திருக்கழுமலம்

வினைவயத்தால்‌ பந்தப்பட்டு மண்ணுலகம்‌ வந்து எல்லா இடங்களிலும்‌ பொருந்தி, அவ்விடமே தமக்கு இருப்பிடமாய்‌ வாழும்‌ தேவர்களும்‌, காடுகளில்‌ வாழும்‌ முனிவர்களும்‌ தங்கள்‌ மனத்தால்‌, சிவபெருமானாரை ஆழ்ந்து தியானிக்கின்றனர்‌. இப்பெருமான்‌ சிலம்பினை அணிந்துள்ள உமையம்மையுடன்‌ நாளும்‌ நாளும்‌ நீண்டு உயர்ந்த திருக்கயிலை மலையில்‌ எழுந்தருளுகின்றார்‌. இந்தத்‌ திருக்கோலக்‌ காட்சிகளைப்‌ பெருங்கருணையோடு இப்பெருமான்‌ அருளுவது எதற்கு என்றால்‌, இவ்வுலகத்து மக்கள்‌ தங்கள்‌ கண்களால்‌ நேரிலேயே தம்மைக்‌ காணும்‌ சிறப்பினைப்‌ பெறுவதற்காகவே! இந்தக்‌ காட்சியைக்‌ கண்டு தாம்‌ எடுத்தப்‌ பிறவியின்‌ பயனை அடைந்து தகவினைப்‌ புரியும்‌ இறைவனது இடம்‌ எது என்றால்‌, அது, வளமையான கழுமலம்‌ என்ற சீகாழிப்பதி ஆகும்‌. இந்த நகரம்‌ எட்டுத்‌ திசைகளிலும்‌ மணம்‌ கமழ்ந்து விளங்கும்‌ மலர்களை உடைய சந்தனக்‌ காடுகள்‌ நிறைந்து செழிக்கும்‌ புகழ்‌ பெற்ற நகரமாகும்‌.

சிவபெருமான்‌ பிச்சை ஏற்பதை விரும்புகின்றவர்‌. திருவெண்ணீற்றை நீரில்‌ குழைத்துப்‌ பூசியிருப்பவர்‌. மிகுந்த பெருமை பொருந்தியவர்‌. புகழால்‌ விரிந்திருப்பவர்‌. பிறை போன்ற நெற்றியை உடைய உமையம்மையை இடப்பாகத்தில்‌ கொண்டிருப்பவர்‌. உச்சப்‌ பொழுதினை விரும்பி விடையேற்றின்மீது அமர்ந்து, ஊர்ந்து ஊர்ந்து, சிவந்த கண்களுடன்‌ ஊர்களில்‌ உள்ள நீண்ட வீதிகளில்‌ இசை பாடிக்கொண்டு திரிபவர்‌. இவ்விதம்‌ செய்வதால்‌, நச்சுதலுக்குரியனவும்‌ முத்து வடங்கள்‌ அணிந்தனவுமாகிய கொங்கைகளை உடைய மகளிர்‌ விருப்பத்தோடு அந்த இசையைக்‌ கேட்டு வந்து, தமக்கு முன்னே விரக மயக்கம்‌ கொள்ளுமாறு வசீகரிக்கும்‌ வன்மை பொருந்திய சிவபெருமான்‌ எழுந்தருளி இருக்கும்‌ இடமானது, மேலைக்‌ காற்றினால்‌ பூக்களோடு கலந்து விளங்கும்‌ வண்டினங்களோடு கருமை நிறம்‌ படிந்த மேகங்கள்‌ தவழும்‌ நீண்ட சோலைகளால்‌ நிறைந்த வளமையான கழுமலம்‌ என்ற சீகாழி நகரமாகும்‌.

சிவபெருமான்‌, பிறைச்சந்திரன்‌, தும்பை, விளங்கும்‌ ஊமத்தம்பூ ஆகியவற்றுடன்‌, தெளிந்த நீரை உடைய கங்கை நதியையும்‌ தமது திருக்கரத்தில்‌ ஏந்தாமல்‌, தமது திருமுடியில்‌ சூடியுள்ளார்‌. அத்துடன்‌ உடைந்த கபாலத்தின்‌ பக்கத்தில்‌, பிரமன்‌ தனது அஞ்ஞான மயக்கத்தால்‌ எடுத்த அன்னத்தின்‌ இறகு, நஞ்சு பொங்கும்‌ பாம்பு, கொன்றை மலர்‌ மாலை ஆகியன அணிந்து விளங்கும்‌ சடையையும்‌ உடையவர்‌. இப்பெருமான்‌ எழுந்தருளியிருக்கும்‌ இடமானது, கங்கைக்கு நிகரான புனிதத்துடன்‌, அழகுடன்‌ கலந்து வந்த பொன்னியாகிய காவிரி நதியின்‌ வாய்க்கால்கள்‌ வழியாகப்‌ பாயும்‌ நீரினால்‌, வளம்‌ சேர்க்கும்‌ கழுமலம்‌ என்ற நகரமாகும்‌.

