சீகாழி

க்கு தாராளமாகவும், வெளிப்படையாகவும் அள்ளிக் கொடுக்கும் கைகளை உடைய வள்ளல் தன்மை மிகுந்த கற்றவர்கள் வாழ்கின்ற ஒலிமிக்க நகரம் சீகாழியாகும். இம்மாநகரில் விளங்கும் சிவபெருமானை, ‘பாம்பை இடையில் அணிந்துள்ள பரமனே! அசுரர்களின் முப்புரங்களையும் எரித்த அம்பை உடையவனே!’ என்று போற்றுபவர்கள், தத்துவ ஞானத்தில் தலையானவர்களாவர்.

தொங்கும்‌ வாயையும்‌, முரண்படும்‌ தலையையும்‌ உடைய ஆண்‌ யானைகள்‌ தனது தும்பிக்கையால்‌ மும்மதங்களை அவ்வப்போது சொரிகின்றன. இந்த மதநீரை சுற்றிலும்‌ வண்டுகள்‌ சூழ்ந்து, மொய்த்து, தங்கி அதை உண்ணுகின்றன. இந்த யானைகளின்‌ தும்பிக்கை போன்று வாழைத்தோட்டத்தில்‌ வாழை மரங்கள்‌ காய்க்குலைகளை ஈனுகின்றன.இந்த சீகாழிப்‌ பதியில்‌ வேதங்களைப்‌ படிக்கின்றவர்களின்‌ ஓசை ஒலித்துக்‌ கொண்டேயிருக்கின்றன. இப்பதியில்‌ எழுந்தருளிய சிவபெருமானாரை, “நீலகண்டனாகவும்‌ எட்டுத்‌ தோள்களையும்‌ மூன்று கண்களையும்‌ உடையவனாக விளங்கும்‌ மறையோனே! எங்கள்‌ ஐயனே!’ எனப்‌ போற்றுபவர்களைத்‌ துன்பங்கள்‌ நெருங்கா.

மென்மையான தாமரை மலர்களில்‌ இருந்து வெளிவருகின்ற தேன்‌ நிறைந்து ஓடுகின்ற கழிகள்‌ சூழ்ந்துள்ளதும்‌, சுண்ணாம்புச்‌ சாந்து பூசப்பெற்ற அழகு பொருந்திய மதில்கள்‌ உடையதும்‌, ஆரவாரம்‌ மிகுந்ததுமான பதி காழிப்பதியாகும்‌. இப்பதியில்‌ எழுந்தருளியுள்ள சிவபெருமானை, “அழகிய கூந்தலையும்‌ நல்ல நெற்றியையும்‌ உடைய உமையம்மையின்‌ கணவனே! அரனே!’ என்று மனம்‌ உருகிப்‌ பாடும்‌ அடியவர்களை மிகுந்த துன்பத்தைத்‌ தரும்‌ நோய்கள்‌ எவையும்‌ அணுகாது.

அழகிய கமுக மரங்கள்‌ அளவில்லாத முத்துக்களைப்‌ போன்று பூத்து, மரகதம்‌ போன்று காய்த்து, பவளம்‌ போன்று பழுக்கும்‌ ஆரவாரம்‌ மிகுந்த பதி சீகாழிப்‌ பதியாகும்‌ இப்பதியில்‌ விளங்கும்‌ சிவபெருமானாரை, 'பெண்ணோர்‌ பாகனே! பித்தனே! பிரானே!’‌ என்று போற்றுபவர்களை வினைகள்‌ வந்து சேராது. நாள்தோறும்‌ அவர்களுக்கு இன்பமே வந்து சேரும்‌.

மேகங்கள்‌ தங்கிய மலைச்சாரலில்‌ மழை பெய்து, சிவந்த நிறமுடைய தண்ணீர்‌ வந்து கரும்பின்‌ அடிப்பாகத்தை வருட, அந்த நீர்‌ வளத்தால்‌ மூங்கிலை ஒத்த வளமான பருத்த கரும்புகளில்‌ கணுக்கள்‌ வளரும்‌ சோலைகளை உடைய ஒலிமிக்க பதி சீகாழிப்‌ பதியாகும்‌. இப்பதியில்‌ எழுந்தருளி இருக்கும்‌ சிவபெருமானை, “மானேந்திய கையனே! உமையம்மையின்‌ கணவனே! ஒளி பொருந்திய சங்கக்‌ குழையை அணிந்தவனே!' என்று கூறிப்‌ போற்ற வல்லவர்கள்‌ நற்குணம்‌ உடையவர்கள்‌ ஆவர்‌.

