1
பணிந்தவர் அருவினை பற்றறுத் தருள்செயத்துணிந்தவன் தோலொடு நூல்துதை மார்பினில்பிணிந்தவன் அரவொடு பேரெழி லாமைகொண்டணிந்தவன் வளநகர் அந்தண் ஐயாறே.
சொற்பிரிப்பு
பணிந்தவர் அருவினை பற்று அறுத்து அருள்செயத்துணிந்தவன், தோலொடு நூல் துதை மார்பினில்பிணிந்தவன், அரவொடு பேர் எழில் ஆமை கொண்டுஅணிந்தவன், வள நகர் அம் தண் ஐயாறே.
உரை
சிவபெருமானின் திருவடிகளைப் பணிந்து வணங்கும் அடியவர்களின் நீங்குவதற்கு அரிய வினைகளை அவர் அடியோடு அழித்து அருள் வழங்கத் துணிந்திருப்பவர். மான் தோலோடு விளங்கும் முப்புரிநூலைத் திருமார்பில் அணிந்திருப்பவர். அரவத்துடன் பேரழகு வாய்ந்த ஆமையோட்டை அணிந்திருப்பவர். இப்பெருமான் எழுந்தருளிய வளமையான நகரம் குளிர்ச்சியான திருவையாறு ஆகும்.