்கள்‌ நீங்கிவிடும்‌.

பிரமனும்‌ திருமாலும்‌ கைகூப்பி பணிந்து தொழுதபோது பெரிய அனல்‌ உருவாக நின்ற பெருமான்‌ சிவபெருமான்‌ ஆவான்‌. பாம்பை அணிந்த சடையை உடைய அந்தணனும்‌ ஆகிய இப்பெருமான்‌ தன்‌ தேவியோடு அமர்ந்திருக்கும்‌ இடம்‌ திருக்கச்சி ஏகம்பம்‌ ஆகும்‌. உள்ளத்தில்‌ வஞ்சகம்‌ இல்லாத வள்ளல்‌ தன்மை உடைய கைகளும்‌ உள்ள சான்றோர்கள்‌ வாழ்கின்ற ஆரவாரமுடைய மாநகர்‌ கச்சி ஆகும்‌. இங்குள்ள குங்கும மரங்கள்‌ சூழ்ந்த பொழில்களை உடைய இந்த ஏகம்பத்தைத்‌ தொழுதால்‌ நம்மைத்‌ துன்புறுத்தும்‌ கொடிய வினைகள்‌ மாய்ந்து அறுபட்டுப்‌ போகும்‌.

தடித்த உடலமைப்பும்‌, ஆடையில்லாமல்‌ திரியும்‌ சமணர்களும்‌, ஆடையை உடலில்‌ போர்த்து வலியவராகத்‌ திரியும்‌ புத்தர்களும்‌ புனைந்து கூறும் உரைகளை விரும்பாதீர்கள்‌. பகைவர்களான அசுரர்களின்‌ மூன்று புரங்களையும்‌ கொடிய கணை ஒன்றால்‌ எரித்து அழித்த சிவபெருமான்‌ எழுந்தருளி இருக்கும்‌ ௧ச்சி நகரில்‌ உள்ள ஏகம்பத்தைச்‌ சென்று அடைந்தால்‌ நமது துன்பங்கள்‌ இல்லாமற்போகும்‌.

அழகு நிறைந்த பொழில்கள்‌ சூழ்ந்த கச்சி ஏகம்பத்துள்‌ விளங்கும்‌ சிவபெருமானை, மேகங்கள்‌ தவழும்‌ அழகிய மணிமாடங்கள்‌ ஓங்கிய கழுமல நன்னகருள்‌ தோன்றிய தமிழ்‌ வல்ல ஞானசம்பந்தன்‌ போற்றிப்‌ பாடினார்‌. இவர்‌ துதித்துப்‌ போற்றிய இந்தப்‌ பத்துப்‌ பாடல்களையும்‌ ஓதவல்லவர்கள்‌ இவ்வுலகில்‌ சிறந்த புகழுடையவராக ஓங்கி இருப்பார்கள்‌. பின்னர்‌ வானவர்களோடு சேர்ந்து வாழ்வார்கள்‌.