திருப்பாதாளீச்சரம்

சிவபெருமான்‌ தனது மின்னல்‌ போன்ற செஞ்சடைமேல்‌ விளங்கும்‌ பிறைமதியையும்‌ ஊமத்தம்‌ மலர்‌ மற்றும்‌ பொன்‌ போன்ற நிறமுடைய கொன்றை மலரையும்‌ அணிந்திருப்பவன்‌. கங்கை நதியைச்‌ சூடியிருப்பவன்‌. அழகுடைய அன்னத்தைப்‌ போன்ற நடையை உடைய உமையம்மையை தனது உடம்பில்‌ ஒரு பாகத்தில்‌ அமர்ந்திருக்க அருளியவன்‌. நாள்தோறும்‌ வேத தீதங்களைப்‌ பாடியவனாய்‌ இப்பெருமான்‌ உறைந்திருக்கும்‌ கோயில்‌ திருப்பாதாளீச்சரம்‌ ஆகும்‌.

சிவபெருமான்‌ தனது திருமுடியில்‌ கொத்தாக நீண்டு மலர்ந்துள்ள கொன்றை மலர்களோடு பிறைமதியையும்‌ சூடி இருப்பவன்‌. ஒரு-காதில்‌ வெண்மையான தோட்டையும்,‌ மறுகாதில்‌ நல்ல குழையையும்‌ அணிந்திருப்பவனாக விளங்குபவன்‌. சுடப்பட்ட திருநீற்றைப்‌ பூசியிருப்பவன்‌, ஆடும்‌ பாம்பை அணிகலனாக அணிந்து அனல்‌ ஏந்திய கையை வீசிக்‌ கொண்டு இருப்பவனாக‌ விளங்குபவன்‌. வேதப்‌ பாடல்களைப்‌ பாடுதலில்‌ இனியனாய்‌ விளங்கும்‌ இப்பெருமான்‌ உறைந்திருக்கும்‌ கோயில்‌ பாதாளீச்சரம்‌ ஆகும்‌. ‌

சிவபெருமான்‌ நாகப்பாம்பையும்‌, வானில்‌ விளங்கும்‌ மதியையும்‌ தனது அழகுமிக்க செஞ்சடையில்‌ சூடியிருப்பவன்‌. உரிய காலம்‌ கழிந்தவுடன்‌ நல்ல மேருமலையின்‌ வில்லினால்‌ முப்புரங்களை எரித்து மகிழ்ந்தவன்‌. நல்ல ஆண்‌ மயில்மீது வளர்கின்ற அழகிய தோகையைப்‌ போன்ற மென்மையும்‌, தூய மொழி பேசும்‌ உமையம்மையை தன்னோடு உடனாக இடப்பாகத்தில்‌ வைத்து மகழ்ந்திருப்பவன்‌. இந்தச்‌ சிவபெருமான்‌ உறையும்‌ கோயில்‌ பாதாளீச்சரம்‌ ஆகும்‌.

சிவபெருமான்‌ நான்கு வேதங்களையும்‌ ஆறு அங்கங்களையும்‌ அருளிச்‌ செய்தவன்‌. அழகிய இனிய சொற்களைப்‌ பேசும்‌ உமையம்மையை ஒரு பாகமாக உடையவன்‌. வேதங்களைப்‌ பாடி மகிழ்பவனுமாகிய பெருமான்‌ உறையும்‌ கோயிலானது செங்கயல்‌ மீன்கள்‌ புரளும்‌ வயல்களில்‌ விளங்கும்‌ ஒளியினால்‌ தாமரை மலர்கள்‌ மலருகின்ற வயல்கள்‌ சூழ்ந்த பாதாளீச்சரம்‌ ஆகும்‌.

சிவபெருமான்‌, பலவிதமான பேய்கள்‌ நிறைந்துள்ள பெரிய சுடுகாட்டைத்‌ தனது நாடக மேடையாக எண்ணி நடனமாடுபவன்‌. கைகளில்‌ தீயையும்‌, மான்‌ மற்றும்‌ மழுவையும்‌ வைத்திருப்பவனாக விளங்குபவன்‌. தன்‌ சடைமேல்‌ தேய்ந்த பிறையும்‌, பாம்பும்‌, செழிப்புள்ள கொன்றை மலர்களோடு பாய்ந்துவரும்‌ கங்கையையும்‌ உடையவன்‌. இச்சிவபெருமான்‌ உறையும்‌ கோயில்‌ பாதாளீச்சரம்‌ ஆகும்‌.

சிவபெருமான்‌ மூன்றாவது ஒரு கண்‌ பொருந்திய நெற்றியை உடையவன்‌. சடைமுடிமீது மணம்‌ கமழும்‌ கொன்றை மலரோடு, விண்ணில்‌ உலாவும்‌ சிறந்த பிறைமதியையும்‌ உடனாக வைத்திருப்பவன்‌. தன்னால்‌ விரும்பப்‌ பெற்ற உமையம்மை பொருந்திய திருமேனியன்‌. பெரிய சுடுகாட்டை அரங்காகக்‌ கொண்டவன்‌. பண்‌ இசையோடு கூடிய பாடல்களுடன்‌ ஆடுபவனுமாகிய சிவபிரான்‌ உறைந்திருக்கும்‌ கோயில்‌ பாதாளீச்சரம்‌ ஆகும்‌.

