திருப்பருப்பதம்

பிரகாசிக்கும்‌ ஒளியை உடைய மாணிக்க மணியை உமிழும்‌ நாகத்தைச்‌ சிவபெருமான்‌ தனது அரையில்‌ பொருந்தக்‌ கட்டியுள்ளார்‌. இவர்‌, இருபுறங்களிலும்‌ மணிகள்‌ தொங்குகின்ற யானையின்மீது ஏறாமல்‌, இடபத்தின்மீது ஏறி வருபவர்‌. நஞ்சை உண்ட கண்டத்தை உடையவர்‌. இப்பெருமான்‌ எழுந்தருளியுள்ள உயர்ந்த சிகரங்களை உடையதும்‌, ஆங்காங்கே மணிகள்‌ போலத்‌ தோன்றும்‌ ஒளியினை உடையதுமான திருப்பருப்பதத்தை நாம்‌ வணங்குவோம்‌.

அறியாமையில்‌ மூழ்கி இருக்கும்‌ நெஞ்சே! நீ, இந்த நிலையற்ற உடம்பில்‌ நோய்கள்‌ தழுவியும்‌ தோல்‌ சுருங்கியும்‌, நரை தோன்றும்‌ நிலையையும்‌ நினைந்து சிந்திப்பாயாக. வயது முதிர்ந்து வருவதற்கு முன்பே, வாய்‌ நிறைந்த தோத்திரத்தால்‌ பாடி, வலஞ்செய்து தலையால்‌ வணங்கி, பாய்கின்ற புலியின்‌ தோலை உடுத்தியுள்ள சிவபெருமான்‌ எழுந்தருளியுள்ள திருப்பருப்பதத்தை வணங்குவோம்‌; வருவாயாக!

நெஞ்சே! வருத்தத்தைத்‌ தரும்‌ இந்தப்‌ பிறவித்‌ துயர்‌ நீங்கி, பேரின்பம்‌ பெறவே இவ்வுலகத்தில்‌ நீ பிறந்திருக்கின்றாய்‌. ஆகையால்‌ நல்வினைகள்‌ செய்து அப்புண்ணியத்தால்‌ கிடைக்கும்‌ தேவலோக இன்பத்தை நுகர்தல்‌, வீடு பேறாகிய விழுமிய பயனை எய்துதல்‌ ஆகிய இரண்டிலும்‌ பற்று வைக்காதே. கரிய குரங்குகள்‌ கனிகள்‌ நிறைந்த மரத்தில்‌ ஏறி அதனை நுகராமல்‌, கனிகள்‌ அற்ற மூங்கில்‌ மரங்களில்‌ தாவி மகிழும்‌. அம்மாதிரி நடந்து கொள்ளாதே. குளிர்ந்த ஒளியோடு கூடிய பிறைமதியைச்‌ சூடிய சிவபெருமான்‌ எழுந்தருளியுள்ள திருப்பருப்பதத்தை நாம்‌ வணங்குவோம்‌. (மனித மனம்‌ ஒன்றைவிட்டு ஒன்றைப்‌ பற்றும்‌ நிலையை இப்பாடல்‌ தெரிவிக்கின்றது.)

சிவபெருமான்‌ தேன்‌ நிறைந்ததும்‌ மணம்‌ கமழுவதுமான கொன்றை மலர்‌ மாலையைச்‌ சூடியிருப்பவர்‌. குளிர்ந்த சடைமுடியை உடையவர்‌. எங்கள்‌ பிறவித்‌ துன்பத்தைப்‌ போக்க எழுந்தருளியுள்ளார்‌ என்று அடியவர்கள்‌ போற்ற அவர்களுக்கு அருள்‌ செய்யும்‌ தலம்‌ இது. ஐவகை மலர்களையும்‌ வரிந்த கரும்பு வில்லையும்‌ உடைய மன்மதனின்‌ அழகை அழித்து எரித்தவர்‌ இவர்‌. குளிர்ந்த கண்களை உடைய வெண்மையான இடபத்தை தனது ஊர்தியாக உடையவர்‌. இவர்‌ எழுந்தருளியிருக்கும்‌ இருப்பருப்பதத்தை நாம்‌ வணங்குவோம்‌.

கிளிகளின்‌ சிறகுகளில்‌ இருந்து எழும்பும்‌ ஒலியுடன்‌, அவைகள்‌ வாயால்‌ எழுப்பும்‌ இனிய ஒலியும்‌, வண்டுகளின்‌ இனிய ரீங்கார ஒலியும்‌, பறைபோல்‌ ஒலிக்கும்‌ அருவிகளின்‌ ஓசையும்‌ இடைவிடாது கேட்கும்‌ தலம்‌ திருப்பருப்பதமாகும்‌. இங்கு, வானோர்கள்‌ புண்ணியத்‌ துறைகள்‌ பலவற்றை உடைய சுனைகளில்‌ மூழ்கி உடம்பைத்‌ தூய்மைப்படுத்தி தூய மலர்களை விரைவாக சுமந்து வந்து, வேத கீதங்களை வாய்மொழியாக மகிழ்ந்து பாடித்‌ துதிக்கின்றனர்‌. நாமும்‌ இத்திருப்பருப்பதத்தை வணங்குவோம்‌.

