திருச்சிவபுரம்

சிவபுரம்‌ என்ற நகரமானது, இனிய ஒலியும்‌, இசையும்‌ பொருந்திய யாழ்‌ இசை ஒலிக்குமாறு அதனைத்‌ தனது கரத்தில்‌ ஏந்தியவாறு விளங்கும்‌ சமர்த்தரான சிவபெருமானின்‌ நகரமாகும்‌. இந்த நகரம்‌ பழமையான காவிரி ஆற்றின்‌ நீர்‌ வந்து அழகிய கரையினை மோதுமாறு அமைந்த, அதன்‌ தென்கரையில்‌ அமைந்துள்ளது.

சிவபுரம்‌ என்ற நகரமானது, முற்காலத்தில்‌ மார்க்கண்டேயன்‌ என்ற பாலனுக்காக, யமன்‌ அழியுமாறு அவனை காலால்‌ உதைத்தருளிய புனிதரான சிவபெருமானின்‌ நகரமாகும்‌. இந்த நகரம்‌, தனது கோரைப்‌ பல்லால்‌ வெற்றி பெறும்‌, வெள்ளைப்‌ பன்றியாக அவதரித்த திருமால்‌, முற்காலத்தில்‌ சிவன்‌ திருவடியைப்‌ பணிந்து வழிபட்ட நகரமாகும்‌.

சிவபுரம்‌ என்ற நகரமானது, மலைமகளாகிய பார்வதி தேவி அஞ்சுமாறு மதம்‌ பொருந்திய யானை ஒன்று அவள்‌ எதிரே ஓடி வந்தது. உடனே சிவபெருமான்‌ அதன்‌ எதிரே சென்று அதனைக்‌ கொன்று, அதன்‌ தோலை உரித்துப்‌ போர்த்திக்‌ கொண்ட அழகிய சிவபெருமானின்‌ நகரமாகும்‌. இந்நகரம்‌ அலைகள்‌ நிறைந்த அரிசிலாற்றின்‌ கரை அருகே மலைபோன்ற மதில்களை உடையதுமாக விளங்குகின்றது.

சிவபுரம்‌ என்ற நகரமானது, மண்‌, நீர்‌, தீ, காற்று, ஆகாயம்‌ என்ற ஐம்பூதங்களாக பொருந்தி விளங்கும்‌ விகிர்தனான சிவபெருமானின்‌ நகரமாகும்‌. இந்நகரம்‌, பண்‌ இசை பொருந்திய குரலோடு வண்டுகள்‌ தோண்ட, செண்பகப்‌ பூக்கள்‌ மலரும்‌ பொழில்களால்‌ சூழப்பட்டுள்ளது.

ஒப்பற்ற அழகால்‌ தனித்தன்மை பெற்ற உமையம்மையைத்‌ தனது திருமேனியில்‌ ஒருபாகமாக உடையவனாகிய சிவபெருமான்‌ விரும்பும்‌ குளிர்ச்சியான நகரம்‌ சிவபுரம்‌ ஆகும்‌. இச்சிவபுரம்‌, மணம்‌ வீசுகின்ற நல்ல குராமலரை, வண்டுகள்‌ கிண்டி அதன்‌ தேனை உண்டு மகிழ்ந்து விளங்கும்‌ பொழில்களால்‌ சூழப்பட்டுள்ள நகரம்‌ ஆகும்‌.

பகைமை உணர்வோடு மாறுபட்டுத்‌ தன்னை எதிர்த்து வந்த அசுரர்களின்‌ - முப்புரங்களை எரித்து நீறாக்கிய பரிசுத்தனான சிவபெருமானின்‌ நகரம்‌ சிவபுரம்‌ ஆகும்‌. இது, உழவர்களோடு நாற்று நடும்‌ மகளிர்‌ பலரைக்‌ கொண்ட, சேற்று வளம்‌ மிக்க வயல்களால்‌ அழகு பெறும்‌ நகரமாகும்‌.

பசுவிலிருந்து கிடைக்கும்‌ பால்‌, தயிர்‌ முதலிய ஐந்து பொருள்களை விரும்பும்‌ சிவபெருமான்‌ உமையம்மையோடு கூடி மகிழ்ந்து இருக்கும்‌ பெரிய நகரம்‌ சிவபுரம்‌ ஆகும்‌. இந்நகரம்‌, தேனைப்‌ பருகுவதற்காக வண்டுகள்‌ வந்து மொய்க்கும்‌ மலர்களை உடைய பொய்கைகளில்‌, அன்னச்‌ சேவல்‌ தன்‌ பெடையை புல்லி மகிழும்‌ அழகுடைய நகரம்‌ ஆகும்‌.

அழகிய கயிலை மலையைப்‌ பெயர்க்க முயற்சி செய்த வலிமை மிகுந்த இராவணனின்‌ முழுவலிமையையும்‌ அடக்கிய முதல்வனாகிய சிவபெருமான்‌ விரும்பித்‌ தங்கும்‌ ஊர்‌ சிவபுரம்‌ ஆகும்‌. இந்நகரில்‌, விழாக்காலங்களில்‌ உயர்த்திய வெண்மையான கொடிகள்‌ வானில்‌ நிறைந்து, மேகத்தை அணுகும்‌. அவைகள்‌ கரிய மேகங்களோடு கலந்து நிற்கும்‌ வளமை மிகுந்த நகரமாகும்‌.

சங்கு ஏந்திய கையினை உடைய திருமாலும்‌, நான்முகனும்‌ அடிமுடியைத் ‌தேடியும்‌ அறியப்‌ பெறாத சிவபெருமானின்‌ நகரம்‌ சிவபுரம்‌ ஆகும்‌. இந்நகரத்தில்‌ இரவிலும்‌ பறவைகள்‌ கமுக மரங்களில்‌ தங்கிச்‌ செங்கனிகளை நுகரும்‌ வளமை மிக்க நகரமாகும்‌

உண்கலம்‌, கமண்டலம்‌ ஆகியவற்றை கையில்‌ ஏந்தி, அழுக்குடைய உடம்போடு அறிவற்ற பிறச்‌ சமயத்தினரை விலக்கும்‌ சிவபெருமானின்‌ நகரம்‌ சிவபுரம்‌ ஆகும்‌. இந்நகரம்‌ பழமையான காலத்திலிருந்தே காவிரி நீரால்‌ வளமை சேர்க்கப்பட்ட நகரம்‌ ஆகும்‌.

சிவபெருமான்‌ எழுந்தருளியுள்ள சிவபுரம்‌ ந கரைப்‌ போற்றி, கவுணிய குலப்பதியாகிய காழியர்‌ தலைவன்‌ ஞான சம்பந்தன்‌ இப்பதிகத்தைப்‌ பாடினார்‌. தவத்தைத்‌ தரும்‌ இத்தமிழ்ப்‌ பதிகத்தை ஓதவல்லவர்கள்‌ புதுமைகள்‌ பலவும்‌ பெற்று முடிவில்‌ சிவகதி சேர்வர்‌.