திருக்கழுமலம்

விடை வடிவம்‌ எழுதி உயர்த்திய வலிமையான கொடியை உடைய சிவபெருமானின்‌ திருவடிகளே நமக்குச்‌ சரண்‌ என்று தன்‌ நாவினில்‌ பொருந்திய கலைமகளுடன்‌ இணைந்து நான்முகனான பிரமன்‌ சிறந்த அன்போடு வழிபட்ட கோயில்‌ திருக்கழுமலம்‌ ஆகும்‌. இங்குள்ள வாவிகளில்‌ மலரும்‌ தாமரை மலர்கள்‌ மகளிர்தம்‌ முகங்களைப்‌ போலவும்‌, செம்மையான குமுத மலர்கள்‌ அவர்களின்‌ வாய்களைப்‌ போலவும் காவி மலர்கள்‌, கருங்குவளை மலர்கள்‌ மற்றும்‌ கரிய நெய்தல்‌ மலர்கள்‌ ஆகிய இவைகள்‌ அவர்களின்‌ கண்களைப்‌ போலவும்‌ தோன்றி மலரும்‌ வளத்தை உடையது கழுமலம்‌ ஆகும்‌.

அகன்ற விழிகளையும், பவளம் போன்ற சிவந்த வாயையும் உடைய பெருமைமிக்க மலைமகளாகிய உமையம்மையைப்‌ பிரியாத திருமேனியை உடையவன்‌ சிவபெருமான்.‌ அவன்‌ அருமையான திருவெண்ணீற்றுப் பொடியை அழகுறப் பூசியவன். தேவர்கள் தன்னை வணங்க அவன்‌ எழுந்தருளிய கோயில்‌ உள்ள இடம்‌ திருக்‌கழுமலம்‌ ஆகும்‌. இங்கு வள்ளல்‌ தன்மை மிகுந்த விசாலமான கைகளை உடைய அந்தணர்கள்‌, மூன்று விதமான அக்கினியை வளர்க்கின்றனர்‌. அத்தகைய வீடுகள்தோறும்‌ கரிய பெரிய கண்களை உடைய மகளிர்‌ தாங்கள்‌ கழற்சிக்‌ காய்‌ அம்மானை பந்து போன்ற விளையாட்டுக்களை ஆடும்போதும்‌ இறைவனின்‌ பெருமைகளைப்‌ பாடியே ஆடி மகிழ்கின்றனர்‌

மலர்‌ மாலைகள்‌ அணிந்த தேவர்களும்‌, அசுரர்களும்‌ அலைகள்‌ பொருந்திய திருப்பாற்கடலைக்‌ கடைந்தனர்‌. அப்பொழுது பஞ்ச பூதங்களும்‌ கலங்குமாறு எழுந்த கொடிய நஞ்சை சிவபெருமான்‌ வாயில்‌ போட்டுக்‌ கொண்டார்‌. இதனால்‌ கரிய மணி போன்ற கண்டத்தை உடையவரானார்‌. தனது உறைவிடம்‌ என்று மகிழ்வோடு கருதுகின்ற கோயில்‌ உள்ள இடம்‌ திருக்கழுமலம்‌ ஆகும்‌. மகர இராசியில்‌ சனிக்கோள்‌ புகுதலால்‌ மலையின்மேல்‌ தவழும்‌ மேகங்கள்‌ மழை பொழிதலை மறக்க உணவு கிடைக்காமல்‌ மக்கள்‌ பஞ்ச காலத்தில்‌ உடல்‌ இளைப்பர்‌. இப்படி ஒரு நிலைமை வந்தாலும்‌, மனம்‌ கலங்காது பெரிய வள்ளல்‌ தன்மையோடு மக்களைக்‌ காக்கும்‌ உண்மையாளர்‌ வாழ்கின்ற ஊர்‌ இக்கழுமலம்‌ ஆகும்‌.

அன்று மண்ணுலக மக்கள்‌ வருந்துமாறும்‌, தேவர்கள்‌ அச்சம்‌ கொள்ளுமாறும்‌, வெற்றி. பெறும்‌ இயல்பினராய்‌ முப்புர அசுரர்கள்‌ கொடிய போரை நிகழ்த்தினர்‌. அவர்களின்‌ முப்புரங்களும்‌ அழிந்து போகுமாறு, ஒப்பற்ற வில்லை வளைத்த சிவபெருமான்‌ உறையும்‌ கோயில்‌ உள்ள இடம்‌ கழுமலம்‌ ஆகும்‌. இங்கு கச்சணிந்த மென்மையான தனங்களை உடைய மகளிர்‌ தங்கள்‌ மாளிகைகளின்‌ மேல்தளத்தில்‌ நின்று தம்‌ குழந்தைகளைப்‌ பாடிப்‌ பாராட்டுகின்றனர்‌. அந்த இசையை மேகங்கள்‌ தவழும்‌ வான்‌ வெளியில்‌ உலாவுகின்ற கந்தர்வர்கள்‌ கேட்டு மகிழ்கின்றனர்‌.

