திருமுதுகுன்றம்

சிவபெருமானை, நமது மெய்யினால்‌ அறியப்படும்‌ அறு சுவைகளாலும்‌, ஏழிசைகளாலும்‌, எண்‌ குணங்களினாலும்‌, எல்லோராலும்‌ விரும்பப்‌ பெறும்‌ நான்கு வேதங்களாலும்‌ அறிய இயலாது. அவன்‌ தெளிவான மனத்தால்‌ அறியப்படும்‌ பளிங்கு போன்றவன்‌. அவன்‌ உமையம்மையை பாகமாக உடையவனும்‌ ஆறு சமயத்தினராலும்‌ மாறுபாடின்றி ஏற்றுக்‌ கொள்ளப்பெறும்‌ ஒரே தலைவன்‌ ஆவான்‌. அப்பெருமான்‌ விரும்பி அமர்ந்திருக்கும்‌ ஊர்‌ திருமுதுகுன்றம்‌ ஆகும்‌. இத்தலத்தில்‌ தெளிந்த நீர்‌ நிறைந்த மணிமுத்தாறு நதியானது, மலையில்‌ உள்ள மூங்கில்கள்‌ உதிர்க்கும்‌ முத்துக்களை வாரிக்கொண்டு வந்து கரையில்‌ குவிக்கின்றது.

தேன்‌ மணம்‌ நிறைந்த கூந்தலை உடைய உமையம்மையுடன்‌ வேடன்‌ உருவத்தை எடுத்து, அருச்சுனன்‌ தவம்‌ புரியும்‌ கொடிய காட்டிற்குச்‌ சென்று, அவனுடன்‌ போர்‌ செய்து, அவனுடைய பொறுமையை அளந்து பின்னர்‌ அவனுக்குப்‌ பாசுபதத்தை விரும்பி அளித்த பழையோன்‌ சிவபெருமான்‌ ஆவான்‌. இப்பெருமானின்‌ கோயில்‌ திருமுதுகுன்றம்‌ ஆகும்‌. இத்தலத்தில்‌ மழையினால்‌ செழித்த மணமுடைய சோலைகளில்‌ கனிகளும்‌ பலவித மலர்களும்‌ உதிர்கின்றன. நீர்‌ நிலைகளைப்‌ பொருந்தி குளிர்ச்சியானதும்‌ வலிமையானதுமான தென்றல்‌ காற்று அழகிய வீடுகள்‌ தோறும்‌ புகுந்து உலவும்‌ இயற்கை வளம்‌ உடையது திருமுதுகுன்றம்‌ ஆகும்‌.

தக்கன்‌ செய்த பெரிய வேள்வியில்‌ சந்திரன்‌, இந்திரன்‌, எச்சன்‌, சூரியன்‌, அக்கினி, பிரமன்‌ ஆகியவர்களை முறைப்படி வீரபத்திரனைக்‌ கொண்டு தண்டனை கொடுத்த விமலன்‌ சிவபெருமான்‌ ஆவான்‌. இப்பெருமானின்‌ கோயில்‌ திருமுதுகுன்றம்‌ ஆகும்‌. இத்தலத்தில்‌ முக்கனிகளான இனிய மாங்கனிகள்‌ வளமான பலாக்கனிகள்‌ வாழைக்களனிகள்‌ ஆகியவற்றின்‌ சாறு நீண்ட வயல்களில்‌ ஒழுகி விழுகின்றன. அதனால்‌ வயல்கள்‌ அவைகளின்‌ சேறு உலராதவைகளாக இருக்கின்றன. இங்குள்ள சோலைகளில்‌ உள்ள கமுக மரங்களிலும்‌ தென்னை மரங்களிலும்‌ குலைகள்‌ நிறைந்துள்ளன. இத்தகைய செழுமை நிறைந்த ஊர்‌ திருமுதுகுன்றம்‌ ஆகும்‌.

