திருச்சிரபுரம்

சிவபெருமான்‌ கச்சணிந்த அழகிய தனபாரங்களை உடைய உமையம்மையை ஒரு பாகம்‌ கொண்டவர்‌ ஆவார்‌. கங்கை நதியைச்‌ சடைமுடியில்‌ அணிந்திருக்கும்‌ நிமலர்‌. இப்பெருமான்‌ விரும்பி உறையும்‌ இடமானது, மேகங்கள்‌ தோயுமாறு வானளாவிய மணம்‌ கமழும்‌ பொழில்‌ சூழ்ந்துள்ளதும்‌, அழகிய சிறப்புள்ளதும்‌, வளமையான வயல்வெளிகளை உடையதுமான சிரபுரம்‌ ஆகும்‌.

சிவபெருமான்‌, ஆறு அங்கங்களோடு கூடிய அரிய வேதங்கள்‌ நான்கையும்‌ அருளிச்‌ செய்தவர்‌. திங்கள்‌, பாம்பு ஆகியவற்றைத்‌ திருமுடியில்‌ அணிந்தவராக விளங்குபவர்‌. இப்பெருமான்‌ உமையம்மையோடு மகிழ்ந்து உறைபவராக விளங்கும்‌ நகரமானது, செங்கயல்‌ மீன்கள்‌ துள்ளி விளையாடும்‌ வயல்களைச்‌ சூழ்ந்துள்ள சிரபுரம்‌ ஆகும்‌.

சிவபெருமான்‌, பலவகையான கிரீடங்களை அணிந்த வானோர்களிடம்‌ மிக்க பரிவுடையவர்‌. வானவெளியில்‌ திரிந்த அசுரர்களின்‌ முப்புரங்களும்‌ தீயில்‌ வெந்து போகுமாறு, வரிந்து கட்டிய கொடிய வில்லைப்‌ பிடித்து, கொல்லும்‌ அம்பினை ஆராய்ந்து தொடுத்தவர்‌. இப்பெருமான்‌ உறையும்‌ நகரமானது வளமான சிரபுரம்‌ ஆகும்‌.

சிவபெருமான்‌, திருநீறு அணிந்த திருமேனியை உடையவர்‌. வளைவாக நீண்ட பிறைமதியோடு கங்கையை அணிந்த சடையினர்‌. அழகிய அணிகலன்களை ஆபரணமாக அணிந்த உமையம்மையை ஒருபாகமாகக்‌ கொண்டவர்‌, இப்பெருமான்‌ இனிதாக உறையும்‌ குளிர்ச்சியான நகரமானது, சேற்று மண்ணால்‌ வளமான வயல்கள்‌ சூழ்ந்த சிரபுரம்‌ ஆகும்‌

வெல்லுவதற்கு அரிய வலிமையை உடைய அசுரர்களின்‌ முப்புரங்களும்‌ அழியுமாறு தனது கணையைத்‌ தொடுத்து எரித்த சங்கரனான சிவபெருமானுடைய ஊர்‌ சிரபுரம்‌ ஆகும்‌. இது, குருந்த மரத்தில்‌ கொடிகளாகப்‌ படரும்‌ மாதவி என்னும்‌ குருக்கத்தி செடிகள்‌ நிறைந்த அழகிய புதர்களால்‌ சூழப்பட்ட சிரபுரம்‌ என்னும்‌ நகரமாகும்‌.

சிவபெருமான்‌ கலைகளாக விளங்குபவர்‌. வேதங்களை அருளியவர்‌. காற்று, தீ, மலை, விண்‌, மண்‌ ஆகியவற்றில்‌ ஊடுருவி இருப்பவர்‌. கொடிகள்‌ கட்டப்பட்ட அசுரர்களின்‌ முப்புரங்களை மதில்களோடு கூட்டாக அழிக்க, மேரு மலையை வில்லாக ஏந்திய, கொலையாளன்‌. இப்பெருமான்‌ உறையும்‌ வளமான நகர்‌ சிரபுரம்‌ ஆகும்‌.

சிவபெருமான்‌ வானத்தில்‌ உலவும்‌ பிறைமதியோடு ஊமத்தம்‌ மலரையும்‌ தனது முடியில்‌ சூடியிருப்பவர்‌. அசுரர்களின்‌ முப்புரங்களை எய்து அழித்த, சிவன்‌ இவர்‌ ஆவார்‌. இப்பெருமான்‌ உறையும்‌ இடமானது, காடுகளில்‌ வாழும்‌ ஆண்‌ மயில்கள்‌ பெண்‌ மயில்களோடு கூடி மகிழும்‌ இனிமையும்‌, அழகும்‌ உடைய பொழில்கள்‌ நிறைந்த சிரபுரம்‌ ஆகும்‌.

சிவபெருமான்‌, தன்னோடு உடன்படாமல்‌ மறுத்த அசுரர்களின்‌ முப்புரங்களும்‌ ஒருசேரக்‌ கெட்டு அழியுமாறு சினந்தவர்‌. அரக்கனாகிய இராவணனின்‌ தலை, தோள்‌ ஆகியவற்றை நெரித்தவர்‌. மிக்க சினமுடைய இயமனை அழித்தவர்‌. இப்பெருமான்‌ உறையும்‌ வளமையான நகரமானது சிரபுரம்‌ ஆகும்‌.

தாமரை மலர்‌ மேல்‌ உறையும்‌ நான்முகனும்‌, திருமாலும்‌ தனது திருவடிகளைத்‌ தொழுது நிற்குமாறு கனல்‌ உருவமாக விண்ணுற ஓங்கி நின்றவர்‌ சிவபெருமான்‌ ஆவார்‌. விமலனான இப்பெருமான்‌ உறைந்திருக்கும்‌ இடமானது, உறுதியான நல்ல மதில்களால்‌ அழகுற அமைந்த சிரபுரம்‌ ஆகும்‌.

ஆடையில்லாது திரிந்து உழல்பவர்கள்‌ சமணர்கள்‌. விரிவான ஆடையைப்‌ போர்வையாகப்‌ போர்த்து இருப்பவர்கள்‌ புத்தர்கள்‌. இவர்களுடைய மெய்யறிவற்ற உரைகளைப்‌ பொருட்படுத்தாதீர்கள்‌. அசுரர்களின்‌ முப்புரங்களைத்‌ தீயில்‌ வேகுமாறு அழித்தவர்‌ நம்‌ சிவபெருமான்‌ என்பதை உணருங்கள்‌. இப்பெருமான்‌ எழுந்தருளிய வளமான நகர்‌ சிரபுரம்‌ ஆகும்‌.

அரிய வேதங்களின்‌ பொருளை நன்கு உணர்ந்தவர்‌ ஞானசம்பந்தன்‌. அவர்‌ அழகிய குளுமையான சிரபுரம்‌ நகரில்‌ எழுந்தருளிய சிவபெருமானின்‌ திருவடியைப்‌ போற்றிச்‌ செந்தமிழால்‌ இப்பதிகத்தைப்‌ பாடினார்‌. இப்பதிகத்தின்‌ பத்துப்‌ பாடல்களையும்‌ பொருளுணர்ந்து ஓதவல்லவர்கள்‌, செல்வத்துடன்‌ புகழ்‌ நிறைந்து ஒளியுடன்‌ திகழ்வார்கள்‌.