திருநீலகண்டத் திருப்பதிகம்

நாம்‌ முற்பிறவிகளில்‌ சேர்த்து வைத்த சஞ்சித கர்ம வினைகளுக்கு ஈடாகவே இப்பிறவியில்‌ பிறந்து பிராரர்த்த வினையின்படி இன்பத்தையும்‌ துன்பத்தையும்‌ அனுபவிக்கின்றோம்‌' என்று சொல்லப்படுவதை நீங்கள்‌ அறிவீர்கள்‌ அல்லவா? இவ்வினைகளில்‌ இருந்து விடுதலை பெறும்‌ வழியை நீங்கள்‌ முயற்சி செய்து தேடாமல்‌ இருப்பது உங்களுடைய பெருங்குறை அல்லவா? நாம்‌ அனைவரும்‌ எவ்வித பிரதிபலனையும்‌ எதிர்பார்க்காமல்‌ சிவப்பணிகளையும்‌, திருத்தொண்டுகளையும்‌ செய்து, சிவபெருமானின்‌ திருவடியைப்‌ போற்றுவோம்‌. அப்படிச்‌ செய்தால்‌ சஞ்சித வினைகள்‌ அழிந்து விடும்‌. இனிவரும்‌ ஆகாமிய வினைகளும்‌ நம்மை வந்து அணுகா. இது நீலகண்டனான சிவபெருமான்மீது கூறும்‌ ஆணையாகும்‌. (பிராரர்த்த வினையை இந்தப்‌ பிறவியில்‌ அவரவர்கள்‌ அனுபவித்தே தீர வேண்டும்‌. இறைவன்‌ அதை நீக்கமாட்டார்.

நாம்‌ நந்தவனம்‌, சோலை முதலியவற்றை வளர்ப்போம்‌. குளங்கள்‌ பலவற்றைத்‌ தோண்டுவோம்‌.நல்லறங்கள்‌ பலவற்றைச்‌ செய்வோம்‌. காலை மாலை இருபொழுதும்‌ பூக்களைக்‌ கொய்து, சிவபெருமானின்‌ மலர்போன்ற திருவடிகளில்‌ சாத்தி, கனிந்த அன்புள்ள மனதுடன், ‘கணை ஒன்றால்‌ முப்புரங்களை எரித்தீரே' என்று போற்றுவோம்‌. அவ்வாறு செய்து வந்தால் சிவனடியார்கள்‌ ஆகிவிடுவோம்‌. பழைய வினையான சஞ்சித கர்மம்‌ நம்மைத்‌ துன்புறுத்தாது. இது நீலகண்டத்தின்மேல்‌ கூறும்‌ ஆணையாகும்‌.

பெண்ணாசை என்ற போகங்களிலும்‌ மற்றும்‌ பலவித ஆசைகளிலும்‌ மூழ்கி அலைக்கழிக்கப்பட்டுப்‌ போகாமல்‌ எங்களைத்‌ தடுத்து ஆட்கொண்ட விரிந்த சடைப்பெருமானே! இலைவடிவான சூலம்‌, தண்டாயுதம்‌,மழு ஆகியவற்றைப் படைக்கலன்களாக உடையவரே! என்று சிவபெருமானைப் போற்றுவோம். ஆர்ப்பரித்து வரும்‌ பழைய வினையான சஞ்சித கர்மம் நம்மை துன்புறுத்தாது. இது நீலகண்டத்தின்மேல்‌ கூறும்‌ ஆணையாகும்‌.

விண்ணுலகை ஆளுகின்ற வானோர்களும்‌ வேதவிற்பன்னர்களும்‌ ‘புண்ணிய வடிவமானவர்’ என்று இருவேளைகளிலும்‌ உம்மைத்‌ துதித்துத்‌ தொழப்படும்‌ புண்ணியரே! இமைத்தல்‌ புரியாத முக்கண்களை உடையவரே! உமது திருவடிகளில்‌ புகல்‌ அடைந்தோம்‌! எனப்‌ போற்றுவோம்‌. இப்படிச்‌ செய்து வந்தால்‌ வலிமையான சஞ்சித கர்மம்‌ என்ற தீவினை நம்மைத்‌ துன்புறுத்தாது. இது நீலகண்டத்தின்மேல்‌ கூறும்‌ ஆணையாகும்‌.

எவர்க்கும்‌ இணையில்லாத ஒப்பற்ற மலைபோலத்‌ திரண்ட வலிமையான தோள்களை உடைய பெருமானே! வலிமையுடன்‌ உறுதியாக எம்மை ஆட்கொண்ட பின்னரும்‌, எமது குறையைக்‌ கேளாது இருப்பது உமக்குப்‌ பெருமை தருமோ? வெறும் வாய்ச்சொற்கள்‌ வாயிலாகத்‌ 'துணை' என்று சொல்லப்படுகின்ற இல்லற வாழ்க்கைக்குச் ‌ சொல்லப்படும்‌ எல்லாத்‌ துணைகளையும்‌ துறந்து,உம்முடைய திருவடிகளையே சரண்‌ அடைந்தோம்‌.ஆகையால்‌ பெரும்‌ வருத்தத்தைத்‌ தருகின்ற சஞ்சித கர்மம்‌ என்ற தீவினைகள்‌ பெருவலிமை கொண்டு வருத்தி நம்மை வந்து அடையமாட்டா. இது நீலகண்டத்தின்மேல்‌ கூறும்‌ ஆணையாகும்‌.