முப்புரத்தில்‌ உள்ள அசுரர்கள்‌, இம்மண்ணுலகில்‌ இருந்து கொண்டே எண்திசைகளையும்‌ உள்ளடக்கி அனைத்து உலகங்களுக்கும்‌ சென்று, அவைகளையும்‌ வெற்றி கொண்டனர்‌. வான்‌ உலகை ஆளும்‌ தேவர்களையும்‌ நெருங்கிச்‌ சென்று வெற்றிப்‌ போர்‌ செய்தனர்‌. அத்தேவர்களாலும்‌ எதிர்க்க இயலாத இந்த அசுரர்களின்‌ பலம்‌ மிகுந்த முப்புரத்தைத்‌ தனது நெற்றிக்‌ கண்ணால்‌ வெந்து இடிந்து, அழிந்து போகுமாறு செய்தவர்‌ சிவபெருமானாகும்‌. இப்பெருமான்‌ முதுமை உடைய வில்‌ அழியுமாறு சினந்தவர்‌. அந்த இஞ்சி சூழ்ந்த அழியாத பழமையான மூன்று ஊர்களும்‌ இவர்‌ எழுந்தருளி இருக்கும்‌ இடமானது மதில்கள்‌ சூழ்ந்ததும்‌, என்றும்‌ முதுமை அடையாததும்‌, இன்றும்‌ முதுமையாகாமல்‌ இருக்கும்‌ கழுமலம்‌ என்ற சீகாழி ஆகும்‌. இந்த நகரமானது, செம்மையான சொற்களைக்‌ கொண்டு, தேர்ந்து தொடுத்த மந்திரங்களை மூச்சுக்காற்றாகக்‌ கொண்டு உருவேற்றி வாழும்‌ சான்றோர்களைக்‌ கொண்டுள்ள வளமையான நகரமாகும்‌.

எட்டுத்‌ திசைகளுக்கும்‌, காவலர்களாகிய அட்டதிக்குப்‌ பாலகர்கள்‌ ஆங்காங்கே இருந்து இம்மண்ணுலகைக்‌ காவல்‌ செய்கின்றனர்‌. இந்த மண்ணுலகை அழிப்பதற்குத்‌ தாருகன்‌ சீற்றமுடனும்‌, வீறு கொள்ளும்‌ எழுச்சியுடனும்‌ போர்த்தன்மையுடனும்‌ வந்தான்‌. அந்தத்‌ தாருகனை அவன்‌ எதிரிலேயே புகுந்து வெட்டி வீழ்த்தியவர்‌ சிவபெருமானாகும்‌. அப்பொழுது, புதைந்து எழுந்த ஊழித்‌ தீப்போல்‌ காளி தோன்றினாள்‌. ஐம்பூதங்களான மண்‌, நீர்‌, தீ, காற்று, ஆகாயம்‌ ஆகியவற்றை அழிக்கச்‌ சிவந்த கோபத்தோடு சொக்க நிருத்தத்தில்‌ நடனம்‌ ஆடி வந்த காளியின்‌ கோபத்தை இப்பெருமான்‌ அவளோடு எதிர்‌ நடனம்‌ ஆடி, அவளை வென்று இவ்வுலகத்தின்‌ துயரங்களைத்‌ துடைத்தார்‌. இப்பெருமான்‌ எழுந்தருளி இருக்கும்‌ இடமானது, பெரிய ஊழிக்‌ காலத்தில்‌ எரிவதற்கு வந்த தீயிலும்‌ அழியாமல்‌ பிழைத்ததும்‌, குளிர்ந்த காடுகள்‌ நிறைந்துள்ளதுமான வளமையான கழுமலம்‌ என்ற சீகாழி நகரமாகும்‌.