கொடுமை மிகுந்த முப்புரங்களில்‌ வாழும்‌ அசுரர்கள்‌ செய்யும்‌ தீமைகளால்‌, தங்களின்‌ வலிமை இழந்தனர்‌ தேவர்கள்‌. பிரமனும்‌, இந்திரனும்‌, திருமாலும்‌ மற்றுமுள்ள தேவர்களும்‌ சிவபெருமானிடம்‌ சென்று தங்களைக்‌ காத்தருள வேண்டினர்‌. இப்பெருமான்‌, தேவர்களைத்‌ தேராகவும்‌, மேகங்கள்‌ தவழும்‌ மேரு மலையை வில்லாகவும்‌, வாசுகி என்னும்‌ பாம்பை நாணாகவும்‌, திருமால்‌, அக்கினி, வாயு ஆகியோரை அம்பாகவும்‌ கொண்டு அசுரர்களின்‌ மும்மதில்களை ஒரு நொடிப்‌ பொழுதில்‌ பொடி செய்தார்‌. எல்லோருக்கும்‌ தலைவனான இப்பெருமானின்‌ இடம்‌ திருமுதுகுன்றம்‌ ஆகும்‌.

மேகலை என்னும்‌ அணிகலன்‌ பொருந்திய அல்குலையும்‌ முத்துவடம்‌ முதலியவை அணிந்த மேனியை உடையவளான உமையம்மையை ஒருபாகமாகவும்‌, தனது பாகத்தில்‌ மானின்‌ தோலை இகழாது உடுத்தியிருக்கும்‌ ஒப்பற்ற சிவபெருமானின்‌ இருப்பிடம்‌ திருமுதுகுன்றம்‌ ஆகும்‌. இத்தலத்தில்‌ ஊரின்‌ நடுவே உயர்ந்த மூங்கில்‌ மேல்‌ அமர்ந்திருக்கும்‌ பெண்‌ குரங்கானது மழை வருகின்றதைக்‌ கண்டு பயந்து தன்‌ குட்டியுடன்‌ மலைக்‌ குகையில்‌ ஒதுங்குகின்றது. வளமையான மலைச்‌ சாரலில்‌ பெரிய யானைகள்‌ இரை தேடித்‌ திரிகன்றன. இவ்வாறு மழை வளமும்‌, மலை வளமும்‌ உடையது திருமுதுகுன்றம்‌ ஆகும்‌.

சிரித்தலைப்‌ பொருந்திய வெண்மையான தலைமாலை அணிந்த நாதனாகிய சிவபெருமானின்‌ இருப்பிடம்‌ திருமுதுகுன்றம்‌ ஆகும்‌. இத்தலத்தில்‌ மணிமுத்தாறு நதியானது மலையில்‌ விளையும்‌ பொருட்களை வாரிக்‌ கொண்டும்‌ தனது இருகரைகளையும்‌ உடைத்துக்‌ கொண்டும்‌ வருகின்றது. அது நெற்கதிர்களும்‌, கழுநீர்‌ மலர்களும்‌, குவளை மலர்களும்‌ சாய்ந்து போகுமாறு வேகமாகப்‌ பாய்ந்து தாமரைகள்‌ மலர்ந்த வயலைத்‌ தழுவும்‌. இத்தகு நீர்வளமும்‌ நிலவளமும்‌ உடையது திருமுதுகுன்றம்‌ ஆகும்‌.

ஆலமரத்தின்‌ கீழ்‌ வீற்றிருந்து, அறநெறிகள்‌ விளங்கும்‌ நான்கு வேதங்களையும்‌ சனகாதியருக்கு அருளியவர்‌ சிவபெருமான்‌ ஆவான்‌. தேவர்களின்‌ வேண்டுகோளுக்கு இணங்கி சிவந்த தாமரை மலர்‌ மேல்‌ வீற்றிருக்கும்‌ பிரமனின்‌ ஐந்து தலைகளில்‌ ஒன்றைக்‌ கொய்த நிமலனான சிவபெருமான்‌ உறையும்‌ கோயில்‌ திருமுதுகுன்றம்‌ ஆகும்‌. இத்தலத்தில்‌ குறவர்‌ குடிச்‌ சிறுமியர்கள்‌ ஆற்றில்‌ மாணிக்கங்களும்‌ முத்துக்களும்‌ வருவதைக்‌ காணுகின்றனர்‌. அவற்றை முறங்களால்‌ வாரி எடுக்கின்றனர்‌. மணிகளைப்‌ புடைத்து விலக்கி முத்துக்களைச்‌ சிறு உலைகளில்‌ கொட்டி சிற்றில்‌ இழைத்து விளையாடி மகிழும்‌ ஊராகும்‌.