எமது மனமானது, உலக மாயையால்‌ எம்மோடு ஒத்து வராமல்‌, உம்மை மறக்கும்‌ தன்மை வாய்ந்தது. மலமறப்பால்‌ தடுமாறும்‌ இந்த மனதை வைராக்கிய பயிற்சியால்‌ மாற்றி, ஆன்மாவை ஒருமுகப்படுத்தி நெஞ்சில்‌ மாசற்ற தன்மையை அடைந்தோம்‌. பிறப்பற்ற தேவரீரின்‌ திருவடிக்குப்‌ பிழை ஏற்படாத வண்ணம்‌, புதிதாகப்‌ பறித்த மலர்களைக்‌ கொண்டு உம்மைப்‌ போற்றிப்‌ பணி செய்து அடியவர்கள்‌ ஆகிவிட்டோம்‌. ஆகையால்‌ சிறப்பற்ற சஞ்சித வினை என்ற தீவினை எங்களைத்‌ தீண்டமாட்டா. இது நீலகண்டத்தின்மேல்‌ கூறும்‌ ஆணையாகும்‌.

இனி வருகின்ற பிறவியை அறுத்து, உலக வாழ்க்கையை வெறுத்து, உமது திருவடியில்‌ மனம்‌ கரைந்து, நல்ல மலர்களைக்‌ கொண்டு அர்ச்சனை செய்து போற்றி, உமது அடியவர்கள்‌ ஆகிவிட்டோம்‌. ஆணவத்தால்‌ செருக்குற்ற அரக்கனான இராவணனை நெருக்கி, பின்னர்‌ அவனுக்கு அருள்செய்த சிவபெருமானாரே! முற்பிறவிகளில்‌ உம்மை வழிபாடு செய்யாததால்‌ வந்த தீவினை எங்களைத்‌ துன்புறுத்தக்‌ கூடாது. இது திருநீலகண்டத்தின்மேல்‌ கூறும்‌ ஆணையாகும்‌.

மணம்‌ மிக்க தாமரை மலரில்‌ விளங்கும்‌ நான்முகனும்‌ திருமாலும்‌ தங்களுக்குள்‌ தர்க்கம்‌ செய்து, உமது அடியும்‌ முடியும்‌ அறியப்படாத தன்மையுடைய சிவபெருமானாரே! நீர்‌ காணப்பெறினும்‌ பெறுவீர்‌! உம்மைத்‌ தொழுது வணங்கி உமது அடியவர்கள்‌ ஆகிவிட்டோம்‌. ஆகையால்‌ கோபமுடைய சஞ்சித வினை என்ற தீவினை நம்மைத்‌ துன்புறுத்தாது. இது நீலகண்டத்தின்மேல்‌ கூறும்‌ அணையாகும்‌.

புத்தர்களும்‌ ஆடையின்றித்‌ திரியும்‌ சமணர்களும்‌ பாக்கியம்‌ இல்லாதவர்கள்‌. அவர்கள்‌ இம்மை இன்பமும்‌ மறுமை இன்பமும்‌ கிடைக்கப்பெறாதவர்கள்‌. நாம்‌ சிவபெருமானாரை நோக்கி, மணமுள்ள பூக்களையும்‌ கொன்றையையும்‌ அணிந்த விரிசடை உடையவரே! உமது திருவடிகளைப்‌ போற்றுகின்றோம்‌, என்று கூறுவோம்‌. அப்படிச்‌ செய்து வந்தால்‌ தீக்குழியைப்‌ போன்று சுடுகின்ற சஞ்சித வினை என்ற தீவினை நம்மைத்‌ துன்புறுத்தாது. இது நீலகண்டனின்‌ மேல்‌ கூறும்‌ ஆணையாகும்‌.

நாம் பிறப்பெடுத்த இந்தப்‌ பிறவியிலேயே எமது செல்வராகிய சிவபெருமானின் திருவடிகளை வாணங்கி வழிபட்டு முத்திப்பேற்றை அடையலாம்‌. ஒருவேளை பழவினைகள்‌ அழியாமல் மீண்டும்‌ பிறவி எடுத்திருந்தால்‌, தேவர்களின்‌ அரசனான சிவபெருமானின்‌ பெருமைகளை அறிந்த ஞானசம்பந்தன்‌ அருளிய செந்தமிழ்ப்‌ பாடல்கள்‌ பத்தையும்‌ ஓதுவோம்‌. இத்திருப்பதிகத்தைப்‌ பொருளுணர்ந்து ஓத வல்லவர்கள்‌ விண்ணுலகில்‌ தேவர்களின்‌ அரசனுடன்‌ கூடி மகழ்ந்திருப்பார்கள்‌.