திருச்சிற்றம்பலம்

திருப்பிரமபுரம்

அருளியவர்: திருஞானசம்பந்தர்
பண்: வியாழக்குறிஞ்சி
தலம்: சீர்காழி - பல்பெயர்ப்பத்து
நாடு: சோழநாடு காவிரி வடகரை

1

காட தணிகலங் காரர வம்பதி காலதனில்தோட தணிகுவர் சுந்தரக் காதினில் தூச்சிலம்பர்வேட தணிவர் விசயற் குருவம்வில் லுங்கொடுப்பர்பீட தணிமணி மாடப் பிரம புரத்தரரே.

சொற்பிரிப்பு

காடு அது, அணிகலம் கார் அரவம், பதி; கால் அதனில்,-தோடு அது அணிகுவர் சுந்தரக் காதினில், தூச் சிலம்பர்;வேடு அது அணிவர், விசயற்கு, உருவம், வில்லும் கொடுப்பர்;பீடு அது மணி மாடப் பிரமபுரத்து அரரே.

உரை

அழகு மிகுந்த மாடவீடுகளைக்‌ கொண்ட பெருமை மிக்க பிரமபுரத்தில் சிவபெருமான்‌ எழுந்தருளியுள்ளார்‌. இப்பெருமான்‌ கொடிய விடம்‌ கொண்ட அரவத்தை ஆபரணமாகக்‌ கொண்டவர்‌. சுடுகாட்டை இருப்பிடமாக உடையவர்‌. அழகிய காதில்‌ தோடு அணிந்தவர்‌. திருப்பாதத்தில்‌ சிலம்பு அணிந்தவர்‌. வேடுவர்‌ உருவம்‌ கொண்டு அருச்சுனனுக்குப்‌ பாசுபதக்‌ கணை அளித்தவர்‌. இப்பெருமானைப்‌ போற்றித்‌ தொழுவோமாக.

2

கற்றைச் சடையது கங்கண முன்கையில் திங்கள்கங்கைபற்றித்து முப்புரம் பார்படைத் தோன்றலை சுட்டதுபண்டெற்றித்துப் பாம்பை யணிந்தது கூற்றை யெழில்விளங்கும்வெற்றிச் சிலைமதில் வேணு புரத்தெங்கள் வேதியரே.

சொற்பிரிப்பு

கற்றைச் சடையது, கங்கணம் முன்கையில் திங்கள் கங்கை;பற்றித்து, முப்புரம், பார் படைத்தோன் தலை, சுட்டது பண்டு;எற்றித்து, பாம்பை அணிந்தது, கூற்றை; எழில் விளங்கும்வெற்றிச் சிலைமதில் வேணுபுரத்து எங்கள் வேதியரே.

உரை

கருங்கல்லால்‌ எழில்‌ மிகுந்த வெற்றித்‌ திருமதில்களை உடைய வேணுபுரம்‌ என்னும்‌ சீகாழியில்‌ வேதநாயகரான எங்கள்‌. சிவபெருமான்‌ எழுந்தருளியுள்ளார்‌. இப்பெருமான்‌ சடைமுடியில்‌ சந்திரனையும்‌ கங்கையையும்‌ தரித்தவர்‌. முன்கையில்‌ பாம்பை கைவளையலாக அணிந்தவர்‌.முப்புரங்களை எரித்தவர்‌. உலகத்தைப்‌ படைக்கும்‌ தொழிலை உடைய பிரமனின்‌ ஐந்து தலைகளில்‌ ஒன்றைக்‌ கொய்தவர்‌. முற்காலத்தில்‌ மார்க்கண்டேயனின்‌ உயிரைக்‌ கவர வந்த எமனைக்‌ காலால்‌ உதைத்தவர்‌. இப்பெருமானைப்‌ போற்றித்‌ தொழுவோமாக,

3

கூவிளங் கையது பேரி சடைமுடிக் கூட்டத்ததுதூவிளங் கும்பொடிப் பூண்டது பூசிற்றுத் துத்திநாகம்ஏவிளங் குந்நுத லானையும் பாகம் உரித்தனரின்பூவிளஞ் சோலைப் புகலியுள் மேவிய புண்ணியரே.

சொற்பிரிப்பு

கூவிளம், கையது பேரி, சடைமுடிக் கூட்டத்தது;தூ விளங்கும் பொடி, பூண்டது, பூசிற்று, துத்தி நாகம்;ஏ விளங்கும் நுதல், ஆனையும், பாகம், உரித்தனர்; இன்பூ இளஞ் சோலைப் புகலியுள் மேவிய புண்ணியரே.