ஊர்ந்து செல்லும்‌ அரவு ஒளிவிடும்‌ திங்கள்‌, வன்னி, ஊமத்தமலர்‌, நீர்நிறைந்த கங்கை, சிரிக்கும்‌ கபாலம்‌ ஆகியன சேர்ந்து இருக்கும்‌ செஞ்சடையை உடைய சிவபெருமான்‌ எழுந்தருளியுள்ள கோயில்‌ உள்ள ஊர்‌ திருக்கழுமலம்‌ ஆகும்‌. இங்கு வெண்மையான சுதையால்‌ அமைந்த மாடவீடுகள்‌ அழகு பொருந்திய வெள்ளி மலைகள்‌ போன்று விளங்குகின்றன. அந்த வீடுகளை அலங்கரிக்கும்‌ மலர்களின்மேல்‌ கரிய வண்டுகள்‌ மொய்க்கின்றன. இத்தகு அழகுடன்‌ திகழ்வது கழுமலம்‌ ஆகும்‌.

எம்பெருமானின்‌ திருவடிகளை நினைந்து தீ நடுவில்‌ நின்றும்‌, மழைநீரில்‌ நின்றும்‌ தவம்‌ செய்பவர்கள்‌ பெரிய சதுரப்பாடு உடையவர்கள்‌. அவர்கள்‌ ‘மெய்ஞ்ஞானத்தை எங்களுக்கும்‌ தந்தருளுக’ என்று வேண்டி நிற்கின்றனர்‌. அவர்களுக்குப்‌ பெருமை மிக்க தன்‌ தோழமையை வழங்கி அருள்கின்றான்‌ எம்பெருமான்‌. அவன்‌ உறையும்‌ கோயில்‌ கழுமலத்தில்‌ உள்ளது. நெல்‌ அறுவடை செய்த வயலில்‌ முளைத்த தாமரை மலர்கள்‌ தேனைச்‌ சொரிகின்றன. வாளைமீன்கள்‌ அதனைக்‌ குடித்துக்‌ களிக்கின்றன. அந்தக்‌ களிப்பால்‌ வயற்கரைகளில்‌ நிற்கும்‌ கரும்புகள்‌ ஏற்றப்பட்ட பெரிய வண்டிகள்‌ மீது துள்ளிப்‌ பாயவும்‌, அவைகள்‌ நிலைபெயரவும்‌ கரும்புகள்‌ ஒடிகின்றன. இத்தகு வளத்தினை உடையது கழுமலம்‌ ஆகும்‌.

நிலம்‌, நீர்‌, நெருப்பு, காற்று, ஆகாயம்‌ என்பன ஐந்து பூதங்களாகும்‌. சுவை, ஒளி, ஊறு, ஓசை, நாற்றம்‌ என்பன ஐந்தும்‌ புலன்களாகும்‌. அவற்றுக்கு இடமான மெய்‌, வாய்‌, கண்‌, மூக்கு, செவி என்பன ஐந்து அறிவுப்‌ பொறிகளாகும்‌. நாக்கு, கால்‌, கை, கருவாய்‌, எருவாய்‌ என்பன ஐந்தும்‌ செயல்‌ கருவிகளாகும்‌. மனம்‌, புத்தி, சித்தம்‌, அகங்காரம்‌ என்பன உட்கருவிகள்‌ ஆகும்‌. இந்த இருபத்து நான்கு ஆன்ம தத்துவங்களாகவும்‌, அவற்றின்‌ பயனாகவும்‌, உருவமாகவும்‌, அருவமாகவும்‌ நிற்கின்றவரான சிவபெருமான்‌ எழுந்தருளிய கோயில்‌ உள்ள இடம்‌ திருக்கழுமலம்‌ ஆகும்‌. இங்கு தவம்‌ செய்ய முயல்வோர்‌ இறைவனை அர்ச்சிக்க மரங்களில்‌ பூத்த மலர்களைப்‌ பறிக்கின்றனர்‌. அதனால்‌ விடுபட்ட கிளைகள்‌ வேகமாக நிமிர்ந்து அருகில்‌ உள்ள மாமரத்தைத்‌ தாக்குகின்றன. மாமரத்தின்மீது விண்டு கவணிலிருந்து வீசும்‌ கற்களைப்‌ போன்று அங்கு காய்ந்த காய்கள்‌ சுனைகளில்‌ விழுகின்றன. இதனால்‌ அங்கு வீற்றிருக்கும்‌ பறவைகள்‌ அஞ்சி அகலுகின்றன. இத்தகைய வளத்தை உடையது கழுமலம்‌ ஆகும்‌.

