திருமுறை 1 · 1.115 · 11

திருச்சிற்றம்பலம்

திருஇராமனதீச்சரம்

அருளியவர்
திருஞானசம்பந்தர்
பண்
வியாழக்குறிஞ்சி
தலம்
இராமனதீச்சரம்
நாடு
சோழநாடு காவிரித் தென்கரை

முதல் திருமுறை ›

1

சங்கொளிர் முன்கையர் தம்மிடையேஅங்கிடு பலிகொளு மவன்கோபப்பொங்கர வாடலோன் புவனியோங்கஎங்குமன் இராமன தீச்சரமே.
சொற்பிரிப்பு
சங்கு ஒளிர் முன் கையர் தம் இடையேஅங்கு இடு பலி கொளுமவன், கோபப்பொங்கு அரவு ஆடலோன், புவனி ஓங்கஎங்கும் மன், இராமனது ஈச்சரமே.
உரை

ஒளிவீசும்‌ சங்கு வளையல்களை முன்‌ கைகளில்‌ அணிந்துள்ள முனிபன்னியர்‌ வாழும்‌ வீதிகளிடையே சென்று அங்கு அவர்கள்‌ இடும்‌ பலியை மகிழ்வோடு ஏற்றுக்‌ கொள்பவன்‌. சினம்‌ பொங்கும்‌ பாம்பைப்‌ பிடித்து ஆடுபவன்‌. உலக மக்கள்‌ உயர்வு பெற எங்கும்‌ நிறைந்திருப்பவனான சிவபெருமானின்‌ தலம்‌ இராமனதீச்சரம்‌ ஆகும்‌.

2

சந்தநன் மலரணி தாழ்சடையன்தந்தம தத்தவன் தாதையோதான்அந்தமில் பாடலோன் அழகன்நல்லஎந்தவன் இராமன தீச்சரமே.
சொற்பிரிப்பு
சந்த நல்மலர் அணி தாழ்சடையன்,தந்த மதத்தவன் தாதையோ தான்,அந்தம் இல் பாடலோன், அழகன், நல்லஎம் தவன், இராமனது ஈச்சரமே.
உரை

அழகிய நல்ல மலர்களை அணிந்து தாழ்ந்து தொங்கும்‌ சடையினை உடையவன்‌. தந்தத்தையும்‌ மதத்தையும்‌ உடைய விநாயகப்‌ பெருமானின்‌ தந்‌தை. இவன்‌ முடிவற்ற இசைப்பாடல்களைப்‌ பாடுபவன்‌. பேரழகன்‌. மிக நல்லவன்‌. எங்கள்‌ தவப்பேறாய்‌ விளங்கும்‌ சிவபெருமானின்‌ தலம்‌ இராமனதீச்சரம்‌ ஆகும்‌.

3

தழைமயி லேறவன் தாதையோதான்மழைபொதி சடையவன் மன்னுகாதிற்குழையது விலங்கிய கோலமார்பின்இழையவன் இராமன தீச்சரமே.
சொற்பிரிப்பு
தழை மயில் ஏறவன் தாதையோ தான்,மழை பொதி சடையவன், மன்னு காதில்குழை அது விலங்கிய கோல மார்பின்இழையவன், இராமனது ஈச்சரமே.
உரை

அழகிய தோகையோடு கூடிய ஆண்‌ மயில்மீது ஏறிவரும்‌ முருகப்‌ பெருமானின்‌ தந்‌தை சிவபெருமான்‌. அவன்‌ உலகிற்கு நீர்‌ வளம்‌ தரும்‌ கங்கையைச்‌ சடையில்‌ அணிந்திருப்பவன்‌. தனது காதில்‌ நிலை பெற்று விளங்கும்‌ குழையை அணிந்திருப்பவன்‌. அழகிய திருமார்பில்‌ முப்புரிநூலை அணிந்தவனான சிவபெருமானின்‌ தலம்‌ இராமனதீச்சரம்‌ ஆகும்‌.