உரை

இனிய பூக்கள்‌ நிறைந்த இளஞ்சோலைகளால்‌ சூழப்பட்ட புகலி என்னும்‌ சீகாழியில்‌ புண்ணியரான சிவபெருமான்‌ எழுந்தருளியுள்ளார்‌. இப்பெருமான்‌ சடைமுடியில்‌ வில்வத்தை அணிந்துள்ளார்‌. கையில்‌ பேரி என்னும்‌ தோற்பறையைக்‌ கொண்டுள்ளார்‌. தூய்மையோடு விளங்கும்‌ திருநீற்றுப்‌ பொடியைப்‌ பூசியுள்ளார்‌. படப்‌ பொறிகளோடுகூடிய நாகத்தை அணிகலனாகப்‌ பூண்டுள்ளார்‌. வில்போன்று வளைந்த நெற்றியை உடைய உமையம்மையை ஒரு பாகத்தில்‌ கொண்டுள்ளார்‌. யானைத்தோலை உரித்துப்‌ பூண்டுள்ளார்‌. இப்பெருமானைப்‌ போற்றித்‌ தொழுவோமாக.

4

உரித்தது பாம்பை யுடல்மிசை இட்டதோர் ஒண்களிற்றைஎரித்ததொ ராமையை இன்புறப் பூண்டது முப்புரத்தைச்செருத்தது சூலத்தை யேந்திற்றுத் தக்கனை வேள்விபன்னூல்விரித்தவர் வாழ்தரு வெங்குருவில் வீற்றிருந் தவரே.

சொற்பிரிப்பு

உரித்தது, பாம்பை உடல்மிசை இட்டது, ஓர் ஒண் களிற்றை;எரித்தது, ஒர் ஆமையை இன்பு உறப் பூண்டது, முப்புரத்தை;செருத்தது, சூலத்தை ஏந்திற்று, தக்கனை வேள்வி; பல் நூல்விரித்தவர் வாழ்தரு வெங்குருவில் வீற்றிருந்தவரே.

உரை

பலவேத நூல்களைக்‌ கற்றுணர்ந்த சான்றோர்கள்‌ வாழ்கின்றதும்‌ மரங்கள்‌ சூழ்ந்ததுமான வெங்குரு என்னும்‌ சீகாழியில்‌ சிவபெருமான்‌ வீற்றிருக்கின்றார்‌. இப்பெருமான்‌ ஒப்பற்ற யானையின்‌ தோலை உரித்தவர்‌. பாம்பைத்‌ தன்‌ திருமேனியில்‌ அணிந்தவர்‌. முப்புரங்களை எரித்தவர்‌. ஆமையோட்டை மகிழ்வுறப்‌ பூண்டவர்‌. தக்கன்‌ வேள்வியில்‌ வெகுண்டவர்‌. சூலத்தை கையில்‌ ஏந்தியவர்‌. இப்பெருமானைப்‌ போற்றித்‌ தொழுவோமாக.

5

கொட்டுவர் அக்கரை யார்ப்பது தக்கை குறுந்தாளனவிட்டுவர் பூதங் கலப்பில ரின்புக ழென்புலவின்மட்டுவ ருந்தழல் சூடுவர் மத்தமும் ஏந்துவர்வான்தொட்டுவ ருங்கொடித் தோணி புரத்துறை சுந்தரரே.

சொற்பிரிப்பு

கொட்டுவர், அக்கு அரை ஆர்ப்பது, தக்கை; குறுந்தாளனஇட்டுவர் தம், கலப்பு இலர், இன்புகழ், என்பு; உலவின்மட்டு வரும் தழல், சூடுவர் மத்தமும், ஏந்துவர்; வான்தொட்டு வரும் கொடித் தோணிபுரத்து உறை சுந்தரரே.

உரை

வானத்தைத்‌ தொடுமாறு உயர்ந்த கொடித்‌ தோரணங்களை உடைய தோணிபுரம்‌ என்ற காழியில்‌ சுந்தரரான சிவபெருமான்‌ வீற்றிருக்கின்றார்‌. இப்பெருமான்‌ தக்கை என்னும்‌ பறையைக்‌ கொட்டுபவர்‌. சங்கு மணியை அரையில்‌ கட்டியிருப்பவர்‌. குறுகிய பாதங்களை உடைய பூதகணங்களின்‌ இனிய புகழை ஏற்பவர்‌. கலப்பில்லாத வெண்மையான உடம்பினர்‌. ஊமத்தம்‌ பூவையும்‌ சூடுபவர்‌. உலகத்தை அழிக்குமாறு வரும்‌ அக்கனியைக்‌ கையில்‌ ஏந்தியிருப்பவர்‌. இப்பெருமானைப்‌ போற்றித்‌ தொழுவோமாக.

