திருக்கள்ளில்

முள்ளுடைய மரங்களின்மேல்‌ இருந்து முதிய கூகைகள்‌ ஒலிக்கும்‌ சோலைகள்‌ சூழ்ந்ததும்‌, விளா மரங்களின்மேல்‌ படர்ந்த கூறைக்‌ கொடிகள்‌ விளைந்து தோன்றுவதுமாய கள்ளில்‌ என்னும்‌ இத்தலத்தில்‌ எழுந்தருளிய சிவபிரான்‌ திருவடிகளை நாள்தோறும்‌ நினைவோமானால்‌ உயர்வெய்துதல்‌ உறுதியாகும்‌.

சிவபெருமான்‌ ஆடல்‌ பாடல்களில்‌ வல்லவர்‌. பாம்புகள் பலவற்றை அணிந்தவர்‌. தலையோட்டைத்‌ தவிர வேறு உண்கலம்‌ இல்லாதவர்‌. சுடுகாட்டைத்‌ தவிர வேறு இடத்தைத்‌ தனது இடமாகக்‌ கருதாதவர். மேன்மையுடைய பெரியயோர்கள்‌ அருகிலிருந்து இப்பெருமானை பெருமையோடு போற்றித்‌ துதிக்க கள்ளில்‌ என்னும்‌ தலத்தில்‌ விரும்பி எழுந்தருளியுள்ளார்‌.

பகைவர்களாகிய அசுரர்களின்‌ மும்மதில்களை எய்து அழித்தவர்‌. இமையாத மூன்று கண்களை உடையவர்‌. இசையமைப்போடு கூடிய நான்‌ மறைகளைப்‌ பாடி மகிழும்‌ மேலான யோகியர்‌. கண்களைக்‌ கவரும்‌ வண்ணம்‌ திருநீறு அணிந்த மார்பினர், பெண் ஆண்‌ என இருபாலாகக்‌ கருதும்‌ உமை பாகனான எம்‌ சிவபெருமான்‌ கள்ளில் என்னும்‌ தலத்தில்‌ எழுந்தருளி உள்ளார்‌.

சிவபெருமான்‌ பிறைசூடிய சடையை உடைய எமது அண்ணல்‌ ஆவார்‌. பெண்‌ வண்டுகளோடு ஆண்வண்டுகள்‌ கூடி ஒலிக்கும்‌ தேன்‌ நிறைந்த விரிந்த கொன்றை மாலையை விரும்பிச்‌ சூடியிருப்பவர்‌. நஞ்சுக்‌ கறை பொருந்திய கண்டத்தை உடையவர்‌. மனநிறைவு பெற்ற அடியவர்களின்‌ நெஞ்சங்களில்‌ நிறைந்து நிற்பவர்‌. இப்பெருமான்‌ கள்ளில்‌ என்னும்‌ தலத்தில்‌ எழுந்தருளியுள்ளார்‌.

சிவபெருமானை மணம்‌ கமழும்‌ ஐவகை மணப்பொருள்களாலும்‌ மலர்களாலும்‌ சீர்மை குன்றாத புகழுரைகளாலும்‌ ஊர்மக்கள்‌ எதிர்கொண்டு வணங்குவர்‌. இப்பெருமான்‌ வெண்ணிறமான கோவணத்தை இடையில்‌ உடுத்தியிருப்பவர்‌. அழகியதும்‌ பரந்ததுமான கரைகளை உடைய பொன்னி நதியின்‌ கிளை ஆறு சூழ்ந்துள்ள கள்ளில்‌ என்னும்‌ தலத்தில்‌ இவர்‌ எழுந்தருளியுள்ளார்‌.

சிவபெருமான்‌ மக்களுக்கு நன்மைகள்‌ உண்டாவதற்காகத்‌ தானே பலியேற்கும்‌ கொள்கையை உடைய கடவுளாவார்‌. நல்ல வெற்றியைத்‌ தரும்‌ மழு, வாள்‌, வேல்‌ ஆகியவற்றில்‌ வல்லவர்‌. உண்கலனாக தலையோட்டை உடையவர்‌. சிறப்புள்ள தவத்தைச்‌ செய்து தன்னை வந்தடைபவர்களின்‌ மும்மலங்களையும்‌ தீர்த்து அருளுபவர்‌. இப்பெருமான்‌ கள்ளில்‌ என்னும்‌ தலத்தில்‌ எழுந்தருளியுள்ளார்‌.