4

சத்தியு ளாதியோர் தையல்பங்கன்முத்திய தாகிய மூர்த்தியோதான்அத்திய கையினில் அழகுசூலம்வைத்தவன் இராமன தீச்சரமே.
சொற்பிரிப்பு
சத்தியுள் ஆதி ஓர் தையல் பங்கன்,முத்தி அது ஆகிய மூர்த்தியோ தான்,அத்திய கையினில் அழகு சூலம்வைத்தவன், இராமனது ஈச்சரமே.
உரை

சக்திகளின்‌ முதல்வியாக விளங்கும்‌ உமையம்மையை ஒரு பாகமாகக்‌ கொண்டவன்‌ சிவபெருமான்‌. அவன்‌ எல்லா உயிர்களுக்கும்‌ முக்திப்‌ பேறான கடவுளாக விளங்குபவன்‌. தீயேந்திய கையை உடையவன்‌. சங்கார கிருத்தியஞ்‌ செய்யும்‌ தீ ஏந்திய திருக்கரத்தில்‌ அழகுக்காகக்‌ சூலத்தைத்‌ தாங்கி இருப்பவனான சிவபெருமானின்‌ தலம்‌ இராமனததீச்சரம்‌ ஆகும்‌.

5

தாழ்ந்த குழற்சடை முடியதன்மேல்தோய்ந்த இளம்பிறை துளங்குசென்னிப்பாய்ந்தகங் கையொடு படவரவம்ஏய்ந்தவன் இராமன தீச்சரமே.
சொற்பிரிப்பு
தாழ்ந்த குழல் சடைமுடி அதன்மேல்-தோய்ந்த இளம்பிறை துளங்கு சென்னிப்பாய்ந்த கங்கையொடு பட அரவம்ஏய்ந்தவந் இராமனது ஈச்சரமே.
உரை

சிவபெருமான்‌, தனது தாழ்ந்த கூந்தலில்‌ உள்ள சடைமுடியின்மேல்‌ அழகு தோய்ந்த இளம்பிறையை அணிந்திருப்பவன்‌. திருமுடியில்‌ பாய்ந்து வரும்‌ கங்கை, படம்‌ பொருந்திய பாம்பு ஆகியவற்றையும்‌ சூடிய சிவபெருமானின்‌ தலம்‌ இராமனதீச்சரம்‌ ஆகும்‌.

6

சரிகுழல் இலங்கிய தையல்காணும்பெரியவன் காளிதன் பெரியகூத்தைஅரியவன் ஆடலோன் அங்கையேந்தும்எரியவன் இராமன தீச்சரமே.
சொற்பிரிப்பு
சரிகுழல் இலங்கிய தையல் காணும்பெரியவன், காளிதன் பெரிய கூத்தைஅரியவன், ஆடலோன், அங்கை ஏந்தும்எரியவன், இராமனது ஈச்சரமே.
உரை

பிடரியின்‌ மேல்‌ விளங்கும்‌ சுருண்ட கூந்தலை உடைய உமையம்மை தன்‌ நடனத்தை கண்டு அனுபவிக்கத்‌ தன்‌ அருகில்‌ வைத்து அருள்‌ செய்த பெரியன்‌ சிவபெருமான்‌. இவன்‌ காளியின்‌ பெரிய கூத்திற்கு போட்டியிட்டும்‌ அவளால்‌ அறிதற்கு அரியவனாய்‌ நடனமாடுபவன்‌. அழகிய திருக்கையில்‌ எரி ஏந்தி விளங்குபவனாகிய சிவபெருமானின்‌ தலம்‌ இராமனதீச்சரம்‌ ஆகும்‌.

7

மாறிலா மாதொரு பங்கன்மேனிநீறது ஆடலோன் நீள்சடைமேல்ஆறது சூடுவான் அழகன்விடைஏறவன் இராமன தீச்சரமே.
சொற்பிரிப்பு
மாறு இலா மாது ஒருபங்கன், மேனிநீறு அது ஆடலோன், நீள்சடைமேல்ஆறு அது சூடுவான், அழகன், விடைஏறவன், இராமனது ஈச்சரமே.
உரை

தனது அழகிற்கு ஒப்பிடுமாறு யாரும்‌ இல்லாத உமையம்மையை ஒரு பாகமாகக்‌ கொண்டிருப்பவன்‌ சிவபெருமான்‌. அவன்‌ தன்‌ திருமேனியில்‌ திருநீற்றை அணிந்திருப்பவன்‌. நீண்ட சடைமுடியின்மேல்‌ கங்கையைச்‌ சூடியிருப்பவன்‌. பேரழகன்‌. விடைமீது ஏறிவருபவன்‌. இவன்‌ விரும்பி இருக்கும்‌ தலம்‌ இராமனதீச்சரம்‌ ஆகும்‌.

