திருக்கண்ணார்கோயில்

சிவபெருமான்‌ குளிர்ச்சியான பிறை, சினம்‌ மிகுந்த பாம்பு, ஆகாயத்திலிருந்து தாழ்ந்து வந்த கங்கை ஆகியவற்றைச்‌ சூடியுள்ளார்‌. பெண்ணும்‌ ஆணுமாக விளங்கும்‌ பெருங்கருணையாளனான இப்பெருமான்‌ பிரியாமல்‌ எழுந்தருளி இருக்கும்‌ கோயில்‌ திருக்‌ கண்ணார்‌ கோயில்‌ ஆகும்‌. இக்கோயிலைக்‌ கைகளால்‌ தொழுது வணங்குபவர்களைத்‌ துன்பங்களும்‌ பாவங்களும்‌ அணுகா. நல்வினையால்‌ வரும்‌ இன்பங்கள்‌ அவர்களை அணுகும்‌.

சிவபெருமானின்‌ திருக்கண்ணார்‌ கோயிலானது மணம்‌ பொருந்திய சந்தனம்‌, கரிய அகல்‌, குளிர்ந்த ஒளிவீசும்‌ முத்து ஆகியன: வரும்‌ தெளிந்த நீரை உடைய மண்ணி நதியால்‌ வளம்‌ பெருகும்‌ வயல்களால்‌ சூழப்பட்டு உள்ளது. இங்கு உள்ள சோலைகளில்‌ கொத்துக்களாக விரிந்துள்ள மலர்கள்‌ நிறைந்துள்ளன. குயில்கள்‌ பாடவும்‌ ஆடவும்‌ செய்கின்றன. செவிகளைக்‌ குளிர்விக்கும்‌ பண்‌ இசைபாடும்‌ வண்டுகள்‌ செவ்வழிப்‌ பண்பாடும்‌ சீரோடு திகழ்வது சிவபிரானது திருக்கண்ணார்‌ கோயில்‌ ஆகும்‌.

திருக்கண்ணார்‌ கோயில்‌ என்னும்‌ தலமானது, முல்லை நிலத்தில்‌ வளரும்‌ முல்லை மலரும்‌, மல்லிகை மலரும்‌, காட்டு மல்லிகையோடு பின்னி வளர்ந்துள்ள இடமாகும்‌. இங்குள்ள கல்லால்‌ இயன்ற வானளாவிய மதில்களில்‌ மேகங்கள்‌ சிறிது நேரம்‌ அமர்ந்து பின்‌ செல்லுகின்றன. இத்தலமானது, பலவாக இயலும்‌ தாளங்களை இசைத்துப்‌ பூத கணங்கள்‌ போற்றிப்பாட, சுடுகாட்டில்‌ நள்ளிரவில்‌ திருநடனம்‌ செய்யும்‌ ஈசனாகிய எம்‌ சிவபெருமான்‌ எழுந்தருளி இருக்கும்‌ தலமாகும்‌. மேகங்கள்‌ சிறிது நேரம்‌ அமர்ந்து விட்டுப்‌ பின்‌ செல்லுகின்றன.

மரங்கள்‌ செழித்து வளர்ந்துள்ள காட்டில்‌ வாழ்ந்த உயர்ந்த பெரிய யானையைக்‌ கண்டு, மணம்‌ பொருந்திய மலர்‌ மாலையை அணிந்துள்ள உமையம்மை அஞ்சினாள்‌. உடனே சிவபெருமான்‌ அதன்‌ தோலை உரித்துப்‌ போர்த்தினார்‌. தெய்வத்‌ தன்மை வாய்ந்த கல்‌ஆல மர நிழலில்‌ அமர்ந்து அறம்‌, பொருள்‌, இன்பம்‌, வீடு என்று சொல்லப்படும்‌ உறுதிப்‌ பொருள்களின்‌ உட்பொருளை சனகாதி முனிவர்களுக்கு உணர்த்தியவர்‌. திருக்கண்ணார்‌ கோயில்‌ கருவறையில்‌ தங்கியிருக்கும்‌ இப்பெருமானைப்‌ போற்றி அடைந்தவர்கள்‌ முழுமையான ஞானம்‌ அடைந்தோராவர்‌.

மாவலி என்ற அரக்கர்‌ குல மன்னன்‌ வஞ்சனை பொருந்திய பெரிய உருவம்‌ உடையவனாய்‌, தனக்கு ஒப்பார்‌ எவரும்‌ இல்லை என்று செறுக்குற்று தேவர்களைத்‌ துன்புறுத்திய மன்னன்‌ ஆவான்‌. திருமால்‌ குறுகிய பிராமண வடிவத்தை எடுத்து, அவனிடம்‌ மூன்றடி மண்‌ கேட்டு உலகமெல்லாம்‌ தன்னுடையதே என்று அளந்தவன்‌. அந்த திருமால்‌ சிவபெருமானின்‌ வடிவத்தைத்‌ தாபித்து அவரை வழிபட்டு அருள்‌ பெற்றவன்‌. சிவபெருமான்‌ கருத்த பெரிய கழுத்தினை உடையவராக, விரும்பி எழுந்தருளியிருக்கும்‌ கோயில்‌ திருக்கண்ணார்‌ கோயில்‌ ஆகும்‌.

சிவபெருமான்‌ விண்ணவர்களைக்‌ காத்தருளும்‌ பொருட்டு கடலில்‌ தோன்றிய நஞ்சினை விருப்பத்தோடு உண்டவர்‌. தேவர்களுக்கு அமுதத்தை முழுவதுமாக அளித்தவர்‌. எல்லா உலகத்து உயிர்களுக்கும்‌ பற்றுக்‌ கோடாகவும்‌, கண்ணாகவும்‌ விளங்குபவர்‌. திருக்கண்ணார்‌. கோயிலில்‌ கனிபோன்று விளங்கும்‌ இப்பெருமானைக்‌ ஒட்டிச்‌ சேர்வோர்களுக்கு எமனால்‌ வரும்‌ துன்பங்கள்‌ இல்லை.

