திருவையாறு

ஐம்புலன்களும்‌ தமது பொறிகளின்‌ இயல்பில்‌ இருந்து வழிமாறி, அதற்குரிய அறிவையும்‌ இழந்து, பித்தம்‌, வாயு, சிலேத்துமம்‌ என்ற நாளங்களின்‌ மாறுபாட்டால்‌ ௧பம் பெருகி, மனம்‌ நிலையற்று வருந்தும்‌ மரண காலத்திலும்‌ ‘அஞ்சேல்‌’ என்று அருள் செய்பவன்‌ சிவபெருமான்‌ ஆவான்‌. இப்பெருமான்‌ அமர்ந்திருக்கும்‌ கோயில்‌ திருவையாறு ஆகும்‌. நடனக்கலையில்‌ வல்ல பெண்கள்‌ நடனம்‌ ஆடுகின்றனர்‌. அவ்வாடலுக்கு ஏற்றவாறு ‌ முழவுகள்‌ அதிர்கின்றன. அவற்றைக்‌ கேட்ட சில மந்திகள்‌ அதை இடிமுழக்கம்‌ என அஞ்சி, மரங்களில்‌ ஏறி மேகங்களைப்‌ பார்க்கின்றன. இத்தகைய வளம்‌ பொருந்தியது திருவையாறாகும்‌.

கொல்லும்‌ தன்மை வாய்ந்த படத்தினை உடைய நாகத்தை அரையினில்‌ கட்டியிருப்பவரும்‌, மலையரசன்‌ மகளான பார்வதிதேவியோடு வலிமையான விடையின்மீது ஏறியிருப்பவரும்‌, சிவபெருமான்‌ ஆவார்‌. அவர்‌ ‘அழகிய சொற்களைப்‌ பேசும்‌ மகளிரே! பிச்சையிடுங்கள்‌!' என்று பலி கேட்பவர்‌. இப்பெருமானின்‌ கோயிலை உடையது திருவையாறாகும்‌. இத்தலத்தில்‌, வளைந்த மூக்கினை உடைய கடல்‌ சங்குகள்‌ அலைகள்‌ வாயிலாக காவிரி ஆற்றுடன்‌ வருகின்றன. அவைகள்‌ இரவு நேரத்தில்‌ மேடுகளில்‌ ஏறி, செழுமையான முத்துக்களை ஈனுகின்றன.

சிவபெருமான்‌, மண்டை ஓட்டை மாலையாக அணிந்திருப்பவர்‌. கயிலை மலையில்‌ உறைபவர்‌. திருக்கானப்பேர்‌ என்னும்‌ தலத்தில்‌ உறைபவர்‌. உமை பங்காளர்‌. முத்தலைச்‌ சூலப்படையை ஏந்தியிருப்பவர்‌. விடை ஊர்தியை உடையவர்‌. இத்தகைய பெருமான்‌ எழுந்தருளிய கோயில்‌ திருவையாறு ஆகும்‌. இத்தலத்தில்‌ சிவந்த கால்களை உடைய வெண்ணிறக்‌ குருகுப்‌ பறவைகள்‌ தேன்‌ நிறைந்த சோலைகளில்‌ நுழைகின்றன. தமது கூரிய அலகுகளால்‌ இறகுகளைக்‌ கோதி குளிரை நீக்குகின்றன. அந்தப்‌ பசுமையான சோலைகளில்‌ தமக்கு வேண்டிய இரைகளைத்‌ தேடும்‌ திருவையாறாகும்‌.

ஊன்‌ பொருந்தியதும்‌ முடைநாற்றம்‌ உடையதுமான தலை ஓட்டைக்‌ கைகளில்‌ ஏந்தி ஊர்கள்தோறும்‌ சென்று பலியேற்று உழல்பவர்‌. உமை பங்கர்‌. பாய்ந்து செல்லும்‌ விடையேற்றை உடையவர்‌. நன்மைகளைச்‌ செய்வதனால்‌ சங்கரன்‌ என்னும்‌ பெயரை உடையவர்‌. தழல்‌ உருவினர்‌. இத்தகையப்‌ பெருமைகளை உடைய சிவபெருமான்‌ தங்கியிருக்கும்‌ கோயில்‌ திருவையாறு ஆகும்‌. இத்தலத்தில்‌ மான்கள்‌ துள்ளிப்‌ பாய வயலின்‌ அருகே உள்ள மரங்களில்‌ ஏறி மந்திகள்‌ பாய, அதில்‌ இருக்கும்‌ தேன்‌ கூடுகளில்‌ இருந்து தேன்‌ ஆற்றில்‌ பாய, அதனால்‌ மீன்கள்‌ துள்ளி தாமரை மொட்டை, மலர வைக்கின்றன. இத்தகைய இயற்கை வளத்தை உடையது திருவையாறு ஆகும்‌.

