திருக்கொடிமாடச்செங்குன்றூர்

சிவபெருமான்‌ விரிக்கப்‌ பெற்ற பூணூல்‌ திகழ்கின்ற மார்பில்‌ திருவெண்ணீற்றை அணிந்திருப்பவன்‌. பந்து பொருந்தும்‌ கைவிரல்களை உடைய உமையம்மையை தனது திருமேனியில்‌ ஒரு பாகத்தில்‌ அமர்ந்திருக்கும்படி அருளியவன்‌. பூங்கொத்துக்கள்‌ நிறைந்த பொழில்‌ சூழந்த கொடிமாடச்‌ செங்குன்றூரில்‌ எழுந்தருளி இருப்பவன்‌. இத்தகைய இறைவனைத்‌ தொழுபவர்கள்‌ தங்கள்‌ துன்பங்களை நீக்கப்‌ பெறுவர்‌.

சிவபெருமான்‌, அலைகள்‌ நிறைந்த குளிர்ந்த கங்கை நதியோடு, பாம்பினையும்‌ சடையின்கண்‌ அணிந்திருப்பவன்‌. தனது திருமேனியில்‌ மலைமகளை ஒரு பாகமாகக்‌ கொண்டிருப்பவன்‌. மலையின்கண்‌ வளரும்‌ குலைகள்‌ நிறைந்துள்ள இளவாழை மரங்களை உடைய குளிர்ந்த பொழில்கள்‌ சூழ்ந்துள்ள கொடிமாடச்‌ செங்குன்றூரில்‌ எழுந்தருளி இருப்பவன்‌. இத்தகைய தலைமகனான சிவபெருமானைத்‌ தொழுபவர்கள்‌ தங்கள்‌ வாழ்க்கையின்‌ தடுமாற்றத்தைத்‌ தவிர்த்து விடுவர்‌.

சிவபெருமான்‌ பால்போன்ற வெள்ளிய திருநீற்றைப்‌ புனைந்து விளங்கும்‌ மார்பினன்‌. பலவகை வளையல்களைக்‌ கையில்‌ நல்லமுறையில்‌ அணிந்‌தும்‌ மணம்‌ கமழும்‌ நறுமலர்களைக்‌ கூந்தலில்‌ சூடியும்‌ உள்ள உமையம்மையை ஒரு பாகமாக அமர்ந்திருக்கும்படி அருளிய கோலத்தையும்‌ உடையவன்‌. தேவர்க்கு நன்மைகள்‌ பல செய்த நீகலகண்டன்‌; அழகிய மலர்கள்‌ பூத்த பொழில்கள்‌ சூழ்ந்த கொடிமாடச்‌ செங்குன்றூரில்‌ எழுந்தருளி இருப்பவன்‌. இப்பெருமானின்‌ கழலணிந்த திருவடிகளைத்‌ துதிப்பதே நீதியாகும்‌.

சிவபெருமான்‌, அழகிய கச்சணிந்த தனங்களை உடைய உமையம்மை விளங்கும்‌ திருமார்பினன்‌. கார்காலத்தில்‌ மலரும்‌ கொன்றை மலர்‌ மாலையோடு சினம்‌ பொருந்திய பாம்பையும்‌ அணிகலனாகப்‌ பூண்டுள்ளவன்‌. கங்கையை முடியில்‌ கொண்டுள்ள செஞ்சடையன்‌. சிறப்புடைய சான்றோர்கள்‌ வாழும்‌ கொடிமாடச்‌ செகங்குன்றூரில்‌ எழுந்தருளி இருப்பவன்‌. இப்பெருமானின்‌ கழலணிந்த திருவடிகளைத்‌ துதிப்பதே நீதியாகும்‌.

சிவபெருமான்‌ ஆமையின்‌ ஓட்டினோடு முப்புரி நூலையும்‌ தனது மார்பில்‌ அணிந்துள்ளான்‌. நல்ல பன்றியின்‌ கொம்புகளையும்‌ அணிந்து மூங்கில்‌ போன்ற தோள்களை உடைய உமையம்மையை தனது திருமேனியில்‌ ஒருபாகமாகக்‌ கொண்டு விளங்குபவன்‌. வானில்‌ திகழும்‌ மின்னல்‌ போன்று விளங்கும்‌ செஞ்சடையை உடையவன்‌. குன்றுகள்‌ போன்ற மாளிகைகள்‌ சூழ்ந்த கொடிமாடச்‌ செங்குன்றூரில்‌ எழுந்தருளி இருப்பவன்‌. இப்பெருமானின்‌ கழலணிந்த திருவடிகளைத்‌ துதிப்பதே மெய்ப்பொருளாகும்‌.

பெருமான்‌, ஆற்றல்‌ மிக்க மூவிலை வடிவமான நல்ல சூலத்தை ஒரு கையில்‌ ஏந்தியிருப்பவன்‌. திருமுடியில்‌ கங்கையைத்‌ தாங்கியிருப்பதோடு பிறையையும்‌ அணிந்து இருப்பவன்‌. கோங்கு மரங்கள்‌ நிறைந்த சோலைகளால்‌ சூழப்பட்ட கொடிமாடச்‌ செங்குன்றூரில்‌ எழுந்தருளி இருப்பவன்‌. பொருந்திய தோழனாக விளங்குபவன்‌. இப்பெருமானின்‌ திருவடிகளைத்‌ தொழுபவர்கள்‌ தங்கள்‌ வினைப்பற்றுகளை வேரோடு அறுத்துவிடுவர்‌.