கதிரவன்‌ போன்ற ஒளியை உடைய நீண்ட மகுடங்களைத்‌ தனது பத்துத்‌ தலைகளில்‌ சூடியிருப்பவன்‌ இராவணன்‌ ஆவான்‌. இவன்‌ தனது கண்களும்‌, வாயும்‌ தீக்கனலை கக்குவதுபோல்‌ சினம்‌ கொண்டு பெரிய கயிலை மலை நிலை பெயருமாறு பெயர்த்தான்‌. அப்போது மதில்கள்‌ சூழ்ந்த அளகாபுரிக்குத்‌ தலைவனான குபேரன்‌ மகிழுமாறு, சிவபெருமான்‌ தமது மலர்போன்ற மென்மையான திருவடியை ஊன்றி இராவணனைத்‌ தண்டித்தார்‌. பின்னர்‌ அவன்‌ மறைபாடித்‌ துதித்தான்‌. அவனுக்கு சிவபெருமான்‌ ஒளிமிகுந்த வாளை முன்னின்று தந்தார்‌. இப்பெருமான்‌ எழுந்தருளி இருக்கும்‌ தலம்‌ திருமுதுகுன்றம்‌ ஆகும்‌.

தாமரை மலரைத்‌ தனது ஆசனமாகக்‌ கொண்டவன்‌ பிரமன்‌ ஆவான்‌. திருமால்‌ அழகிய துளசி மாலையை அணிந்தவன்‌. இவர்கள்‌ அன்னமாகவும்‌, பன்றியாகவும்‌ உருமாறி, உயர்ந்த வானத்திலும்‌ தாழ்ந்த பூமியிலும்‌ தேடியும்‌ காண இயலாத தெய்வ ஒளி பொருந்திய திருஉருவை உடையவர்‌ சிவபெருமான்‌. இப்பெருமான்‌ எழுந்தருளிய மலை திருமுதுகுன்றம்‌ ஆகும்‌. இத்தலமானது, ஊழிக்‌ காலத்தில்‌ உலகத்தை மூடுமாறு ஆரவாரத்துடன்‌ வந்த கடல்‌ நீரானது, கீழே தாழ்ந்து போகுமாறும்‌ தான்‌ மேலே உயர்ந்து நின்றதுமான திருத்தலம்‌ ஆகும்‌.

உடம்பில்‌ துவர்‌ ஆடை அணிந்த புத்த மதத்தினரும்‌, விரிந்த ஓலைத்‌ தடுக்கை உடையாகக்‌ கொண்ட சமணர்களும்‌ தங்களின்‌ உடலை மட்டுமே பேணுபவர்கள்‌ ஆவர்‌. நட்பு கொள்ள இயலாதவரான அவர்களின்‌ சொற்களைக்‌ கேளாதீர்கள்‌. தொண்டர்களே! நீங்கள்‌ ஞானிகளாக உள்ளவர்களும்‌, நான்மறையை உணர்ந்தவர்களும்‌, ஐம்புலன்களை வென்ற மெளனிகளும்‌, முனிவர்களான செல்வர்களும்‌ தனித்திருந்து தவம்‌ புரியும்‌ திருமுதுகுன்றத்தை உள்ளத்தில்‌ உணர்ந்து உய்வீர்களாக!

ஆரவாரத்துடனும்‌ நீர்‌ நிறைந்தும்‌ வருகின்ற மணிமுத்தாறு வலம்‌ வந்து வணங்கும்‌ திருமுதுகுன்றத்தின்‌ இறைவனான சிவபெருமானை, என்றுமே மூப்பு அடையாததும்‌, பன்னிரண்டு பெயர்களை உடையதுமான கழுமலப்‌ பதியில்‌ முத்து வேட்கும்‌ தொழிலை உடைய தமிழ்‌ ஞானசம்பந்தன்‌ போற்றிப்‌ பாடினார்‌. இப்பதிகப்‌ பாடல்களை அதற்குப்‌ பொருந்தும்‌ இசையுடன்‌ இயன்ற அளவு பாடி வழிபட வல்லவர்‌, நீடுலகத்தை ஆட்சி செய்வார்‌.