கங்கை நதி, வில்வம்‌, பிறைமதி, வெள்ளெருக்கு, கொன்றை மலர்கள்‌ நிறைந்த மாலை, குளிர்ச்சியான கரந்த மலர்‌: ஆகியவற்றை அணிந்திருக்கும்‌ தத்துவனானவன்‌ சிவபெருமான்‌ ஆவான்‌. இப்பெருமான்‌ தங்கியிருக்கும்‌ கோயில்‌, திருவையாறு ஆகும்‌. இத்தலத்தில்‌ நிறைந்துள்ள பொழில்களின்‌ நறுமணம்‌, மேக மண்டலம்‌ வரை உயர்ந்து வானத்தை அளந்து பரவிநிற்கின்றது. தேர்‌ ஓடும்‌ வீதிகளில்‌ மணம்‌ கமழும்‌ வீடுகள்‌ உள்ளன. வீதிகளில்‌ உள்ள அரங்குகளில்‌ அணிகலன்களை அணிந்த இளம்‌ பெண்கள்‌ நடனம்‌ ஆடுகின்றனர்‌. இத்தகு மகிழ்ச்சியான மக்கள்‌ வாழும்‌ தலம்‌ திருவையாறாகும்‌.

அனைத்து உலகங்களுக்கும்‌ அரசன்‌ ஆனவன்‌. விண்ணவர்களுக்கும்‌ மண்ணவர்களுக்கும்‌ நல்ல நெறியைக்‌ காட்டும்‌ வள்ளல்‌ சிவபெருமான்‌. மணம்‌ கமழும்‌ கொன்றை மாலையைச்‌ சடையில்‌ அணிந்த புண்ணிய வடிவினன்‌. இத்தகையப்‌ பெருமைகளை உடையவன்‌ சிவபெருமான்‌ ஆவான்‌. இப்பெருமான்‌ எழுந்தருளி இருக்கும்‌ கோயில்‌ திருவையாறு ஆகும்‌. இத்தலத்தில்‌ பெண்கள்‌ காந்தாரப்‌ பண்‌ அமைந்த இசையைப்‌ பாடுகின்றனர்‌. வீதிகளில்‌ அமைந்திருக்கும்‌ அழகிய அரங்களில்‌ ஏறி, அணிகலன்களை அணிந்திருக்கும்‌ இளம்‌ பெண்கள்‌, “தேம்‌, தாம்” என்ற ஒலிக்குறிப்போடு இசைக்கு ஏற்றவாறு நடனம்‌ ஆடுகின்றனர்‌.

நீண்ட வான வெளியில்‌ நின்று உலாவி தேவர்களை துன்புறுத்திய அசுரர்களின்‌ முப்புரங்களை, நீண்டதும்‌ கூரியதுமான அம்பு சென்று தைக்குமாறு கணை தொடுத்த வில்லாளன்‌. கயிலை மலையை உடையவன்‌. இத்தகு பெருமைகளை உடைய சிவபெருமான்‌ சேர்ந்து இருக்கும்‌ கோயில்‌ திருவையாறு ஆகும்‌. இத்தலத்தில்‌ உள்ள குன்றுகளில்‌ குயில்கள்‌ கூவுகின்றன. தென்றல்‌ காற்று தேன்‌ நிறைந்து மலர்களைத்‌ தீண்டி வருவதால்‌ மணம்‌ நிறைந்து வீசுகின்றது. அத்தென்றல்‌ அடிவருட அவற்றால்‌ செழுமையான கரும்புகள்‌ கண்‌ வளரும்‌ வளமுடையது திருவையாறாகும்‌.