6

சாத்துவர் பாசந் தடக்கையி லேந்துவர் கோவணந்தங்கூத்தவர் கச்சுக் குலவிநின் றாடுவர் கொக்கிறகும்பேர்த்தவர் பல்படை பேயவை சூடுவர் பேரெழிலார்பூத்தவர் கைதொழு பூந்தராய் மேவிய புண்ணியரே.

சொற்பிரிப்பு

சாத்துவர், பாசம் தடக்கையில் ஏந்துவர், கோவணம்; தம்கூத்து, அவர், கச்சுக் குலவி நின்று, ஆடுவர்; கொக்கு இறகும்,பேர்த்தவர் பல்படை பேய் அவை, சூடுவர்; பேர் எழிலார்;பூத்தவர் கைதொழு பூந்தராய் மேவிய புண்ணியரே.

உரை

தவமுனிவர்கள்‌ பூக்களைத்‌ தூவி கையால்‌ தொழும்‌ பூந்தராய்‌ என்னும்‌ சீகாழியில்‌ புண்ணியரான சிவபெருமான்‌ எழுந்தருளியுள்ளார்‌. இப்பெருமான்‌ கோவணம்‌ உடுத்தவர்‌. இடுப்பில்‌ கச்ச (உடை) அணிந்து ஆடுபவர்‌. தமக்கே உரித்தான கூத்தினை உடையவர்‌. பெரிய படைக்கலனை கையில்‌ ஏந்தியிருப்பவர்‌. வெண்மையான கொக்கிறகையும் சூடுபவர்‌. பல்வகைப்‌ படைகளாகிய பேய்க்‌ கணங்களை அடிபெயர்த்து ஆடல்‌ செய்தவர்‌. பேரழகினை உடையவர்‌. இப்பெருமானைப்‌ போற்றித்‌ தொழுவோமாக.

7

காலது கங்கைகற் றைச்சடை யுள்ளாற் கழல்சிலம்புமாலது ஏந்தல் மழுவது பாகம்வளர் கொழுங்கோட்டாலது வூர்வர் அடலேற் றிருப்பர் அணிமணிநீர்ச்சேலது கண்ணியொர் பங்கர் சிரபுரம் மேயவரே.

சொற்பிரிப்பு

காலது, கங்கை கற்றைச் சடையுள்ளால், கழல் சிலம்பு;மாலது, ஏந்தல் மழு அது, பாகம்; வளர் கொழுங் கோட்டுஆல் அது, ஊர்வர் அடல் ஏற்று, இருப்பர்; அணி மணி நீர்ச்சேல் அது கண்ணி ஒர்பங்கர் சிரபுரம் மேயவரே.

உரை

அழகிய நீலமணியின்‌ நிறத்தையும்‌ சேல்‌ மீன்‌ போன்ற கண்களையும்‌ உடைய உமையம்மையை ஒரு பாகமாக உடையவராய்‌ சிவபெருமான்‌ சிரபுரம்‌ என்னும்‌ காழியில்‌ விரும்பி எழுந்தருளி உள்ளார்‌. இப்பெருமான்‌ கழலையும்‌ சிலம்பையும்‌ காலில்‌ சூடியவர்‌. அடர்த்தியான சடையில்‌ கங்கையைக்‌ கொண்டிருப்பவர்‌. திருமாலைப்‌ பாகமாகக்‌ கொண்டிருப்பவர்‌. கையில்‌ மழு ஏந்தியிருப்பவர்‌. வளர்ந்த செழுமையான கிளைகளைக்‌ கொண்ட ஆலமரத்தின்‌ கீழ்‌ வீற்றிருப்பவர்‌. இடபத்தில்‌ஏறி ஊர்ந்து செல்பவர்‌. இப்பெருமானைப்‌ போற்றித்‌ தொழுவோமாக.

8

நெருப்புரு வெள்விடை மேனியர் ஏறுவர் நெற்றியின்கண்மருப்புறு வன்கண்ணர் தாதையைக் காட்டுவர் மாமுருகன்விருப்புறு பாம்புக்கு மெய்த்தந்தை யார்விறன் மாதவர்வாழ்பொருப்புறு மாளிகைத் தென்புற வத்தணி புண்ணியரே.