மிகுந்த பெருமை உள்ளதும்‌ சிறப்பு நிறைந்துள்ளதுமான தவநெறி வாழ்க்கையை நீ பின்பற்ற விரும்பினால்‌, அழகிய மடநெஞ்சே, நீ, இரண்டுபட்ட மனத்துடன்‌ இராதே! உனது மனதை ஒருமுகப்படுத்தி, உறுதியாக நின்று, கார்காலத்தே மலரும்‌ மணம்‌ மிகுந்த கொன்றை மலர்‌ மாலையைச்‌ சூடிய சிவபெருமானை நினை. இப்பெருமான்‌ எழுந்தருளியுள்ள உலகப்புகழ்‌ பெற்ற தலமாய்‌ விளங்கும்‌ திருப்பருப்பதத்தைப்‌ போற்றி வணங்குக.

எப்பக்கம்‌ நிறைந்து வளர்ந்துள்ள தாமரை மலர்களின்‌ நறுமணமும்‌, வேள்வியினால்‌ எழும்‌ புகையின்‌ நறுமணமும்‌ ஒன்று சேர்ந்து மணம்‌ கமழுமாறு தொடுக்கப்பட்ட நறுமண மாலையை சிவபெருமான்‌ திருமுடியின்மேல்‌ அணிந்துள்ளார்‌. இவர்‌ விடைக்‌ கொடியைக்‌ கையில்‌ ஏந்தி உள்ளார்‌. தனது திருமேனியில்‌ வெந்த வெண்ணீற்றைப்‌ பூசியுள்ளார்‌. கையில்‌ மழுப்படையை ஏந்தியவராக விளங்கும்‌ இப்பெருமான்‌ எழுந்தருளியுள்ள திருப்பருப்பதத்தை நாம்‌ வணங்குவோம்‌.

நமது மனதின்‌ நினைப்பு என்பது, அளப்பற்ற ஆழமான கிணற்றைப்‌ போன்றது. பலதரப்பட்ட எண்ணங்கள்‌ ஒன்றோடு ஒன்று தோன்றி நம்மை மயக்கி, பெரும்‌ துன்பத்தைத்‌ தோற்றுவிக்கன்றன. ஆகையால்‌ மனதை வைராக்கியப்‌ பயிற்சியால்‌ அடக்கிக்‌, கட்டுப்படுத்தி, தீய எண்ணங்களை ஒழித்துத்‌, துன்பங்கள்‌ என்னை வந்தடையாமல்‌ தப்பித்தேன்‌. துன்பங்கள்‌ நம்மை வந்தடையாமல்‌ காத்துக்‌ கொள்ளும்‌ வழியைக்‌ கூறுகின்றேன்‌. ஆரவாரித்து வெள்ளமாக எழுந்த கங்கை நீரைச்‌ சிவபெருமான்‌ தமது மணம்‌ கமழும்‌ சடையில்‌ தாங்கி மறையைச்‌ செய்தவர்‌. இப்பெருமான்‌ எழுந்தருளியுள்ளதும்‌ பனைமரம்‌ போல உருண்டு திரண்டு ஒழுகும்‌ அருவிநீரை உடையதுமான திருப்பருப்பதத்தை நாம்‌ வணங்குவோம்‌.

பல பிறவிகள்‌ காரணமாக நம்மைத்‌ தொடருகின்ற வலிய வினைகளினால்‌ வரும்‌ துன்பங்கள்‌ நம்மை வந்து அடையாமல்‌ இருக்க நல்வழியைக்‌ கூறுகின்றேன்‌. திருமகளைத்‌ தன்‌ மார்பில்‌ கொண்ட திருமால்‌, நான்முகன்‌ ஆகிய இருவரும்‌ அறிய முடியாதவாறு, சிவபெருமான்‌ பெருஞ்சோதியின்‌ நடுவே பெரிய மலையாக ஓங்கி நின்றார்‌. இப்பெருமான்‌ எழுந்தருளியுள்ள திருப்பருப்பதத்தை நாம்‌ வணங்குவோம்‌.

அறியாமையால்‌ ஆட்கொள்ளப்பட்டு சாத்திரங்களைக்‌ கூறும்‌ புத்தர்களும்‌ பருத்த உடம்பினராகிய சமணர்களும்‌ கூறும்‌ மடமையை விரும்பி சிலர்‌ மயங்குகின்றனர்‌. அவர்கள்‌ கானல்‌ நீரை உண்மை என்று நம்பிக்‌ குடத்தை எடுத்துச்‌ செல்வோரைப்‌ போன்றவர்கள்‌. அவ்வாறு செல்லுபவர்கள்‌ செல்லட்டும்‌. யானைத்‌ தோலைப்‌ போர்வையாக போர்த்த சிவபெருமான்‌ எழுந்தருளியுள்ள திருப்பருப்பதத்தை நாம்‌ வணங்குவோம்‌.

வெண்மையான‌ நெல்லும்‌ சிவந்த நெல்லும்‌ விளையும்‌ வயல்களை உடையதும், திருவிழாக்களின்‌ ஒலிகள்‌ நிறைந்ததுமான கழுமலம்‌ என்ற சீகாழியில்‌ அவதரித்தவர் ஞானசம்பந்தன்‌ ஆகும்‌. இவர்‌ பண்‌ இசையோடு பொருந்திய பாடல்கள்‌ பலவற்றால்‌ திருப்பருப்பதத்தில்‌ எழுந்தருளியுள்ள சிவபெருமானைப்‌ போற்றிப்‌ பாடினார்.‌ நல்ல சொற்களால்‌ அமைந்த பாடல்களால்‌ பாடிய ஓலி பொருந்திய இத்திருப்பாமாலையை பலகாலும்‌ நினைந்தும்‌, மனனம்‌ செய்தும்‌ பாடினால்‌ அதுவே பெரும்‌ தவமாகும்‌.