திருவிடைமருதூர்

சிவபெருமான்‌ விரிந்த புலித்தோலை ஆடையாக இடையில்‌ கொண்டிருப்பவர்‌. வானில்‌ திரிந்துகொண்டு துன்பம்‌ செய்த முப்புரங்கள்‌ எரிந்து அழியுமாறு தனது ஆற்றல் மிகுந்த கணையை எய்தவர்‌. நெருப்புப்‌ போன்ற சிவந்த சடை முடியை உடையவர்‌. இப்பெருமான்‌ எழுந்தருளியிருக்கும்‌ இடை மருதூரை அடைய வேண்டும்‌ என்று நினைக்கும்‌ மனத்தினை உடையவர்களுக்கு மிகுந்த புகழ்‌ உண்டாகும்‌.

சிவபெருமான்‌ பெரிய அலைகள்‌ சுருண்டு வீசுகின்ற திருப்பாற்கடலில்‌ தோன்றிய விடத்தை விழுங்கி கண்டத்தில்‌ தடுத்து நிறுத்தியவர்‌. இப்பெருமான்‌, காவிரி ஆற்றின் அலைகள் கரைகளை முட்டுகின்ற இடைமருதூர்‌ என்னும்‌ தலத்தில்‌ எழுந்தருளியுள்ளார்‌ ‌இத்தலத்தின்‌ பெயரைச்‌ சொல்லுபவர்களை மூப்பினை உணர்த்தும்‌ தோல்‌ சுருக்கம் நரைமயிர்‌ ஆகியன அணுகாது. மீண்டும்‌ உலகில்‌ பிறந்து உணவை உண்டு உடலை வளர்க்கும்‌ பிறவியை எடுக்கமாட்டார்கள்‌ (பிறவாமை எய்துவர்‌).

சிவபெருமான்‌ சல சல என்று சொரியும்‌ கங்கையைச்‌ சடையில்‌ அணிந்தருப்பவர். த மலைமகளை ஒரு பாகமாகக்‌ கொண்டிருப்பவர்‌.நிறைவான வேதங்களை அருளி மொழிபவர்‌. உணவின்மையால்‌ பசியோடு உள்ளார்‌ என மகளிர்‌ இடும்‌ பலியை ஏற்பவர்‌. இப்பெருமான்‌ எழுந்தருளியுள்ள இடைமருதூரை வலம்‌ வர, வினைகளால்‌ வரும்‌ உடல் நலிவு இல்லாமற்‌ போகும்‌.

சிவபெருமான்‌ விடையூர்தியை உடையவர்‌. வெண்மையான தலையோட்டை உண்கலனாகக்‌ கொண்டு பலகாலம்‌ வீடுகள் தோறும்‌ சென்று, “பலி இடுக” என விரைந்து ‌செல்பவர்‌. மண்ணுயிர்களால்‌ இடைவிடாது தியானிக்கப்படுபவர்‌. இப்பெருமான்‌ இடைமருதூர்‌ என்னும்‌ நகருக்கு உரியவர்‌. இப்பெருமானின்‌ திருவடிகளைத்‌ தொழுவதே எமக்கு உயர்வைத்‌ தருவதாகும்‌.

சிவபெருமானார்‌ வார்த்தைகளால்‌ விவரிக்க இயலாத உருவத்தை உடையவர்‌. மனத்தால்‌ உணர்ந்து கொள்வதற்கு அரியவர்‌. இடையில்‌ பொருந்திய புலித்தோல்‌ ஆடையினர்‌. அதன்மேல்‌ இரையை விழுங்கும்‌ பாம்பை கச்சையாகக்‌ கட்டி இருப்பவர்‌. இப்பெருமான்‌ எழுந்தருளியுள்ள இடைமருதூரை உள்ளத்தில்‌ நினைந்து தியானிப்பவர்களுக்கு மிகந்த புகழ்‌ உளதாகும்‌.

சிவபெருமானின்‌ அழகிய சடைமுடியில்‌, வழிந்து ஒழுகும்‌ கங்கைநதி, இளம்பிறை பாம்பு ஆகியன உறைகின்றன. ஒலிக்கின்ற வீரக்கழல்‌ அணிந்துள்ள அழகர்‌ அவர். இப்பெருமான்‌ உறைகின்ற இடைமருதூரை மலர்‌ கொண்டு தொழுது போற்றுபவர்களின் மனதில்‌ துன்பம்‌ இல்லாதது ஆகும்‌.