மலைகளில்‌ இருந்து அலைகள்‌ போல வரும்‌ அருவிகள்‌ கரையை உடைய ஆறாக உருவெடுக்கிறது. அந்த ஆற்றில்‌ அடித்துக்‌ கொண்டு வரும்‌ மிளகுத்‌ தண்டுகள்‌ தன்‌ சுவையைத்‌ தண்ணீருக்கு வழங்குகிறது. இத்தகைய ஆரவாரம்‌ மிகுந்த பதி சீகாழிப்‌ பதியாகும்‌. இப்பதியில்‌ எழுந்தருளியிருக்கும்‌ சிவபெருமானை ‘மணம்‌ கமழும்‌ கொன்றை மலர்‌ மாலையை அணிந்த சடையினனே! விடைமீது ஊர்ந்து வருபவனே!' என்று போற்றுபவர்களை வினைகள்‌ அறியவே மாட்டாது. அவர்களை அரிய நோய்களும்‌ பாவங்களும்‌ அடைய மாட்டாது.

வலிமையான சங்குகளைக்‌ கொண்டுள்ள கடல்‌ தனது வலிய அலைகளால்‌ தோணிகளை மோதுகின்றன. அதனால்‌ அவைகள்‌ கார்நெல்‌ மிகுந்த வயலில்‌ வந்து சேருகின்றன. இத்தகைய ஒலிமிக்க பதி காழிப்‌ பதியாகும்‌. இப்பதியில்‌ எழுந்தருளியுள்ள சிவபெருமானை, “இலங்கை மன்னன்‌ இராவணனை முதலில்‌ துன்புறுத்திப்‌ பின்னர்‌ அருள்‌ செய்தவரே! கங்கை சூடிய திருமுடியை உடைய மன்னவனே!' என்று போற்றத்‌ தவம்‌ கைகூடும்‌.

பொய்கைகளில்‌ உள்ள தாமரை மலர்களில்‌ வாழும்‌ அன்னங்கள்‌ அருகில்‌ உள்ள உப்பங்கழிகளில்‌ நடமாடுகின்றன. நீலமலர்‌ போன்ற கண்களை உடைய மகளிரது மங்கல ஒலி நீங்காது கேட்கும்‌ பதி சீகாழிப்‌ பதியாகும்‌. இப்பதியில்‌ எழுந்தருளியிருக்கும்‌ சிவபெருமானை, “பிரமனும்‌ திருமாலும்‌ விரும்பிப்‌ போற்றும்‌ அரசனே’ என்று சொல்ல நம்‌ வினைகள்‌ நம்மைவிட்டு அகன்றுவிடும்‌.

மலைபோல்‌ உயர்ந்த மாடவீடுகளிலும்‌ மேகங்கள்‌ தவழும்‌ நீண்டுயர்ந்த மதில்களிலும்‌ கலைகள்‌ நிறைந்த சந்திரன்‌ வந்து தங்குகின்றது. அழகிய குளிர்ந்த ஒலிமிக்கதுமான பதி சீகாழிப்‌ பதியாகும்‌. இப்பதியில்‌ எழுந்தருளியுள்ள சிவபெருமானை, “சீகாழியின்‌ தலைவனே! வெளிவேஷக்கார சமண முனிவர்களும்‌, போலி புத்தத்‌ துறவிகளாலும்‌ என்றும்‌ அறிய ஒண்ணாத நிலையினனே!’ என்று போற்ற நம்‌ பழவினைகள்‌ நம்மிடம்‌ நில்லாது அகன்று விடும்‌.

தேன்‌ மணம்‌ கொண்ட நீர்நிலைகளில்‌ மலர்ந்த செங்கழுநீர்ப்‌ பூவின்‌ மகரந்தங்களில்‌ படிந்து, அவற்றின்‌ மணத்தைத்‌ தென்றல்‌ காற்றானது வீட்டு வாசல்களில்‌ கொண்டு வந்து உலாவச்‌ செய்கின்றது. ஒலிமிகுந்த காழிப்‌ பதியில்‌ எழுந்தருளியுள்ள சிவபெருமானை முடிவற்ற புகழை உடைய ஞானசம்பந்தன்‌ போற்றிப்‌ பாடினார்‌. இப்பாடல்களைப்‌ பாடவல்லவர்களின்‌ மேல்‌ வரும்‌ பழிகள்‌ தானாகவே நீங்கிவிடும்‌.