முன்னொரு காலத்தில்‌ கெளதம முனிவர்‌ இந்திரனின்‌ உடல்‌ முழுவதும்‌ ஆயிரம்‌ அல்குல்‌ தோன்றுமாறு சாபமிட்டார்‌. அதனால்‌ இந்திரன்‌ மிகவும்‌ வருந்தி சிவனை வழிபட்டான்‌. பின்னொரு காலத்தில்‌ தேவர்கள்‌ புகழ்ந்து போற்றுமாறு, சிவபெருமான்‌ அச்சாபத்தை நீக்கி அருள்செய்து, இந்திரனின்‌ உடல்‌ முழுவதும்‌ ஆயிரம்‌ கண்களாகத்‌ தோன்றுமாறு செய்தார்‌. அப்பெருமான்‌ எழுந்தருளிய தலம்‌ திருக்கண்ணார்‌ கோயில்‌ ஆகும்‌. இத்தலத்தில்‌ கன்னியர்கள்‌ நாள்தோறும்‌ கூடி வந்து வழிபடுகின்றனர்‌.

இராவணன்‌, சிவபெருமானை அன்போடு வழிபட்டால்‌ ஆக்கம்‌ பெறலாம்‌ என்று அறியாத அறிவிலி. கயிலையைப்‌ பெயர்த்தபோது அதன்‌ தீழ்‌ அகப்பட்டு நெருக்குண்டவன்‌. அவன்‌ நல்லறிவு பெற்று, எங்கும்‌ புகழை உடைய சிவபெருமானின்‌ திருவடிகளைத்‌ தன்‌ நெஞ்சில்‌ நினைந்து போற்றினான்‌. அவனுக்கு அழிக்க முடியாத ஒளியினை உடைய வாளையும்‌, தேரையும்‌ முற்காலத்தில்‌ இப்பெருமான்‌ வழங்கி அருளினார்‌. இத்தகைய பெருமையை உடைய சிவபெருமான்‌ வீற்றிருக்கும்‌ தலம்‌ திருக்கண்ணார்‌ கோயில்‌ என்று புகழ்ந்து கூறுபவர்கள்‌ சிவலோகம்‌ சென்றடைவார்கள்‌.

செந்தாமரை மலரில்‌ வீற்றிருக்கும்‌ பிரமனும்‌ திருமாலும்‌ தங்களின்‌ அழகிய ஊனக்‌ கண்களால்‌ நோக்கியும்‌ காண இயலாதவராக அழல்‌ உருவாக நின்றவர்‌ சிவபெருமான்‌. இப்பெருமான்‌ தனது கருணை நிறைந்த கமலக்‌ கண்களோடு வீற்றிருக்கும்‌ தலம்‌ திருக்கண்ணார்‌ கோயில்‌ ஆகும்‌. இக்கோயிலை அடைந்து தமது உள்ளத்தில்‌ மலம்‌ நீங்கப்‌ பெற்றவராக பரிசுத்த மனத்தோடு போற்றிடுவோர்‌ என்றும்‌ வானுலகில்‌ இனிது அமர்ந்திருப்பர்‌.

சமணர்கள்‌, குலைகளை ஈனும்‌ பனை மரத்தின்‌ ஓலைகளால்‌ வேயப்பட்ட தடுக்கை என்ற உடையை உடுத்தி இருப்பவர்கள்‌. புத்தர்கள்‌ தாம்‌ உண்ணும்‌ சோற்றையே பெரிதெனக்‌ கருதுபவர்கள்‌. இவர்கள்‌ கூறும்‌ அறிவுரைகளைக்‌ கேளாதீர்கள்‌. சிவபெருமான்‌ வெண்மையான பூணூல்‌ அணிந்த மார்பினர்‌. ஆனேற்றை ஊர்தியாக உடையவர்‌. மேலானவர்‌. என்பு மாலை அணிந்தவர்‌. நீண்ட சடைமுடிமேல்‌ கங்கையை அணிந்துள்ளவர்‌. தலைமைத்‌ தன்மை உடைய இப்பெருமான்‌ எழுந்தருளி விளங்கும்‌ கோயில்‌ திருக்கண்ணார்‌ கோயில்‌ ஆகும்‌. அதனைச்‌ சென்றடைந்து வணங்குங்கள்‌.

அழகிய திருக்கண்ணார்‌ கோயில்‌ என்னும்‌ தலத்தில்‌ சிவபெருமான்‌ எழுந்தருளி உள்ளார்‌. இப்பெருமானைக்‌ கடல்‌ சூழ்ந்ததும்‌, பூக்கள்‌ நிறைந்த சோலைகளை உடையதும்‌, அழகாக அமைந்த மாடவீடுகளை உடையதுமான புகலிப்‌ பதியின்‌ தலைவனான ஞானசம்பந்தன்‌ போற்றிப்‌ பாடினார்‌. இவர்‌ பழமையான இறைவனின்‌ புகழை நாவினால்‌ மருவிப்‌ போற்றுபவர்‌. பரந்துபட்டுச்‌ செல்லும்‌ ஓசை மருவிய இப்பதிகப்‌ பாடல்கள்‌ பத்தையும்‌ பாட வல்லவர்கள்‌, தம்மேல்‌ வரும்‌ பழிகள்‌ நீங்கப்‌ பெறுவர்‌.