திருக்கடைமுடி

சிவபெருமான்‌ வேதத்தின்‌ பொருளாய்‌ விளங்குபவன்‌. அறத்தின்‌ வடிவு உடையவன்‌. அமுதமாக இனியவன்‌. உலகத்தின்‌ மூத்தவனும்‌ இளையவனும்‌ அவனே. உலக மக்கள்‌ யாவரும்‌ இவன்‌ ஒருவனையே போற்றித்‌ தியானித்து வழிபடுகின்றனர்‌. இப்பெருமான்‌ எங்கு இருக்கின்றான்‌ என நீர்‌ வினவினால்‌, அவன்‌ தியானிப்பவரின்‌ உள்ளத்திலும்‌, வளமான நகரமாகிய கடைமுடியிலும்‌ எழுந்தருளியுள்ளான்‌. அங்கு சென்று வழிபடுவீர்களாக!

சிவபெருமான்‌ தனது! திருமுடியில் ஒளியால்‌ விம்மித்‌ தோன்றும்‌ பிறைமதியையும்‌, அலைகளால் மோதும்‌ கங்கையையும்‌ கொண்டிருப்பவர்‌. புலித்தோலை தனது இடையில்‌ அணிந்திருப்பவர்‌. இப்பெருமான் எழுந்தருளியுள்ள தலமானது அலைகளுடன்‌ நுரைகள்‌ பொருந்திய தெளிந்த சுனைநீர்‌ ௧ரைகளில்‌ வந்து மோதும்‌ வளமுடைய நகரமான கடைமுடியாகும்‌.

சிவபெருமான்‌ கல்லால மரநிழலில்‌ இளமையான மதி, அரவு, கங்கை ஆகியனவற்றைச்‌ சூடிய சடைமுடியுடன்‌ விளங்குகின்றார்‌. அழகிய திருவெண்ணீறை உடல்‌ முழுதும்‌ பூசி உள்ளார்‌. நல்ல மணங்கமமும்‌ மாலைகளையும்‌ மார்பில்‌ அணிந்துள்ளார்‌. மணம்‌ கமழும்‌ திருவடியை உடையவர்‌. இப்பெருமானுடைய தொழுது வணங்குதற்குரிய வளமுடைய நகரம்‌ கடைமுடியாகும்‌.

சிவபெருமான்‌ தேர்ந்து எடுக்கப்பட்ட அழகிய மணம்‌ கமழும்‌ கொன்றை மலர்‌ மாலையை அணிந்திருப்பவர்‌. விடம்‌ பொருந்திய கண்டத்தை உடையவர்‌. படம்‌ பொருந்திய பாம்பையும்‌, மான்‌, மழு, வாள்‌ ஆகியனவற்றையும்‌ கையில்‌ ஏந்திருப்பவர்‌. விளக்கமாய்‌ உள்ள வேதங்களும்‌ முதல்வனாய்‌ உள்ள இப்பெருமானின்‌ ஊரும்‌ இடமும்‌ கடைமுடியாகும்‌.

சிவபெருமான்‌ ஒலி வடிவானவன்‌. பொருட்பிரபஞ்ச வடிவானவன்‌. இவையிரண்டிற்கும்‌ அடியாகிய சுத்தமும்‌ அசுத்தமும்‌ ஆன மாயையும்‌ அவன்‌. உலகம்‌ முழுவதிலும்‌ ஊடுருவி இருப்பவன்‌. சடைமுடியில்‌ பிறையை அணிந்திருப்பவன்‌. கையில்‌ தீயை ஏந்தியிருப்பவன்‌. விடம்‌ பொருந்திய நீல கண்டன்‌. உலகமெல்லாம்‌ இவனே இறைவன்‌ என்று போற்றப்படுபவனாக எழுந்தருளியுள்ள வளமான நகரம்‌ கடைமுடியாகும்‌.

பாம்பின்‌ படம்‌ போன்ற அழகிய அல்குலையும்‌ பலவகையான வளையல்களையும்‌ அணிந்த கைகளை உடைய உமாதேவியை ஒரு பாகமாக வைத்திருப்பவர்‌ சிவபெருமான்‌ மேற்குத்‌ இசையில்‌ தோன்றும்‌ பிறைமதியைச்‌ சடைமுடியில்‌ சூடியிருப்பவர்‌. இக்கடவுளின்‌ வளமான நகரம்‌ கடைமுடியாகும்‌.

சிவபெருமானார்‌ தனது திருநீறு அணிந்த மார்பின்கண்‌ முறுக்கேறிய பூணூலை அணிந்திருப்பவர்‌. திருவடிகளில்‌ பொருந்திய அழகிய கழல்களை உடையவர்‌. இப்பெருமான்‌ எழுந்தருளியிருக்கும்‌ இடமானது குளிர்ந்த சுனை நீரில்‌ படர்ந்திருக்கும்‌ கொடிகளில்‌ பூத்துக்‌ குலுங்கும்‌ மலர்களின்‌ மணம்‌ கமழும்‌ வளமான நகரமான கடைமுடியாகும்‌.

இராவணனுக்கு முதலில்‌ கருணை செய்யாமல்‌ துன்புறச்‌ செய்தவர்‌. பின்பு அவன்‌ சிவன்‌ திருவடியே சரணம்‌ என்று கூறிய அளவில்‌ ஆதரவு காட்டி அருள்‌ செய்தவர்‌. இப்பெருமானான சிவபெருமான்‌ பேரன்புடன்‌ விரும்பி எழுந்தருளியிருக்கும்‌ வளமான நகரம்‌ கடைமுடியாகும்‌.

திருமாலும்‌ பிரமனும்‌ சிவபெருமானது அடிமுடியைக்‌ காணாதவராக அவரை அணுகி, “அருள்‌ செய்க” என்று போற்றி வழிபட்டனர்‌. அவர்‌ தனது சடைமுடியில்‌ கங்கையை அணிந்த பேராற்றல்‌ மிக்கவர்‌. அவருடைய தலமாக விளங்குவது, காவிரியின்‌ அருகில்‌ உள்ள கடைமுடியாகும்‌.

நீரில்‌ பலகாலம்‌ மூழ்குதலும்‌, தங்களது முடியைப்‌ பறித்தலுமாகிய புத்த, சமண விரதங்கள்‌ பொய்யானவை. ஆராய்ந்து பார்க்கையில்‌ இவை இன்பத்தைத்‌ தரா. ஒளி பொருந்திய நெற்றியை உடைய உமாதேவியை ஒருபாகமாக வைத்துள்ள கண்ணுதலோனின்‌ (சிவபெருமானின்‌) வளமான நகரம்‌ கடைமுடியாகும்‌.

அழகு பொருந்திய காவிரி ஆற்றின்‌ அலைகளின்‌ நீர்‌ முறையாகச்‌ சென்று அடையும்‌ தலம்‌ கடைமுடியாகும்‌. இங்கு எழுந்தருளி இருக்கும்‌ சிவபெருமானின்‌ திருவடிப்‌ பெருமைகளை நன்கு உணர்ந்த ஞானசம்பந்தன்‌ இப்பதிகத்தைப்‌ பாடினார்‌. இனிய தமிழாகிய இத்திருப்பதிகப்‌ பாடல்களை ஓதி வழிபடுவோர்க்கு இன்பம்‌ பிறக்கும்‌.