8

தடவரை அரக்கனைத் தலைநெரித்தோன்படவர வாட்டிய படர்சடையன்நடமது வாடலான் நான்மறைக்கும்இடமவன் இராமன தீச்சரமே.
சொற்பிரிப்பு
தடவரை அரக்கனைத் தலை நெரித்தோன்,பட அரவு ஆட்டிய படர் சடையன்,நடம் அது ஆடலான், நால்மறைக்கும்இடமவன், இராமனது ஈச்சரமே.
உரை

பெரிய கயிலை மலையைப்‌ பெயர்த்த இராவணனின்‌ தலையை நெரித்தவன்‌. படம்‌ பொருந்திய பாம்பை ஆட்டி மகிழ்பவன்‌. விரிந்த சடைமுடியை உடையவன்‌. திருநடனம்‌ ஆடுபவன்‌. வேதங்களான நான்மறைக்கும்‌ இடமாக ஆயவன்‌ சிவபெருமான்‌. இவன்‌ விரும்பி எழுந்தருளிய தலம்‌ இராமனதீச்சரம்‌ ஆகும்‌.

9

தனமணி தையல்தன் பாகன்றன்னைஅனமணி அயன்அணி முடியுங்காணான்பனமணி அரவரி பாதங்காணான்இனமணி இராமன தீச்சரமே.
சொற்பிரிப்பு
தனம் அணி தையல் தன் பாகன் தன்னை,அனம் அணி அயன் அணிமுடியும் காணான்;பன மணி அரவு அரி பாதம் காணான்;இன மணி இராமனது ஈச்சரமே.
உரை

அழகே தனபாரங்களை உடைய உமையம்மையின்‌ கணவன்‌ சிவபெருமான்‌ அன்னமாகத்‌ தன்னை மாற்றிக்‌ கொண்ட பிரமனாலும்‌, திருமுடியைக்‌ கண்டு பிடிக்க முடியாதவன்‌. பாம்பின்‌ படத்தில்‌ மணிகளை உடைய ஆதிசேடனாகிய அணையில்‌ துயிலும்‌ திருமாலாலும்‌, திருவடியைக்‌ கண்டுபிடிக்க முடியாதவன்‌. இவர்கள்‌ இருவரும்‌ வணங்க அருள்‌ புரிந்தவனாகிய சிவபெருமானின்‌ தலம்‌ இராமனதீச்சரம்‌ ஆகும்‌.

10

தறிபோலாஞ் சமணர்சாக் கியர்சொற்கொளேல்அறிவோரால் நாமம் அறிந்துரைமின்மறிகையோன் தன்முடி மணியார்கங்கைஎறிபவன் இராமன தீச்சரமே.
சொற்பிரிப்பு
தறி போல் ஆம் சமணர் சாக்கியர் சொல் கொளேல்!அறிவோர் அரன் நாமம் அறிந்து உரைமின்!மறி கையோன், தன் முடி மணி ஆர் கங்கைஎறியவன், இராமனது ஈச்சரமே.
உரை

மரத்தால்‌ செய்யப்பட்ட தடிபோன்று, அறிவற்ற சமண புத்தர்களின்‌ பேச்சுக்களைக் ‌ கேளாதீர்கள்‌. மெய்ஞ்ஞானியர்கள்‌ மூலமாக இறைவனின்‌ திருப்பெயரை அறிந்து கொண்டு வாயால்‌ சொல்வீர்களாக. இளமான்‌ கன்றை கையில்‌ ஏந்தியும்‌, தனது முடியில்‌ மணிகளோடு கூடிய கங்கை நதி அலைமோதுபவனாய்‌ எழுந்தருளி இருக்கும்‌ பெருமானின்‌ தலம்‌ இராமனதீச்சரம்‌ ஆகும்‌. அங்கு சென்று வழிபடுவீர்களாக.

11 Unavailable

பாடல் கிடைக்கப் பெறவில்லை

தேன் மலர்க் கொன்றை யோன்................ முந்தமக்கூனமன்றே.இப்பதிகத்தில் 11-ம் பாடல் வரிகள் சில கிடைக்கப்பெறவில்லை.
சொற்பிரிப்பு
தேன் மலர்க் கொன்றை யோன்.........உந்தமக்கு ஊனம் அன்றே.இப்பதிகத்தில் 11-ம் பாடல் வரிகள் சில கிடைக்கப்பெறவில்லை.
உரை

தேன்‌ பொருந்திய கொன்றை மாலையைச்‌ சூடியிருப்பவன்‌

திருச்சிற்றம்பலம்