சிவபெருமான்‌, கொத்தாக நீண்டு மலர்கின்ற கொன்றை மலர்களைத்‌ தன்‌ சடையில்‌ அணிந்துள்ளவன்‌. நிமிர்ந்து தோன்றும்‌ சிவந்த சடைகள்‌ தாழ்ந்து தொங்குமாறு விளங்குபவன்‌. வெண்மையான புலால்‌ நீங்க தலையோட்டில்‌ பலி ஏற்று உண்ணும்‌ வாழ்க்கையை உடையவன்‌. வெண்‌ காந்தள்‌ மலர்ந்த புதர்களை உடைய வளமான முல்லை நிலங்களால்‌ சூழப்பட்ட கொடிமாடச்‌ செங்குன்றூரில்‌ எழுந்தருளி இருப்பவன்‌. இப்பெரியோனின்‌ திருவடிகளைத்‌ தொழுபவர்களின்‌ வினைகள்‌ தேய்ந்து ஒழியும்‌.

சிவபெருமான்‌ தமது செஞ்சடைமீது நல்ல ஊமத்தமலரையும்‌ இளமதியையும்‌ கொத்தாக மலரும்‌ கொன்றை மலருடன்‌ ஒருசேர நெருங்கச்‌ சூடியிருப்பவன்‌. பூங்கொத்துக்கள்‌ மலர்ந்திருக்கும்‌ குளிர்ந்த பொழில்கள்‌ சூழ்ந்துள்ள கொடிமாடச்‌ செங்குன்றூரில்‌ விரும்பி எழுந்தருளி இருப்பவன்‌. இத்தகைய மெய்ப்பொருளான பெருமானைத்‌ தொழுபவர்கள்‌ தடுமாற்றங்கள்‌ இல்லாதவர்கள்‌ ஆவர்‌.

சிவபெருமானார்‌, சிவந்த பொன்‌ நிறமான பிரமனும்‌, திருமாலும்‌ தேடியும்‌ காண முடியாதவாறு, பவளத்‌ திரள்‌ போன்ற ஒளி வடிவினனாக ஓங்கி நின்ற ஆதி பிரான்‌ ஆவார்‌. கொம்புகளாக நெருங்கி வளர்ந்த மரங்கள்‌ நிறைந்த பொழில்கள்‌ சூழ்ந்த கொடிமாடச்‌ செங்குன்றூரில்‌ விரும்பி எழுந்தருளி இருப்பவன்‌. கடவுளான இப்பெருமானின்‌ திருவடிகளைத்‌ தொழுபவர்கள்‌ தங்களின்‌ வினைகள்‌ யாவையும்‌ நாசம்‌ செய்து விடுவர்‌.

போதி மரத்தை வழிபடுவதாகக்‌ கூறி போலி புத்தத்‌ துறவிகள்‌ திரிகின்றனர்‌. அசோக மரத்தை வழிபடுவதாகக்‌ கூறி வெளி வேஷக்காரர்களாகச்‌ சமணத்‌ துறவிகள்‌ திரிகின்றனர்‌. அவர்கள்‌ உண்மைக்கு மாறான நூல்களில்‌ இருந்து மேற்கோள்களைக்‌ கூறுகின்றனர்‌. அவைகளை உண்மை என்று நம்பி ஏமாந்து உழல்பவர்கனளே! இசைபாடும்‌ குயில்கள்‌ மகிழ்ச்சியுடன்‌ வாழும்‌ குளிர்ந்த பொழில்கள்‌ சூழ்ந்த கொடிமாடச்‌ செங்குன்றூரில்‌ சிவபெருமான்‌ எழுந்தருளி உள்ளார்‌. வேதங்களை அருளிய இப்பெருமானைத்‌ தொழுங்கள்‌! உங்கள்‌ வினைகள்‌ யாவும்‌ அழிந்துவிடும்‌.

அலைகள்‌ மிகுந்த குளிர்ந்த நீரால்‌ சூழப்பட்ட நகர்‌, புகலி என்னும்‌ அழகிய சீகாழியாகும்‌. இந்நகரை விரும்பும்‌ தலைமகனாக நிற்பவர்‌ தமிழ்‌ ஞானசம்பந்தன்‌ ஆகும்‌. கொல்லும்‌ தொழிலில்‌ வல்ல மூவிலைச்‌ சூலத்தை ஏந்திய சிவபெருமான்‌ எழுந்தருளியுள்ள கொடிமாடச்‌ செங்குன்றூரைப்‌ போற்றிப்‌ பாடினார்‌. இப்பதிகப்‌ பாடல்கள்‌ பத்தையும்‌ பாட வல்லவர்களின்‌ வினைகள்‌ யாவும்‌ நாசமாகிவிடும்‌.