சொற்பிரிப்பு

நெருப்பு உரு, வெள்விடை, மேனியர், ஏறுவர்; நெற்றியின் கண்,மருப்பு உருவன், கண்ணர், தாதையைக் காட்டுவர்; மா முருகன்விருப்பு உறு, பாம்புக்கு மெய், தந்தையார்; விறல் மா தவர் வாழ்பொருப்பு உறு மாளிகைத் தென் புறவத்து அணி புண்ணியரே.

உரை

பெருமை மிக்க சிறந்த தவமுனிவர்கள்‌ வாழ்வதும்‌, மலை போன்ற உயர்ந்த மாளிகைகள்‌ உடையதுமான அழகிய புறவம்‌ என்னும்‌ சீகாழி நகருக்கு அணிசேர்க்கும்‌ புண்ணியராக சிவபெருமான்‌ விளங்குகின்றார்‌. இப்பெருமான்‌ நெருப்புப்‌ போன்ற சிவந்த மேனியர்‌. வெண்மையான விடைமீது ஏறிவருபவர்‌. நெற்றியில்‌ மூன்றாவது கண்‌ ஒன்று உடையவர்‌. தந்தத்தை உடையவராகிய விநாயகருக்கு தந்தையார்‌ ஆவர்‌. பாம்பிற்கு தன்‌ மெய்யில்‌ இடம்‌ தந்து அதனைச்‌ சூடுபவர்‌. சிறப்புக்குரிய முருகப்‌ பெருமானுக்கு உகப்பான தந்தையார்‌ ஆவர்‌. இப்பெருமானைப்‌ போற்றித்‌ தொழுவோமாக.

9

இலங்கைத் தலைவனை யேந்திற் றிறுத்த திரலையின்னாள்கலங்கிய கூற்றுயிர் பெற்றது மாணி குமைபெற்றதுகலங்கிளர் மொந்தையி னாடுவர் கொட்டுவர் காட்டகத்துச்சலங்கிளர் வாழ்வயற் சண்பையுள் மேவிய தத்துவரே.

சொற்பிரிப்பு

இலங்கைத் தலைவனை, ஏந்திற்று, இறுத்தது, இரலை; இல் நாள்,கலங்கிய கூற்று, உயிர் பெற்றது மாணி, குமை பெற்றது;கலம் கிளர் மொந்தையின், ஆடுவர், கொட்டுவர், காட்டு அகத்து;சலம் கிளர் வாழ் வயல் சண்பையுள் மேவிய தத்துவரே.

உரை

நீர்‌ வளம்‌ நிறைந்து விளங்கும்‌ வயல்களை உடைய சண்பை என்னும்‌ சீகாழிப்‌ பதியில்‌ சிவபெருமான்‌ எழுந்தருளியுள்ளார்‌. இப்பெருமான்‌ இலங்கைத்‌ தலைவனான இராவணனை நெரித்து வலியிழக்கச்‌ செய்தவர்‌. கையில்‌ மானை ஏந்தியவர்‌. கலக்கத்தோடு வந்த யமனின்‌ உயிரைக்‌ கவர்ந்தவர்‌. வாழ்நாள்‌ முடிவுற்றதைக்‌ குறித்துக்‌ கலங்கிய மார்க்கண்டேயருக்கு உயிர்‌ கொடுத்துப்‌ புது வாழ்வு அருளியவர்‌. வாத்தியமாக இலங்கும்‌ மொந்தை என்னும்‌ தோல்‌ கருவியைக்‌ கொட்டுபவர்‌. சுடுகாட்டில்‌ ஆடுபவர்‌. இப்பெருமானைப்‌ போற்றித்‌ தொழுவோமாக.

10

அடியிணை கண்டிலன் தாமரை யோன்மால் முடிகண்டிலன்கொடியணி யும்புலி யேறுகந் தேறுவர் தோலுடுப்பர்பிடியணி யுந்நடை யாள்வெற் பிருப்பதோர் கூறுடையர்கடியணி யும்பொழிற் காழியுள் மேய கறைக்கண்டரே.

சொற்பிரிப்பு

அடி இணை கண்டிலன், தாமரையோன், மால், முடி கண்டிலன்;கொடி அணியும், புலி, ஏறு, உகந்து ஏறுவர், தோல் உடுப்பர்;பிடி அணியும் நடையாள், வெற்பு இருப்பது, ஓர்கூறு உடையர்;கடி அணியும் பொழில் காழியுள் மேய கறைக்கண்டரே.