கயிலை மலையை சிறிதும்‌ பயம்‌ இன்றி அரக்கர்‌ தலைவனான இராவணன்‌ எடுத்தான்‌. அவனுடைய பத்துத்‌ தலைகளையும்‌ வலிமையான தோள்களோடு நெரியுமாறு அடர்த்தவர்‌ சிவபெருமான்‌ ஆவார்‌. பின்னர்‌ அவனுக்கு அருள்‌ புரிந்தவரும்‌ அவரே. இப்பெருமான்‌ எழுந்தருளிய கோயில்‌ திருவையாறு ஆகும்‌. இத்தலத்தில்‌ இனிய நிழலைத்‌ தரும்‌ தென்னை மரத்தில்‌ இருந்து காய்ந்த நெற்று கீழே விழுகின்றது. அதனைக்‌ கண்டு பயந்த எருமையின்‌ கன்று, ஓடிச்‌ சென்று செந்நெற்கதிர்களைக்‌ காலால்‌ மிதித்துச்‌ செழுமையான தாமரை மலர்கள்‌ களையாகப்‌ பூத்திருக்கும்‌ வயல்களைச்‌ சென்றடைகின்றது. இத்தகு இயற்கை வளமுடையது திருவையாறு ஆகும்‌.

நான்முகனும்‌, திருமாலும்‌ முறையே அன்னமாய்‌ மேலே பறந்து வானத்தில்‌ கலந்தும்‌, அகன்ற நிலத்தைப்‌ பன்றியாக ஆழமாக அகழ்ந்தும்‌ மிகுந்த முயற்சியோடு தேடியும்‌ அறியமுடியாதபடி ஓங்கி நின்றவர்‌ சிவபெருமான்‌ ஆவான்‌. இப்பெருமான்‌ நிலைபெற்று இருக்கும்‌ கோயில்‌ திருவையாறு ஆகும்‌. இத்தலத்தில்‌ தங்கள்‌ கைகளில்‌ அபிநயக்‌ கோலுடன்‌ கூத்தர்கள்‌ நிற்க, திரண்ட வளையல்களை அணிந்த மகளிர்‌ கூத்தாடுகின்றனர்‌. திரண்ட தனங்களை உடைய அம்மகளிர்களின்‌ கண்கள்‌ சேல்மீன்களைப்‌ போல்‌ அசைந்தாடுகின்றன. அவர்களின்‌ வில்‌ போன்ற புருவங்கள்‌ மேலும்‌ கீழுமாக அசைகின்றன. இவ்வாறு கலைகள்‌ மலிந்த ஊர்‌ திருவையாறு ஆகும்‌.

இழி செயல்களில்‌ ஈடுபடுவோராய்‌, சிறிய ஆடையுடன்‌ திரியும்‌ சமணர்களும்‌, புத்தர்களும்‌ சொல்கின்ற நன்மைகள்‌ இல்லாத சொற்களையும்‌, வஞ்சனை உடைய உரைகளையும்‌ கேளாதீர்கள்‌. தொண்டர்களே! நீவிர்‌ எம்பெருமானுக்கு ஆட்படுவீர்களாக. எண்‌ தோள்களையும்‌ முக்கண்களையும்‌ உடைய எம்‌ ஈசனாகிய சிவபெருமான்‌ இனிதாக எழுந்தருளி இருக்கும்‌ கோயில்‌ திருவையாறாகும்‌. இத்தலத்தில்‌ பூக்களைச்‌ செண்டுகள்போல்‌ உருட்டி ஆட்டிக்‌ கொண்டு வரும்‌ நீர்நிறைந்த காவிரி ஆறு, செழுமையான மணிகளையும்‌ கரையில்‌ கொண்டு வந்து சேர்க்கின்றது.

அன்னப்‌ பறவைகள்‌ நிறைந்த பொழில்கள்‌ சூழ்ந்து விளங்கும்‌ திருவையாற்றுப்‌ பெருமானை, அழகிய குளிர்ந்த சீகாழிப்‌ பதியில்‌ வாழ்பவனும்‌, சிறப்பு மிக்க வேதங்களில்‌ சிறந்து விளங்குபவனுமான ஞான சம்பந்தன்‌ போற்றிப்‌ பாடிய இனிமையான இசையால்‌ அமைந்துள்ள இந்தப்‌ பத்துப்‌ பாடல்களை ஓதி, ஈசனைப்‌ போற்றிப்‌ பாடுபவர்கள்‌ தவ நெறியின்‌ பயனாக அமரர்‌ உலகத்தைத்‌ தாமதியாது புகழுடன்‌ எய்துவர்‌.