1
மாறில் அவுணரரணம் மவைமாயவோர் வெங்கணையா லன்றுநீறெழ எய்தவெங்கள் நிமலன் இடம்வினவில்தேறல் இரும்பொழிலும் திகழ்செங்கயல் பாய்வயலுஞ் சூழ்ந்தஊறல் அமர்ந்தபிரான் ஒலியார்கழல் உள்குதுமே.
சொற்பிரிப்பு
மாறுஇல் அவுணர் அரணம் அவைமாய, ஓர்வெங்கணையால்அன்றுநீறு எழ எய்த எங்கள் நிமலன் இடம் வினவில்தேறல் இரும் பொழிலும், திகழ் செங்கயல் பாய் வயலும், சூழ்ந்தஊறல்; அமர்ந்த பிரான் ஒலி ஆர் கழல் உள்குதுமே.
உரை
தமக்கு நிகரில்லாத வலிய அசுரர்களின் கோட்டைகளாக விளங்கிய முப்புரங்களும் சாம்பலாகிப் போகுமாறு, முற்காலத்தில் ஒருவெங்கணையால் அழித்த நிமலன், எங்கள் சிவபெருமான் ஆவார். இப்பெருமான் எழுந்தருளிய இடம் யாது என வினவினால், அது, தேன் நிறைந்த பெரிய பொழில்களும், விளங்கிய செங்கயல் மீன்கள் பாயும் வயல்களும் சூழ்ந்த திரு ஊறல் ஆகும். இப்பெருமானின் ஒலிக்கின்ற கழல் அணிந்த திருவடிகளை நாம் நாள்தோறும் தியானிப்போமாக.