சிவபெருமான்‌ தனது நீண்ட சடையில்‌ தளை அவிழ்ந்து மலர்ந்த ஊமத்த மலரோடு, புரண்டு கொண்டிருக்கும்‌ இள நாகம்‌, வன்னி இலை, வண்டுகளால்‌ மலர்த்தப்‌ பெறும்‌ கொன்றை, பிறைமதி ஆகியவை பொருந்தியிருப்பவனாக விளங்குபவன்‌. பகைவரான அசுரர்களின்‌ முப்புரங்களையும்‌ எரித்தவன்‌. நான்கு வேதங்களையும்‌ உரைத்தவன்‌. அவற்றைப்‌ பண்டைய இசைமரபோடு பாடி மகிழ்பவனுமான சிவபிரான்‌ உறைந்திருக்கும்‌ கோயில்‌ பாதாளீச்சரம்‌ ஆகும்‌.

நெருங்கியதும்‌ நுண்மையானதுமான இடையினை உடைய உமையம்மை அஞ்சும்படி, பழமையான கயிலை மலையை முன்னொரு காலத்தில்‌ இராவணன்‌ பெயர்க்க முயற்சித்தான்‌. அப்போது, சிவபெருமான்‌ அவனுடைய தலைகளையும்‌ தோள்களையும்‌ நெரித்தவர்‌. இவர்‌ முல்லை நிலத்து தெய்வமான திருமாலாகிய இடபத்தை விரும்புபவர்‌. குளிர்ந்த திங்களைச்‌ சடையின்கண்‌ அணிந்திருப்பவர்‌. பல்வகையான இசைப்பாடல்களைப்‌ பாடுபவனுமாகிய இச்சிவபெருமான்‌ உறைந்திருக்கும்‌ கோயில்‌ திருப்பாதாளீச்சரம்‌ ஆகும்‌.

மன்மதனை எரித்த சிவபெருமானின்‌ திருவடிகளைத்‌ தமது முயற்சியால்‌ தேடியும்‌ காண இயலாதவர்களைத்‌ தாமரை மலர்மேல்‌ உறையும்‌ அயனும்‌ திருமாலும்‌ அகன்று விட்டனர்‌. இப்பெருமான்‌ மலர்கள்‌ சூடிய கூந்தலை உடைய உமை நங்கையை தனது உடலில்‌ ஒரு பாகமாகப்‌ பொருந்தி இருப்பவர்‌. வேதப்‌ பாடல்களைப்‌ பாடும்‌ நல்ல குணத்தினனும்‌ ஆகிய இப்பெருமான்‌ உறைந்திருக்கும்‌ கோயில்‌ திருப்பாதாளீச்சரம்‌ ஆகும்‌.

காலையில்‌ சோறுண்ணும்‌ புத்தர்களும்‌ சமணர்களும்‌ கூறும்‌ பொய்யுரைகளைக்‌ கேட்காதீர்கள்‌. ஆலகால விடமுண்டு அமரர்களைக்‌ காத்த சிவபெருமானின்‌ திருவடிகளைப்‌ போற்றுங்கள்‌. மாலைக்‌ காலத்தில்‌ வண்டினங்கள்‌ தேனை உண்டு இசை பாடுகின்றன. இந்த இசையானது பாலைப்‌ பண்ணில்‌ பாடும்‌ யாழ்‌ இசை போல்‌ ஒலிக்கின்றன. இந்த இசையில்‌ மகிழ்ந்திருப்பவனுமான இப்பெருமான்‌ உறைந்திருக்கும்‌ கோயில்‌ திருப்பாதாளீச்சரம்‌ ஆகும்‌.

பொன்னால்‌ இயன்ற மாடவீடுகள்‌ நிறைந்த புகலி நகர்‌ மன்னனும்‌, தனது புகழ்‌ உலகு எங்கும்‌ பரவி உயர்ந்து விளங்கும்‌ புதல்வனுமாகியவன்‌ தமிழ்‌ ஞானசம்பந்தன்‌. பலவகையான மலர்கள்‌ பூத்துள்ள பொழில்களால்‌ சூழப்பட்ட திருப்பாதாளீச்சரத்தை நாம்‌ சென்று தரிசிக்குமாறு இவர்‌ இப்பதிகத்தைப்‌ பாடினார்‌. இன்னிசையோடு கூடிய இப்பதிகப்‌ பாடல்கள்‌ பத்தையும்‌ பாட வல்லவர்கள்‌ வாணுலகத்தின்கண்‌ இருப்பார்கள்‌.