அசுரர்களாகிய சலந்தரன்‌, திரிபுராதிகள்‌ ஆகியவர்களைக்‌ கொன்று வெற்றி அடைந்த சிவபெருமான்‌, ஆண்‌ யானை வடிவங்‌ கொண்டார்‌. நீண்ட மாலை அணிந்த உமாதேவியார்‌ தன்னைச்‌ சேரும்‌ பொருட்டு பெண்‌ யானை வடிவம்‌ கொண்டார்‌. அதன்‌ விளைவாக ஒற்றைக்‌ கொம்பினை உடைய துதிக்கையும்‌, மூன்று கண்களையும்‌ இடைவிடாது மிகுந்து பொழியும்‌ மத நீரையும்‌, புள்ளிகளோடு கூடிய முகத்தையும்‌ உடைய வினாயகப்‌ பெருமான்‌ தோன்றினார்‌. அதனால்‌, இவ்வுலகில்‌ வாழும்‌ மக்களுக்குப்‌ பெரும்‌ துன்பங்களும்‌ நீங்காத நோய்களும்‌ வராமல்‌ காக்கப்பட்டது. இதனை நல்கிய பெருமான்‌ எழுந்தருளி இருக்கும்‌ இடமானது, அறுபத்தி நான்கு கலைகள்‌ முற்றும்‌ முடியக்‌ கற்று விளங்கவும்‌, கற்றவர்கள்‌ கற்றபடி நின்று ஒழுகி, சேர்ந்து உறைவதும்‌, அவ்வாறு செய்யாதவர்கள்‌ அடைய முடியாததுமான வளமையான கழுமலம்‌ என்ற நகரமாகும்‌.

பெருமையுடைய முத்தி நெறியை அடைய விரும்புபவர்கள்‌, அன்பாகிய விதையை மனதில்‌ ஊன்ற வேண்டும்‌. சுவை, ஒளி, ஊறு, ஓசை, நாற்றம்‌ என்ற ஐம்புலன்களின்‌ வழி ஒழுகாது தம்மைக்‌ காத்துக்‌ கொள்ள வேண்டும்‌. காமம்‌, குரோதம்‌, உலோபம்‌, மோகம்‌, மதம்‌, மாச்சரியம்‌ என்ற ஆறுவகை உட்பகை நீங்கும்படி செய்ய வேண்டும்‌. முத்திக்கு இடையூறாக இருக்கும்‌ முக்குணங்களான சத்துவம்‌, ராஜசம்‌, தாமசம்‌ ஆகியவற்றின்‌ வழி ஒழுகாது. நான்கு அந்தக்‌ கரணங்களான மனம்‌, புத்தி, சித்தம்‌, அகங்காரம்‌ ஆகியவற்றை ஒருநெறிப்படுத்திச்‌ சிந்தனையில்‌ விளங்கும்‌ மெய்ப்பரம்‌ பொருளாகிய தன்னையே எண்ணுபவர்களைத்‌ தானாகச்‌ செய்யும்‌ சிவபெருமான்‌ உறையும்‌ இடம்‌ எது என்றால்‌, அது, ஆறு வேதாங்கங்களையும் ஓதி உணர்ந்தவர்கள்‌ எக்காலத்திலும்‌ சிவம்‌ என்ற நற்பொருளைத்‌ தியானிக்கும்‌ கழுமலம்‌ என்ற வளமையான நகரம்‌ ஆகும்‌.

செம்புத்‌ தகடுகள்‌ வேய்ந்த மதில்கள்‌ சூழ்ந்ததும், பொழில்கள்‌ சேர்ந்ததும்‌, பசுமையான நீண்ட கடல்களின்‌ அலைகளால்‌ மோதப்‌ பெறுவதுமாகிய இலங்காபுரி இறைவனாகியவன்‌ இராவணன்‌ ஆவான்‌. இவன்‌, இவ்வுலக மனிதர்களுக்கு தீங்கு செய்தது மட்டுமன்றி, சிவபெருமான்‌ உறையும்‌ கயிலை மலையையும்‌ பெயர்க்க முற்பட்டான்‌. அப்பொழுது சிவபெருமான்‌ தமது அழகிய மலர்‌ போன்ற ஓர்‌ திருவடி விரல்‌ ஒன்றை ஊன்றி, அழகிய பொன்‌ அணிகலன்கள்‌ பூண்ட அவனது வெற்றி நிறைந்த தோள்‌ வலிமையை அழித்தார்‌. அவன்‌ தனது பிழையை உணர்ந்து பணிந்து வந்தனம்‌ செய்த அளவில்‌ அவனுக்கு அரிய கூரிய வாளையும்‌ நீண்ட வாழ்நாளையும்‌ அப்பொழுதே அருள்புரிந்தார்‌. இப்பெருமான்‌ உறையும்‌ இடமானது, கம்பத்தில்‌ கட்டப்பெற்ற யானைகளின்‌ வலிய கன்னங்கள்‌ முதலியன பொழிந்த மும்மதங்களால்‌ நிலம்‌, கரிய சேற்றுடன்‌ விளங்கும்‌ சிறந்த வீதிகளை உடைய கழுமலம்‌ என்ற வளமையான நகரம்‌ ஆகும்‌.