உரை

நறுமணம்‌ பொருந்திய பொழில்கள்‌ சூழ்ந்த காழிபுரம்‌ என்னும்‌ சீகாழிப்‌ பதியுள்‌ கறை பொருந்திய கண்டத்தை உடையவராகச்‌ சிவபெருமான்‌ வீற்றிருக்கின்றார்‌. இப்பெருமானின்‌ அடிமுடிகளைத்‌ திருமாலும்‌ தாமரை மலரின்‌ மேல்‌ விளங்கும்‌ பிரமனும்‌ கண்டிலர்‌. இவரது கொடிமிசை இலச்சினையாகத்‌ திகழும்‌ இடபத்தை வாகனமாகக்‌ கொண்டு அதன்மீது ஏறுபவர்‌. புலித்தோலை உடுப்பவர்‌. பெண்‌ யானை போன்ற நடையினை உடைய உமையம்மையைத்‌ தன்‌ உடம்பில்‌ ஒரு பாகமாகக்‌ கொண்டவர்‌. இவரின்‌ இருப்பிடமோ கயிலை மலையாகும்‌. இப்பெருமானைப்‌ போற்றித்‌ தொழுவோமாக.

11

கையது வெண்குழை காதது சூலம் அமணர்புத்தர்எய்துவர் தம்மை யடியவர் எய்தாரோர் ஏனக்கொம்புமெய்திகழ் கோவணம்பூண்ப துடுப்பது மேதகையகொய்தலர் பூம்பொழிற் கொச்சையுள் மேவிய கொற்றவரே.

சொற்பிரிப்பு

கையது, வெண்குழை காதது, சூலம்; அமணர் புத்தர்,எய்துவர், தம்மை, அடியவர், எய்தார்; ஓர் ஏனக்கொம்பு,மெய் திகழ் கோவணம், பூண்பது, உடுப்பது; மேதகையகொய்து அலர் பூம்பொழில் கொச்சையுள் மேவிய கொற்றவரே.

உரை

சிறந்தனவாகவும்‌ கொய்யக்‌ கொய்ய மீண்டும்‌ மீண்டும்‌ மலரும்‌ அழகிய பொழில்களோடு சூழப்பட்டனவாயும்‌ உன்ள கொச்சைவயம்‌ என்னும்‌ சீகாழி நகரின்‌ பேரரசனாக சிவபெருமான்‌ எழுந்தருளியுள்ளார்‌. இப்பெருமானின்‌ கையில்‌ சூலமும்‌ வலக்காதில்‌ வெண்குழையும்‌ உன்ளன. இப்பெருமானைச்‌ சமணரும்‌ புத்தர்களும்‌ அடையமாட்டார்கள்‌. ஆனால்‌, எளிமையான அடியவர்கள்‌ இவரை அடைவார்கள்‌. பன்றியின்‌ கொம்பை அவர்‌ திருமேனியில்‌ விளங்கப்‌ பூண்பவர்‌. அவர்‌ கோவணம்‌ உடுத்தவர்‌. இப்பெருமானைப்‌ போற்றித்‌ தொழுவோமாக.

12

கல்லுயர் கழுமல இஞ்சியுள் மேவிய கடவுள் தன்னைநல்லுரை ஞானசம் பந்தன்ஞா னத்தமிழ் நன்குணரச்சொல்லிடல் கேட்டல்வல் லோர்தொல்லை வானவர் தங்களொடுஞ்செல்குவர் சீரரு ளாற்பெற லாஞ்சிவ லோகமதே.

சொற்பிரிப்பு

கல் உயர் இஞ்சிக் கழுமலம் மேய கடவுள் தன்னைநல் உரை ஞானசம்பந்தன் ஞானத்தமிழ் நன்கு உணரச்சொல்லிடல் கேட்டல் வல்லோர், தொல்லை வானவர் தங்களொடும்செல்குவர்; சீர் அருளால் பெறல் ஆம் சிவலோகம் அதே.

உரை

கல்லால்‌ ஆன உயர்ந்த மதில்களை உடைய கழுமலம்‌ என்னும்‌ சீகாழியில்‌ எழுந்தருளிய சிவபெருமானை, ஞானசம்பந்தன்‌ நல்லுரைகளால்‌ போற்றிப்‌ பாடினார்‌. கடவுள்‌ ஞானத்தை உணர்த்தும்‌ தமிழால்‌ நன்கு உணரச்‌ சொல்லிய இத்திருப்பதிகத்தைச்‌ சொல்லவும்‌ கேட்கவும்‌ வல்லவர்கள்‌. தொன்மையாக விளங்கும்‌ தேவர்களுடன்‌ அமருலகம்‌ சென்று லோகத்தைப்‌ பெறுவர்‌.

திருச்சிற்றம்பலம்