மணம்‌ கமழும்‌ அழகிய பொழில்களும்‌ சோலைகளும்‌ சூழ்ந்த கள்ளில்‌ என்னும்‌ தலத்தில்‌ சிவபெருமான்‌ எழுந்தருளியுள்ளார்‌. இப்பெருமானின்‌ அடியவர்கள்‌ திருவெண்ணீற்றுப்‌ பொடியை உடலில்‌ பூசியிருந்தாலும்‌, நற்கோலத்தில்‌ காட்சி தந்தாலும்‌, சோலைகளில்‌ எடுத்த தேனை உண்டு ஊரில்‌ திரிந்தாலும்‌, பலவாறு பிதற்றினாலும்‌, அவர்கள்‌ மனம்‌ இறைவன்‌ திருவருளிலேயே அழுந்தி இருக்கும்‌. இவ்வடியார்களின்‌ குணம்‌ செயல்களை இகழ்பவர்கள்‌ கீழ்மக்கள்‌ ஆவார்கள்‌.

அழகிய ஒளிமிக்க நீலமலர்‌ போன்ற கண்களை உடைய உமையம்மையை ஒரு பாகமாகக்‌ கொண்டவர்‌ சிவபெருமான்‌.இவர்‌ முப்புரிநூலும்‌ திருநீறும்‌ பொருந்திய மார்பினர்‌. கருநீல மலர்கள்‌ மிகுந்து பூத்துள்ள கள்ளில்‌ என்னும்‌ தலத்தில்‌ கரிய விடம்‌ பொருந்திய மிடற்று அண்ணலாகிய சிவபெருமான்‌ விரும்பி வீற்றிருக்கிறார்‌.

சிவந்த வரிகளைக்‌ கொண்ட தாமரை மலர்மேல்‌ உறையும்‌ பிரமனும்‌, உலகங்களைத்‌ தனக்கு உரியதாகுமாறு அளந்த திருமாலும்‌ நினைத்தற்கும்‌ அரியவனாக விளங்கும்‌ பெரியோன்‌ சிவபெருமானாகும்‌. இப்பெருமான்‌ அரியதலமாய்‌ விளங்கும்‌ கள்ளியில்‌ எழுந்தருளியுள்ளார்‌. இப்பெருமானையே பெரியோன்‌ என அறிஞர்கள்‌ போற்றிப்‌ புகழ்வர்‌.

நகைப்பிற்கு இடமளிக்கும்‌ அமணர்களும்‌ புத்தர்களும்‌ கூறும்‌ உரைகள்‌ நெறியற்றவையாகும்‌. எனவே அவற்றைக்‌ கேளாதீர்கள்‌. வளம்‌ மிக்க வயல்கள்‌ நிறைந்த கள்ளில்‌ என்னும்‌ தலத்தில்‌ விளங்கும்‌ தீத்திரள்‌ போன்ற சடைமுடியை உடைய அண்ணலாகிய சிவபெருமானின்‌ அழகிய திருவடியைப்‌ பேணித்‌ துதிப்பீர்களாக.

நான்கு திசை மக்களாலும்‌ புகழப்பெறும்‌ சீகாழிப்‌ பதியில்‌ செல்வ வளம்‌ நிறைந்த சூரியனைப்‌ போலப்‌ பேரொளி படைத்தவராக ஞானசம்பந்தர்‌ விளங்குகின்றார்‌. இவர்‌, நறுமணம்‌ கமழும்‌ மலர்‌ அரும்புகள்‌ நிறைந்த முதிர்ந்த சடைமுடி உடைய சிவபெருமான்‌ எழுந்தருளியுள்ள கள்ளிலைப்‌ போற்றிப்‌ பாடினார்‌. இத்திருப்பதிகத்தைப்‌ பாடிப்போற்ற வல்லவர்கள்‌ புகழோடு பேரின்பமும்‌ அடைவார்கள்‌.