திருமால்‌ பன்றி உருவம்‌ எடுத்துப்‌ பூமியைத்‌ தோண்டிப்‌ பாதாளம்‌ வரைத்‌ தேடினான்‌. நீரில்‌ தோன்றிய தாமரை மலரில்‌ உறையும்‌ நான்முகன்‌ வேதங்களை ஓதுபவனாக இருந்தும்‌ அதன்‌ உண்மைப்‌ பொருளை உணராது அன்னப்‌ பறவை வடிவம்‌ எடுத்து வானவெளியில்‌ பறந்து சென்று தேடியும்‌ எதிரே தோன்றிய சிவபெருமானின்‌ அடியையும்‌ முடியையும்‌ காண முடியாமல்‌ அயர்ந்து சென்று பணிந்து வணங்கினர்‌. அவர்களின்‌ அழகிய பசுமையான கண்களுக்கு, அழகிய நீலகண்டத்தோடு தனது வல்லமையால்‌ வேறொரு உருவத்தைக்‌ காட்டிய இறைவன்‌ சிவபெருமானாகும்‌. இப்பெருமான்‌ உறையும்‌ இடம்‌ எது என்றால்‌, அது இல்லங்களில்‌ முன்றிலில்‌ ஆண்‌ கன்றுகள்‌ நிறைந்து கலந்து நின்று நிலைக்கும்‌, வயல்களில்‌ வாய்க்கால்களின்‌ வழியாக பாய்கின்ற நீர்‌ மேல்‌ ஏறிப்‌ பாயவும்‌ வளத்தால்‌ நிறைந்து விளங்கும்‌ கழுமல வள நகரம்‌ ஆகும்‌.

மண்டை என்ற உணவு உண்ணும்‌ தட்டை கையில்‌ ஏந்தியும்‌, வளைந்த கையில்‌ தடுக்கை இடுக்கி நின்று உண்டு ஆசைகளால்‌ தம்மைப்‌ பேணாது நாள்தோறும்‌ வருந்தி நிந்திப்பவர்கள்‌ சமணர்கள்‌. புத்தர்கள்‌ தங்களின்‌ விருப்பத்தின்படி, கேட்பவர்களுக்குத்‌ தெளிவு ஏற்படாதவாறு, இதனுடைய பொருள்‌ இது அல்ல, அது என பொருந்தாதபடி வாயில்‌ வந்தபடி கூறுகின்றனர்‌. இலைகள்‌ நெருங்கிய மருத மரத்தின்‌ பூவை அரைத்துச்‌ சாயம்‌ ஊட்டிய ஆடையைத்‌ தம்‌ உடலில்‌ சுற்றிக்‌ கொண்டு உடலை மறைப்பவர்கள்‌ இந்த புத்தர்கள்‌. இவர்களால்‌ உணர முடியாதவர்‌ சிவபெருமான்‌ ஆவார்‌. வெல்லக்‌ கட்டிகளைத்‌ தரும்‌ இனிய கரும்பை வெட்டுகின்ற காலத்து, அதிலிருந்து வடிகின்ற சாறானது, வாய்க்கால்‌ வழியே வந்து மேல்‌ஏறிப்‌ பாயும்‌ வளமுடைய கழுமல வளநகர்‌ இச்சிவபெருமானது இடம்‌ ஆகும்‌.

தாமரை மலரில் உள்ள தேனை குடித்துக் களித்த வண்டுகள் சண்பக மரச் சோலைகளில் உள்ள தேன் வண்டுகளோடு போரிடும் தன்மையை உடையது கழுலம் என்ற நகராகும். இங்கு வீற்றிருக்கும் இறைவரான சிவபெருமானை அடைக்கலமாகக் கொண்டு இருப்பவர் சண்பை நகரின் தலைவனும், தமிழ்‌ விரகனுமாகய ஞான சம்பந்தன்‌. இறைவனைப் பாடி அமைந்த தேனுக்கு நிகரான, பாடல்களைக்‌ கொண்டது இப்பதிகம்‌. தாமே இறைவன்‌ என்றதைப்‌ போன்ற நன்மைகைளைத்‌ தருவதாகும்‌. இப்பாடல்களின்‌ மொழிகள்‌ வார்க்கும்‌ தேன்போன்று எக்காலத்திலும்‌ குறைவின்றி எஞ்சி நிற்கக்‌ கூடியதாக விளங்கும்‌.இப்பதிகப்‌ பாடல்களை, நல்ல கலைகளில்‌ துறையபோய்த்‌ தமக்குத்‌ தாமே நிகராய்‌ பண்‌ முறையினால்‌, இயல்பான வஞ்சனை இன்றி அமைந்துள்ள இப்பதிகத்தை மனதில்‌ பெருவிருப்பம்‌ கொண்டு இசைப்பவர்களிடம்‌, தேவர்களின்‌ சிறப்பைக்‌ கொண்ட பிறை போன்ற நெற்றியினை உடைய திருமகள்‌ என்றும்‌ வாசம்‌ செய்வாள்‌.