வலிமை பொருந்திய தேவர்கள்‌ பலரை அழித்து உலகை அச்சுறுத்தித்‌ திரிந்தவன்‌ அரக்கர்‌ தலைவனான இராவணன்‌ ஆவான்‌. இவனின்‌ வலிமை மிக்க இருபது தோள்களையும்‌ தமது கால்‌ விரலால்‌ நெரிய ஊன்றி, பணி கொண்டார்‌ சிவபெருமான்‌. இப்பெருமான்‌ எழுந்தருளியுள்ள கோயில்‌ திருக்கழுமலம்‌ ஆகும்‌. நாற்று நட வந்த உழவர்கள்‌ ‘இவை நாற்று நடுவதற்கு இடையூறாக கற்கள்‌ போலத்‌ தோன்றுகின்றனவே' என்று கூறுகின்ற அளவுக்கு கடலில்‌ இருந்து வந்த சங்குகள்‌ முத்துக்களை வயல்களில்‌ ஈன்று குவிக்கின்ற வளத்தை உடையது இக்கழுமலம்‌ ஆகும்‌.

திருமகளின்‌ தலைவனான திருமாலும்‌, பிரமனும்‌ முறையே பன்றியும்‌ அன்னப்‌ பறவையும்‌ ஆகி தங்களால்‌ முடிந்த அளவு சென்றும்‌ சிவபெருமானின்‌ அடியும்‌ முடியும்‌ காண முடியாதவராகத்‌ தோல்வியுற்று நின்றனர்‌. இத்தகைய பெருமை கொண்ட சிவபெருமான்‌ அமர்ந்திருக்கும்‌ கோயில்‌ இருப்பது திருக்கழுமலம்‌ ஆகும்‌. இங்கு பல்வேறு பாக்களில்‌ அமைந்துள்ள அருங்கலைகள்‌ அறிந்த புலவர்கள்‌ பலவிதமான மலர்களைக்‌ கொண்டு அர்ச்சனை செய்து சிவபெருமானிடம்‌ பரவுகின்றனர்‌. அவர்களின்‌ முறையான விருப்பங்கள்‌ நிறைவேறுவதைக்‌ கண்டு மேலும்‌ களிகூர்ந்து அவர்கள்‌ பெருமானைப்‌ போற்றுகின்றனர்‌. இத்தகையோர்‌ வாழும்‌ இடம்‌ கழுமலம்‌ ஆகும்‌.

அறிவுத்‌ தெளிவு இல்லாத புத்தர்களும்‌, பொய்த்தவத்தை மெய்த்தவமாக எண்ணி, கையில்‌ உணவு ஏற்று உண்ணும்‌ சமணர்களும்‌ அறியவும்‌ உணரவும்‌ முடியாதவாறு நின்ற சிவபெருமான்‌ உறையும்‌ கோயில்‌ உள்ள இடம்‌ திருக்கழுமலம்‌ ஆகும்‌. இங்கு திருமண விழாவின்‌ எழும்‌ ஆரவாரமும்‌, திருவிழாக்களின்‌ ஒலியும்‌, பூவுலகில்‌ தேவர்கணங்கள்‌ ஓதும்‌ வேத ஒலியை மிஞ்சுமாறு ஒலிக்கின்றன.

கற்றுணர்ந்தவர்கள்‌ பணிந்து போற்றுகின்ற கழுமலத்துள்‌ விளங்குகின்றான்‌ சிவபெருமான்‌. அவனுடைய திருவடிகளை விரும்பி, நல்லோர்க்கு நல்துணையாகும்‌ பெருந்தன்மையுடைய ஞானசம்பந்தன்‌ இப்பதிகத்தைப்‌ பாடினார்‌. ஓதுவார்களுக்குத்‌ துணையாய்‌ அமைந்த சொற்றொடர்கள்‌ உடையது இப்பாடல்கள்‌. உலகம்‌ முழுவதையும்‌ அரசாளும்‌, முக்கண்களை உடைய சிவனடியைச்‌ சேர முயற்சிப்பவர்கள்‌ திருமகளின்‌ துணை கொண்டு இப்பாடல்களைப்‌ பாடுவார்கள்‌.