சிவபெருமான் இன்னிசைக்‌ கலையை எழுப்பும்‌ வீணையை மீட்டுகின்ற விரலை உடையவர்‌.அழிக்கும்‌ தன்மையை உடைய மழு ஆயுதத்தோடு விளங்குபவர்‌.கங்கை உலாவும் சடைமுடியை உடையவர். மலைமகளின் முலைத்தழும்பு பொருந்திய வடிவத்தை உடையவர்‌. இலைவடிவான்‌ சூலத்தை ‌ ஏந்தியிருப்பவர். இப்பெருமான் எழுந்தருளியிருக்கும் தலம்‌ இடைமருதூர்‌ ஆகும்‌.

இராவணன்‌ முறையற்ற வலிய செயல்களைப்‌ போரில்‌ செய்பவன்‌. அத்தகைய வலிமையுடன்‌ அவன்‌ சிவபெருமான்‌ வீற்றிருக்கும்‌ கயிலை மலையைப்‌ பெயர்த்தான்‌. அவனின்‌ உடல்‌ வலிமையும்‌ உள்ளத்தின்‌ செருக்கும்‌ கெடுமாறு சினம்‌, கருணை ஆகிய உள்ளக்‌ குறிப்போடு, சிவபபெருமான்‌ அவனுடைய பத்துத்‌ தலைகளையும்‌ விரலை ஊன்றி நெரித்தவர்‌. இப்பெருமான்‌ எழுந்தருளியுள்ள இடைமருதூரை போற்றித்‌ துதிப்பவர்களின்‌ அருவினைகள்‌ நீங்குதல்‌ பெரிதாகுமோ? வினை எளிதில்‌ நீங்கிவிடும்‌ என்பது குறிப்பு.

திருமாலுடன்‌ பிரமனும்‌ அடிமுடியைக்‌ காண முயன்றபோது, அவர்களுக்குத்‌ தெரிய முடியாதவாறு அரியவராக நின்றவர்‌. அவர்கள்‌ பணிந்து தொழுது எழுந்தபோது சோதிவடிவாகக்‌ காட்சி தந்தவர்‌. இப்பெருமான்‌ எழுந்தருளிய இடைமருதூரை அடைய வேண்டும்‌ என்ற உறுதியான மனம்‌ உடையவர்களுக்கு மிகுந்த புகழ்‌ உண்டு.

சமணர்கள்‌ குடையையும்‌, மயில்‌ தோகையையும்‌ கையில்‌ வைத்திருப்பவர்கள்‌. புத்தர்கள்‌ காவி உடைய அணிந்திருப்பவர்கள்‌. அவர்களின்‌ பொருளற்ற சொற்களிடம்‌ நமக்கு உறவு இல்லை என ஒதுக்கி விடுங்கள்‌. இறை அருளை முழுமையாகப்‌ பெற்ற அடியவர்களால்‌ தொழப்பெறும்‌ திருவடிகளை உடையது, சிவபெருமான்‌ எழுந்தருளியுள்ள இடைமருதூர்‌ ஆகும்‌ என மனதில்‌ நினைப்பது அழகைத்‌ தரும்‌.

கரையைப்‌ பொருதுகின்ற கடலை அணித்தாக உள்ள புகலிப்பதியில்‌ தோன்றியவர்‌. தமிழ்‌ விரகனான ஞானசம்பந்தன்‌ ஆகும்‌. இவர்‌ விரிந்த பொழில்களால்‌ சூழப்பட்ட இடைமருதூரில்‌ எழுந்தருளிய சிவபெருமானைப்‌ போற்றிப்‌ பாடினார்‌. இத்திருப்பதிகத்தின்‌ பத்துப்‌ பாடல்களையும்‌ ஓத வல்லவர்களுக்குத்‌ துன்பம்‌ வராது, வினையும்‌ இராது. அவர்களுக்கு அகன்ற தேவர்‌ உலகம்‌ வாய்க்கப்‌ பெறும்‌.