திருவல்லம்

சிவபெருமான்‌ அசுரர்களின்‌ கோட்டையான முப்புரங்களையும்‌ தீயில்‌ மூழ்குமாறு செய்து அழித்தவன்‌. தனது தாழ்ந்து தொங்கும்‌ சடையின்மீது கங்கையைத்‌ தரித்தவன்‌. வேதங்களை அருளிச்‌ செய்தவன்‌. அவற்றின்‌ பொருள்களை ஆறு அங்கங்களுடன்‌ தெளிவாக உணர்த்தியவன். இப்பெருமான் உறைந்திருக்கும் இடம் திருவல்லமாகும்.

சிவபெருமான்‌ உலக உயிர்களுக்குத்‌ தாய்‌ போன்று இருப்பவன்‌ தனக்கு‌ யாரையும் உவமை சொல்ல முடியாத பரிசுத்தன்‌. தூய மதியை முடியில் சூடியிருப்பவன்.‌ எல்லாப்‌. பொருளுமாக ஆனவன்‌. ஞானம்‌ கைவரப்‌ பெறாத போகிகள் ஆன தேவர்களுக்கும் மானசீலராக முனிவர்‌ முதலானோர்க்குத்‌ தொலையாக இருப்பவன்‌ இப்பெருமான்‌ உறைந்திருக்கும்‌ இடம்‌ திருவல்லம்‌ ஆகும்‌.

சிவபெருமான்‌ மன்மதனின்‌ அழகு கெடுமாறு அவனை நெற்றிக்‌ கண்ணால்‌ பார்த்து எரித்து அழித்தவன்.‌ யானையின்‌ தோலை உரித்துப்‌ போர்த்தவன்‌. ஆணவத்தால்‌ ஆர்ப்பரித்த பிரமனின்‌ ஐந்து தலைகளில்‌ ஒன்றை முன்னொரு காலத்தில்‌ பறித்‌து அத்தலையின்‌ ஓட்டைக்‌ கையில்‌ உண்கலனாகச்‌ சேர்த்தவன்‌. இப்பெருமான் உறைந்திருக்கும்‌ இடம்‌ திருவல்லம்‌ ஆகும்‌.

கொய்த அழகிய மலரை கொண்டு, மனம் ஒருமித்து தூவி போர்றி வழிபடுபவர்களுக்கு திருமகள் செல்வச் செழிப்பினை இணங்கி அருளுமாறு செய்ய வைத்தும், உலகம் உய்யபெருமழை பெய்யுமாறு செய்து பஞ்சத்தைப்‌ போக்கும்‌ ஈசன்‌ உறையும்‌ இடம்‌ திருவல்லம்‌ ஆகும்‌.

சிவபெருமானது திருவடியே சரணம்‌ என்று சார்ந்து உள்ள அடியவர்களுக்கு எல்லாவிதமான இன்பங்களும்‌ தழைக்கும்‌ வண்ணம்‌ செய்கின்றான்‌. உமையம்மையோடு கூடி அருள்‌ வழங்குபவன்‌: தேர்ந்த ஞானியரையும்‌ தேடுபவர்களையும்‌ தொடர்ந்து இடைவிடாமல்‌ தேடச்‌ செய்து, அவர்களுக்கு உள்நின்று அருள்‌ செய்பவன்‌. இப்பெருமான்‌ உறைந்திருக்கும்‌ இடம்‌ திருவல்லம்‌ ஆகும்.

தன்னைச்சினந்து வந்த யமனை இடக்காலால் உதைத்தவன் தன்னை வணங்கி எழுந்த மார்க்கண்டேயனுக்கு உண்மைப் பொருளாய் எதிர்‌ நின்று உணர்த்தி அருள்‌ செய்தவன்‌. நன்னெறியிலிருந்து பிறழ்ந்து தடுமாறிய தக்கன்‌ செய்த வேள்வியை முன்னொரு காலத்தில்‌ சிதைக்க வீரபத்திரனை ஏவியவன்‌ சிவபெருமான்‌ இப்பெருமான்‌ உறைந்திருக்கும்‌ இடம்‌ திருவல்லம்‌ ஆகும்‌

தனது வலிமைக்கு இது எம்மாத்திரம்‌ என்று இகழ்ந்து, அரிய கயிலை மலையை எடுத்து அப்புறப்படுத்தும்‌ பொருட்டு முயற்சி செய்த இராவணனை நெரித்த திருவடியை உடையவன்‌. அந்தத்‌ திருவடியையே எப்பொழுதும்‌ சரணடைந்து தேடுபவர்களுக்கு அவர்கள்‌ உள்ளத்திலேயே ஒளியாக விளங்குபவன்‌. இப்பெருமான்‌ உறைந்திருக்கும்‌ இடம்‌ திருவல்லம்‌ ஆகும்‌.

சிவபெருமான், யாவற்றுக்கும் முதல் பொருளாய்‌ இருத்தல்‌ போன்று யாவர்க்கும்‌ பெரியவனாய்‌ விளங்குபவர்‌. அறிவிற்‌ சிறியவர்கள்‌ சிந்தித்து உணர்தற்கு இயலாதவன்‌. அரிய வேதங்களும் அவற்றின் அங்கங்களும் ஆனவன். திருமாலாலும், பிரம்மாவாலும் காண இயலாதவன். முனைப்படங்கிய முத்தான்மாக்களுக்கு விளங்கி நிற்பவன். இப்பெருமான் எழுந்தருளியிருக்கும்‌ வளமான நகரம்‌ திருவல்லம்‌ ஆகும்‌.

சமணர்களும்‌ புத்தர்களும்‌ அறம்‌ குன்றிய உரைகளைக்‌ கூறுகின்றனர்‌. ஐம்புலன்களை வென்ற சான்றோர்களுக்கு எங்கும்‌ விளங்கித்‌ தோன்றுபவனாகிய சிவபெருமானின்‌ உறைவிடம்‌ திருவல்லம்‌ ஆகும்‌.

சிறந்த அறிவுடையவர்‌ வாழும்‌ திருவல்லத்தைத்‌ தரிசித்துச்‌ சென்று, நற்றமிழில்‌ வல்ல ஞானசம்பந்தன்‌ இப்பதிகத்தைப்‌ பாடினார்‌. குற்றமற்ற இச்செந்தமிழ்ப்‌ பதிகத்தைப்‌ பாடவல்லவர்கள்‌ சிவபெருமானின்‌ அழகிய திருவடிகளை அடைவர்‌.